جەتىساي اۋداندىق ءماسليحاتىنىڭ حاتشىسى، «Nur Otan» پارتياسىنان سايلانعان اۋداندىق ءماسليحات دەپۋتاتى، مەسەنات ءاليحان ۋتانوۆ وتباسىنىڭ اتىنان وزدەرى وقىعان «اسىقاتا» جالپى ورتا مەكتەبىنە زاماناۋي سپورت الاڭىن سالىپ بەردى، – دەپ حابارلايدى Dalanews.kz «Nur Otan» پارتياسى باسپا ءسوز قىزمەتىنە سىلتەمە جاساپ.

بۇعان دەيىن دە مەكتەپتىڭ ءتۇرلى قايىرىمدىلىق شارالارىندا قولۇشىن سوزىپ كەلە جاتقان ۋتانوۆتار اۋلەتى «Nur Otan» پارتياسىنىڭ ءتوراعاسى، ەلباسى ن.ءا.نازاربايەۆتىڭ «رۋحاني جاڭعىرۋ» باعدارلاماسىنىڭ «تۋعان جەر» جوباسىن جۇزەگە اسىرۋ ماقساتىندا 4 اي بۇرىن وسى نىساننىڭ قۇرىلىسىن باستاعان.

شاعىن فۋتبول، ۆولەيبول جانە باسكەتبول ويناۋعا بولاتىن نىساننىڭ اشىلۋ سالتاناتىنا جەتىساي اۋدانىنىڭ اكىمى مۇرات بولات ۇلى، «Nur Otan» پارتياسى جەتىساي اۋداندىق فيليالى ءتوراعاسىنىڭ ءبىرىنشى ورىنباسارى ءادىلحان اساۋوۆ، جەتىساي اۋدانىنىڭ ادامي الەۋەتتى دامىتۋ ءبولىمىنىڭ باسشىسى تۇرسىن مىرزالييەۆ، اۋداندىق ءماسليحات دەپۋتاتتارى مەن سپورت ارداگەرلەرى قاتىستى. قۇتتىقتاۋ ءسوز سويلەپ، نىساننىڭ اشىلۋىنا اتسالىسقان ازاماتتاردى اۋدان اكىمى مەن «Nur Otan» پارتياسىنىڭ العىس حاتتارىمەن ماراپاتتادى.

– بۇگىنگى جەتكەن جەتىستىكتەرىمىزدىڭ بارلىعى دا مەكتەپتەن العان ءبىلىمىمىز بەن تاربيەنىڭ ارقاسى. سول سەبەپتى دە ءوزىمىز وقىعان مەكتەپتىڭ وقۋشىلارىنىڭ سپورتپەن اينالىسۋىنا ۇلكەن مۇمكىندىك جاساۋدى ۇيعاردىق. ءبىز بۇل مەكتەپتى ءبىتىرىپ كەتكەنىمىزبەن ءقازىر ءبىزدىڭ پەرزەنتتەرىمىز، نەمەرەلەرىمىز وسىندا ءبىلىم الىپ جاتىر. كەلەشەكتە ءتۇرلى جىلداردا مەكتەپ بىتىرگەن تۇلەكتەر جينالىپ وزدەرى وقىعان مەكتەپتەرىنە وسىنداي الاڭشالار سالىپ، كومەك بەرىپ وتىرسا ەكەن دەگەن نيەتتەمىز، – دەيدى زاڭ عىلىمدارىنىڭ دوكتورى، پروفەسسور، ق ر جوعارعى سوتىنىڭ جانىنداعى عىلىمي-كونسۋلتاتيۆتىك كەڭەسىنىڭ مۇشەسى مۇقتارحان ۋتانوۆ.

– كوماندالىق ويىن تۇرلەرىن جاقسى كورەتىن اۋىل جاستارى، مەكتەپ وقۋشىلارى ءۇشىن بۇل تاماشا سىيلىق بولدى. ەندى سپورتپەن شىنىعامىن، شىڭدالامىن دەگەن جاستارعا الاڭشانىڭ ەسىگى ءاردايىم اشىق بولماق. ءبىز دە ءوز تاراپىمىزدان مەكتەپتەردە ءتۇرلى سپورتتىق ۇيىرمەلەردىڭ سانىن كوبەيتىپ، ساپاسىن ارتتىراتىن بولامىز. مەكتەپكە وسىنداي سىي جاساپ وتىرعان ۋتانوۆتار اۋلەتىنە ۇلكەن راحمەتىمىزدى ايتامىز، – دەيدى جەتىساي اۋدانىنىڭ ادامي الەۋەتتى دامىتۋ ءبولىمىنىڭ باسشىسى تۇرسىن مىرزالييەۆ.

سالتاناتتى اشىلۋ راسىمىنەن كەيىن ەل تاۋەلسىزدىگىنىڭ 30 جىلدىعى اياسىندا «وڭتۇستىك قازاقستان وبلىسىنىڭ قۇرمەتتى ازاماتى»، «ق ر قۇرمەتتى سپورت قايراتكەرى» ايدارحان وتەنۇلىن ەسكە الۋعا ارنالعان فۋتبولدان تۋرنير ءوتتى. ەرەكسەكتەر مەن جاستار اراسىندا ءوزارا مىقتىلار انىقتالاتىن تۋرنير جەڭىمپازدارى ۇيىمداستىرۋشىلاردىڭ قارجىلاي سىيلىقتارىمەن، ارنايى كۋبوكتارىمەن ماراپاتتالاتىن بولادى.