بۇعان دەيىن امبۋلاتوريا 1964 جىلى سالىنعان كىشكەنتاي عيماراتتا بولعان. قازىرگى جاڭا عيمارات ەكى قاباتتى، اۋماعى 1000 شارشى مەتر، تۇرعىندارعا ساپالى مەديسينالىق كومەك كورسەتۋگە بارلىق جاعداي جاسالعان. جاڭا امبۋلاتوريادا ۋزي، ەكگ بار، سول سياقتى ستوماتولوگ مامان دا وسىندا. بۇرىن بۇل قىزمەتتەر ءۇشىن ەركىندىكتەرگە
تالدىقورعانعا بارۋعا تۋرا كەلەتىن. مۇندا جالپى تاجىريبەدەگى دارىگەرلەرگە، اكۋشەر-گينەكولوگقا، ستوماتولوگقا، پسيحولوگقا ارنالعان كابينەتتەر، بالالاردى دامىتۋعا ارناپ جابدىقتالعان بولمە، سكرينينگ وتەتىن كابينەت، ۋزي زەرتتەۋى، 2 ەگۋ بولمەسى مەن 2 پروسەدۋرالىق بولمە، ماسساج جانە فيزيوكابينەتتەر، سول سياقتى ءماجىلىس زالى قاراستىرىلعان. سونداي-اق «تازا» جانە «لاس» ايماققا بولىنگەن فيلتر بار. ەگۋ پۋنكتىندە ءاربىر نيەت ءبىلدىرۋشى كوروناۆيرۋس ينفەكسياسىنا قارسى ۆاكسينا سالدىرا الادى. امبۋلاتوريادا ەركىن جانە كوكتال اۋىلدارىن قوسقاندا بارلىعى 18 مىڭ ادامعا مەديسينالىق قىزمەت كورسەتىلەدى. شتاتتا 42 مەديسينا مامانى جۇمىس ىستەيدى.
جاڭا امبۋلاتورياعا ارنايى بارعان اماندىق باتالوۆ قۇرىلىس ساپاسى مەن نىساننىڭ ماتەريالدىق-تەحنيكالىق جابدىقتالۋىنا وڭ باعا بەردى. سول سياقتى ول جۋىردا امبۋلاتورياعا جاڭا جەدەل جاردەم ماشيناسى بەرىلەتىنىن دە ايتتى.
– ەركىن اۋىلىنىڭ تۇرعىندارى وتكەن جىلعى ەسەپتى كەزدەسۋدە اۋىلعا جاڭا امبۋلاتويا كەرەك دەگەن ماسەلە كوتەرگەن ەدى. سوعان بايلانىستى ءتيىستى باسقارماعا تاپسىرما بەردىم، ءسويتىپ، ءبىر جىل ىشىندە جەرگىلىكتى بيۋدجەت ەسەبىنەن جاڭا امبۋلاتوريا سالىندى. ءقازىر حالىققا قىزمەت كورسەتۋگە دايىن. نىسان ساپالى سالىنعان، زامان تالابىنا ساي قۇرالدارمەن جابدىقتالعان. ەلباسى مەن پرەزيدەنتتىڭ العا قويعان باستى مىندەتتەرىنىڭ ءبىرى – حالىقتىڭ دەنساۋلىعىن نىعايتۋعا جاڭا نىسان قىزمەت ەتە بەرسىن، – دەدى ا.باتالوۆ.
جەرگىلىكتى تۇرعىن، ەڭبەك ارداگەرى، مەدياتور شولپان مۇسانوۆا اسەرىن ءبولىسىپ، تىلەگىن ءبىلدىردى:
– وتكەن جىلى جاڭا زاماناۋي امبۋلاتوريا سالىپ بەرەمىز دەپ ۋادە بەرىپ ەدى، بيىل، مىنە، قولدانىسقا بەرىپ وتىر. «ايتتى، جاسادى»، - دەۋشى ەدى عوي. ءسوز بەن ءىستىڭ ءبىر جەردەن شىققانىنا قۋانىشتىمىز. ەل باسشىلارىنا، وبلىس باسشىلىعىنا حالىقتىڭ دەنساۋلىعىنا قامقورلىق جاساعانى ءۇشىن راقمەت ايتامىن. ەندى قالاعا سابىلىپ جۇرمەي-اق، كەرەكتى مەديسينالىق قىزمەتتى ءوز اۋىلىمىزدا دا الا الامىز، – دەدى ول.
اتاپ وتسەك، مەديسينالىق قىزمەتتىڭ قول جەتىمدىلىگىن ارتتىرۋ ماقساتىندا بيىلعى جىلى جامبىل جانە قاراساي اۋداندارىندا «جۇمىسپەن قامتۋ جول كارتاسى» باعدارلاماسى اياسىندا 2 دارىگەرلىك امبۋلاتوريا، سول سياقتى وبلىستىڭ ءار تۇكپىرىندە بلوكتى-مودۋلدى كونسترۋكسيادان 20 مەدپۋنكت سالىنادى. وبلىستا وتكەن جىلى بارلىعى 14 دەنساۋلىق ساقتاۋ نىسانى تۇرعىزىلدى، سونىڭ 8ء-ى – دارىگەرلىك امبۋلاتوريا، 1-ەۋى – مەديسينالىق پۋنكت.
