قازاق حالقىنىڭ ىزگى قاسيەتتەرىنىڭ ءبىرى قايىرىمدىلىق ەكەنى داۋسىز. كەز كەلگەن قيىندىقتى ەل بولىپ جەڭە بىلگەن. ماڭعىستاۋ وبلىسىندا بيىل جاۋىن-شاشىن از تۇسۋىنە بايلانىستى مال ازىعى ءشوپتىڭ جەتكىلىكتى مولشەردە شىقپاي قالۋىنا بايلانىستى قۋاڭشىلىق ورىن الدى. وسىعان وراي ەلىمىزدىڭ ءار ءوڭىرى ءوز جاردەمىن كورسەتۋدە، – دەپ حابارلايدى Dalanews.kz تۇركىستان وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.
ماسەلەن، تۇركىستان وبلىسى جەتىساي اۋدانىنىڭ شارۋالارى «ءبىز بىرگەمىز» اكسياسى اياسىندا 74 توننا پرەسس ءشوپتى ماڭعىستاۋلىقتارعا جونەلتتى.
سونداي-اق، جەتىسايلىقتار تاعى دا قوسىمشا 60 توننا مال ازىعىن جونەلتپەك. ايتا كەتەرلىگى، بىلتىر عانا توپان سۋدان زارداپ شەككەن ماقتاارال اۋدانى ورگەباس اۋىلىنىڭ شارۋالارى دا ءبىر ۆاگون جەم-شوپ تيەپ قيىندىق كورىپ جاتقان شارۋالارعا جىبەردى.
