جەتىسۋ وبلىسىندا «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اۋىل تۇرعىندارىنا مەديسينالىق قىزمەتتىڭ قولجەتىمدىلىگىن ارتتىرۋ ماقساتىندا 44 نىساننىڭ قۇرىلىسى اياقتالۋعا جاقىن. بۇل تۋرالى وبلىس اكىمى بەيبىت يسابايەۆ مالىمدەدى،- دەپ حابارلايدى Dalanews.kz
جالپى العاندا، جوبانىڭ اياسىندا وڭىردە 59 مەديسينالىق نىسان سالۋ قاراستىرىلعان. ونىڭ ىشىندە 15 دارىگەرلىك امبۋلاتوريا، 39 فەلدشەرلىك-اكۋشەرلىك پۋنكت جانە 5 مەديسينالىق پۋنكت بار. وتكەن جىلدىڭ جەلتوقسان ايىندا 15 نىساننىڭ قۇرىلىسى تولىق اياقتالسا، قالعان 44 نىساننىڭ جۇمىسى بيىل جالعاسۋدا. قازىرگى تاڭدا ولاردىڭ ورتاشا دايىندىق دەڭگەيى – 83 پايىزدى قۇرايدى.
– قۇرىلىس جۇمىستارى ماۋسىم جانە تامىز ايلارىندا كەزەڭ-كەزەڭىمەن اياقتالادى دەپ جوسپارلانىپ وتىر. سونىمەن قاتار نىسانداردى ينجەنەرلىك-كوممۋنيكاسيالىق جەلىلەرمەن قامتاماسىز ەتۋ جۇمىستارى دا جۇرگىزىلۋدە. قاجەتتى قارجى جەرگىلىكتى بيۋدجەتتەن ءبولىندى، – دەدى وبلىس اكىمى.
بەيبىت يسابايەۆتىڭ ايتۋىنشا، بۇل جوبا وبلىس اكىمدىگىنىڭ تۇراقتى باقىلاۋىندا. اۋىل تۇرعىندارى ءۇشىن قولجەتىمدى ءارى ساپالى مەديسينالىق كومەك كورسەتۋ – باستى باسىمدىقتاردىڭ ءبىرى.
