بيىل جەتىسۋ وبلىسىندا 113 مىڭنان استام وقۋشى جازعى دەمالىس شارالارىمەن قامتىلادى. وڭىردە قالا سىرتىنداعى 13 بالالار ساۋىقتىرۋ لاگەرى جۇمىس ىستەيدى، دەپ حابارلايدى Dalanews.kz
جازعى دەمالىس كەزىندە جالپى ءبىلىم بەرۋ ۇيىمدارىنىڭ 1-10 سىنىپتارىنداعى 121 694 وقۋشىنىڭ 113 112ء-سىن قامتۋ جوسپارلانىپ وتىر، بۇل - وقۋشىلاردىڭ 93%. ونىڭ 9 932ء-سى - الەۋمەتتىك وسال توپتار ساناتىنداعى وتباسىلاردان شىققان بالالار.
وعان قاجەتتى قاراجات رەسپۋبليكالىق جانە جەرگىلىكتى بيۋدجەتتەن، دەمەۋشىلەردىڭ، سونىڭ ىشىندە «قازاقستان حالقىنا» قورىنىڭ ەسەبىنەن، كاسىپوداق ۇيىمدارى تاراپىنان قاراستىرىلادى. وسىلايشا وقۋشىلار جازعى دەمالىستى تۋريستىك ساياحاتپەن، ەڭبەكپەن، شىعارماشىلىقپەن، ينتەللەكتۋالدىق شىڭداۋمەن وتكىزەدى. جازعى ساۋىقتىرۋ لاگەرلەرىنە 12342 پەداگوگ تارتىلماق، سونىڭ 112ء-سى - قالا سىرتىنداعى لاگەرلەردە، 12000-ى مەكتەپ جانىنداعى تاماقتاندىرىلمايتىن لاگەرلەردە بولادى. سونىمەن قاتار بالالار دەمالىس ورىندارىنا پەداگوگيكالىق كوللەدجدەردىڭ 150 ستۋدەنتى، 80 ەرىكتى تارتىلادى.
«جەتىسۋ وبلىسىندا بالالاردىڭ جازعى دەمالىسى 6 جوبا اياسىندا «ۇلتتىق قۇندىلىقتار»، «بىلىمنەن ماماندىققا دەيىن: ەڭبەك الەمىنە ەكسكۋرسيا»، «جاسىل كلۋب»، «جازعى ەكران»، «جەتىسۋ ساقيناسى» «ۇلتتىق قۇندىلىقتار»، «تۋريستياتا» جوباسى شەڭبەرىندە ۇيىمداستىرىلادى. ماسەلەن، بالالار وڭىردەگى زاۋىتتار مەن سەحتارعا بارىپ، تەحنيكالىق-كاسىپپەن تانىسىپ، قاراپايىم ماتەريالداردان ونىمدەر قالاي جاسالاتىنىن كورەدى. سول سياقتى وبلىستىڭ كورىكتى جەرلەرىنە، ۇلتتىق ساياباقتارعا، مۋزەيلەرگە ت.ب. تابيعي، تاريحي، مادەني، تۋريستىك ورىندارعا ەكسكۋرسيالىق ساياحات جاسايدى. بۇل رەتتە قاۋىپسىزدىك ماسەلەسىنە، سانيتارلىق تالاپتاردى ساقتاۋعا باسا كوڭىل بولىنەدى. دەمالىس ارنايى بەكىتىلگەن باعدارلاما نەگىزىندە مەتوديكالىق ۇسىنىمدارعا سايكەس جۇرگىزىلەدى»، - دەلىنگەن وبلىستىق ءبىلىم باسقارماسىنىڭ حابارلاماسىندا.
جالپى وبلىستاعى 13 بالالار ساۋىقتىرۋ لاگەرىنىڭ 11ء-ى - قالا سىرتىنداعى جازعى ساۋىقتىرۋ ورتالىعى، 1 - مۇگەدەكتىگى بار بالالارعا ارنالعان جازعى ساۋىقتىرۋ ورتالىعى، 1 - دارىندى بالالارعا ارنالعان لاگەر. سولاردىڭ ءبىرى – الاكول اۋدانىنداعى «جانسايا» جارتىلاي ستاسيونارلىق مەديسينالىق-الەۋمەتتىك مەكەمەسى جانىنداعى ەرەكشە بالالارعا ارنالعان جازعى ساۋىقتىرۋ لاگەرىنىڭ جۇمىس ىستەگەنىنە بيىل ءۇشىنشى جىل. وسى ۋاقىت ىشىندە وندا ايماقتىڭ ءار تۇكپىرىنەن 300-گە جۋىق بالا تەگىن دەمالدى.
- بيىل الاكول جاعالاۋىندا ورنالاسقان ەرەكشە بالالارعا ارنالعان ساۋىقتىرۋ لاگەرىندە جازعى كەزەڭ 24 ماۋسىمدا باستالادى. بيىلعى جىلى وندا ەرەكشە قاجەتتىلىگى بار 160 بالا تەگىن دەمالادى. ءار بالا 5 كۇننەن دەمالادى. بالالار ءى-ىىى توپتاعى مۇگەدەكتىگى بويىنشا تىركەلگەن جەرىندەگى دارىگەر ۇسىنىسىنىڭ نەمەسە قورىتىندىسىنىڭ نەگىزىندە قابىلدانادى. ورتالىققا جەتۋدى ۇيىمداستىرۋدى زاڭدى وكىل نەمەسە بىرگە ەرىپ جۇرەتىن ادام تۇرعىلىقتى جەرىنەن ءۇشارال قالاسىنا دەيىن دەربەس جۇزەگە اسىرادى، بۇدان ءارى ولاردى اقشي اۋىلىنا، لاگەرگە جەتكىزۋدى ءبىز ۇيىمداستىرامىز. جالپى، مۇنداي بەلسەندى دەمالىس بالالاردى ساۋىقتىرۋعا عانا ەمەس، الەۋمەتتەندىرۋگە دە وڭ ىقپال ەتەدى، - دەپ اتاپ ءوتتى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامبايەۆ.
ايتا كەتەيىك، 6 جاستان 18 جاسقا دەيىنگى مۇگەدەكتىگى بار بالالارعا ارنالعان 40 ورىندىق جازعى ساۋىقتىرۋ لاگەرى 2023 جىلى الاكول اۋدانى اكىمدىگىنىڭ رەزيدەنسياسى عيماراتىنىڭ بازاسىندا اشىلعان بولاتىن. ساپالى الەۋمەتتىك قىزمەت كورسەتۋ ماقساتىندا وعان قاجەتتى كۇردەلى جوندەۋ جۇمىستارى جۇرگىزىلىپ، بالالارعا الاكول كولىنىڭ جاعاسىندا دەمالۋ ءۇشىن بارلىق جاعدايلار جاسالدى.
ەسكە سالساق، وسى جىلى وڭىردە 131 675 وقۋشى، اتاپ ايتقاندا 11 سىنىپتى 7 866 تۇلەك، 9 سىنىپتى 12 968 تۇلەك اياقتايدى. 23 مامىردا 1-11 سىنىپ تۇلەكتەرى ءۇشىن سوڭعى قوڭىراۋ شاراسى مەكتەپ اۋماعىندا ءوتىپ، «ءبىلىمىم – وتانىما» تاقىرىبىنداعى ءبىرىڭعاي سىنىپ ساعاتتارى وتكىزىلەدى.
