كوكسۋ اۋداندىق اكىمدىگىنىڭ مالىمەتىنە قاراعاندا، بالپىق بيدەن الماتى، تالدىقورعان، جاركەنت، ۇشتوبە قالالارىنا قاتىنايتىن اۆتوبۋستاردان بولەك، اۋداننىڭ ءوز ىشىندە ىسكە قوسىلعان باعىتتار 16 ەلدى مەكەندى، ياعني 47% قامتىپ وتىر. بۇل باعىتتاردا نەگىزىنەن «اق نار-ا» ج ش س قىزمەت كورسەتۋدە. جۋىردا جولاۋشى تاسىمالى قىزمەتىنە «داۋتوۆ» جك دا قوسىلدى. ال اۋدان ورتالىعىنىڭ ىشىندە «گيميدجييەۆ» جك شاعىن اۆتوبۋستارى ءوز قىزمەتىن ۇسىنىپ وتىر.
ال كەربۇلاق اۋدانىنىڭ ورتالىعى سارىوزەك اۋىلىنىڭ ىشىندە وتكەن جىلدىڭ قاراشا ايىندا العاش رەت قوعامدىق كولىك قاتىناسى قولعا الىنعان بولاتىن. وسى جىلدىڭ قاڭتار ايىنىڭ باسىندا ەكىنشى باعىت ىسكە قوسىلدى.
كەربۇلاق اۋداندىق اكىمدىگىنىڭ اقپاراتىنا سۇيەنسەك، اۋداندىق تۇكش ءبولىمى مەن تۇرعىن ءۇي ينسپەكسياسى «جەڭىس» جەكە كاسىپكەرىمەن كەلىسىمشارت جاساسىپ، سونىڭ ناتيجەسىندە تۇرعىنداردىڭ اۋىل ىشىندە دىتتەگەن جەرىنە قينالماي جەتۋىنە جاعداي جاسالىپ وتىر. وعان قوسا جاڭا شاعىناۋدان تۇرعىندارىنىڭ دا ورتالىققا قاتىناۋى جەڭىلدەگەن.
ءقازىر سارىوزەك اۋىلىندا جالپى سانى 5 كولىك جولاۋشى تاسىمالىنا قىزمەت كورسەتۋدە. قوعامدىق كولىكتە وقۋشىلار تەگىن جۇرەدى، ال ەرەسەكتەر ءۇشىن جولاقىسى – 80 تەڭگە.
سارىوزەكتەگى د. قونايەۆ اتىنداعى ورتا مەكتەپتىڭ ءمۇعالىمى ساندۋعاش وسپانوۆا – جاڭا شاعىناۋداننىڭ تۇرعىنى. ءۇيى مەن جۇمىسىنىڭ اراسىندا كۇندەلىكتى قاتىنايتىن س.وسپانوۆا قوعامدىق كولىك قاتىناسىنىڭ جاندانعانىنا ءدان ريزا:
– ەلدى مەكەن تۇرعىندارىنىڭ جۇمىسقا، بالالاردىڭ مەكتەپكە، باسقا جولاۋشىلاردىڭ كۇندەلىكتى تىرشىلىكپەن جان-جاققا بارۋى وڭايلادى. حالىقتىڭ يگىلىگى ءۇشىن اتقارىلاتىن وسىنداي وڭ باستامالار كوبەيە بەرسىن، – دەيدى ۇستاز.
جالپى جەتىسۋ وبلىسىنىڭ جولاۋشى كولىگى جانە اۆتوموبيل جولدارى باسقارماسىنىڭ مالىمەتىنشە، ءوڭىردىڭ مارشرۋتتىق جەلىسى 75 اۆتوبۋس باعىتىن قامتيدى (6 وبلىسارالىق باعىت، 22 وبلىسىشىلىك باعىت، 40 اۋدانىشىلىك (قالاىشىلىك) باعىت، 7 قالا ماڭىنداعى باعىت) 18 تاسىمالداۋشى مەكەمە قىزمەت كورسەتەدى، 342 جىلجىمالى قۇرام تارتىلعان. 2022 جىلعى قوعامدىق كولىك جۇمىسىنىڭ قورىتىندىسى بويىنشا اۆتوموبيل كولىگىمەن 139،4 ملن. جولاۋشى تاسىمالداندى، ال جولاۋشىلار اينالىمى 1566،3 ملن. جولاۋشى-شاقىرىمدى قۇرادى.
