الەۋمەتتىك-كاسىپكەرلىك كورپوراسياسىنىڭ ۇجىمىنا جاڭا باسشىنى الماتى وبلىسى اكىمىنىڭ ورىنباسارى سەرىكجان بەسكەمپىروۆ تانىستىردى.
– وزدەرىڭىزگە ءمالىم، رۋسلان ءسادۋاقاس ۇلى بىرنەشە جىل بويى كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى بولدى، تالاي قىزمەتتە ىستەدى. بۇگىنگى تاڭدا كورپوراسيا الدىندا جاۋاپتى مىندەتتەر تۇر.
بۇل – اقسۋ قانت زاۋىتىن ىسكە قوسۋ، وزگە دە كوپتەگەن مەملەكەتتىك باعدارلامالاردى جۇزەگە اسىرۋ. اكك جۇمىسى جولعا قويىلعان، ەندى ودان ءارى دامىتۋ قاجەت. ەڭبەكتە تابىس تىلەيمىن، – دەدى سەرىكجان بەسكەمپىروۆ. جاڭا باسشىنىڭ وسىعان دەيىن كورپوراسيا جۇمىسىنا جەتەكشىلىك ەتكەندىكتەن، ونىڭ قىزمەتىمەن جاقسى تانىس ەكەنى اتاپ ءوتىلدى.
ءوز كەزەگىندە رۋسلان قوجاسبايەۆ الماتى وبلىسىنىڭ باسشىلىعىنا سەنىم كورسەتكەنى ءۇشىن العىسىن ءبىلدىردى.
– اكك اگروونەركاسىپتىك كەشەن سالاسىندا ماڭىزدى جوبالاردى جۇرگىزەدى، باسىم مەملەكەتتىك باعدارلامالاردى ىسكە اسىرىپ كەلەدى جانە ءوڭىردىڭ الەۋمەتتىك-ەكونوميكالىق دامۋىندا شەشۋشى ءرول اتقارادى. ءوڭىر باسشىلىعىنا سەنىم ارتقانى ءۇشىن العىس ايتقىم كەلەدى. بارلىق قويىلعان ماقساتتار مەن مىندەتتەر ورىندالادى، – دەدى اكك باسشىسى.
رۋسلان قوجاسبايەۆ 1976 جىلى الماتى وبلىسىنىڭ سارقان اۋدانىندا تۋعان. اباي اتىنداعى الماتى مەملەكەتتىك ۋنيۆەرسيتەتىن بىتىرگەن. ماماندىعى بويىنشا زاڭگەر.
ەڭبەك جولىن 1996 جىلى الماتى قالاسىنىڭ بيزنەس-قۇرىلىمدارىندا باستاعان. 1999-2004 جىلدارى الماتى قالاسى مەن شىعىس قازاقستان وبلىسىنىڭ قارجى پوليسياسى ورگاندارىندا جۇمىس ىستەدى. ءار جىلدارى ءتۇرلى كومپانيالاردا كۇردەلى قۇرىلىس دەپارتامەنتىنىڭ ديرەكتورى، ينۆەستيسيالىق جوبالار دەپارتامەنتىنىڭ ديرەكتورى، باس مەنەدجەر قىزمەتتەرىن اتقاردى. «پاراسات حولدينگ» اق ۆيسە-پرەزيدەنتى، «ەنەرگو-ينجيرينگ» ج ش س باقىلاۋ كەڭەسىنىڭ ءتوراعاسى بولدى.
2018 جىلدىڭ مامىرى مەن 2020 جىلدىڭ مامىرى ارالىعىندا الماتى وبلىسىنىڭ كاسىپكەرلىك، يندۋستريالدى-يننوۆاسيالىق دامۋ باسقارماسىنىڭ باسشىسى قىزمەتىن اتقاردى.
