جەتىساي اۋدانىنىڭ ورتالىعىندا جەتىساي قالاسىنىڭ 55 جىلدىعى اياسىندا مەرەكەلىك ءىس-شارا ءوتتى، دەپ حابارلايدى Dalanews.kz.
جيىنعا ارنايى اۋدان اكىمى سەرىك مامىتوۆ قاتىسىپ، ايماقتاعى ۇزدىك شارۋالاردى ماراپاتتادى. «جەڭىس» الاڭىندا اۋداننىڭ اۋىل شارۋاشىلىعى تاۋار وندىرۋشىلەرى مەن كاسىپكەرلەرىنىڭ وندىرگەن ونىمدەرىنىڭ كورمە-جارمەڭكەسى ءوتتى. سونداي-اق، الاڭدا ۇلتتىق تاعامدار دايىندالىپ، اۋدان تۇرعىندارىنا ۇسىنىلدى. قالانىڭ 55 جىلدىعىنا وراي، 55 مەترلىك كاۋاپ پەن 55 سانتيمەترلىك سامسا دايىندالىپ، شاھار تۇرعىندارى مەن قوناقتارىنا تاراتىلدى.
سونىمەن قاتار، اۋداندا «JETISAI KITAPFest – 2024» كىتاپ كورمە-جارمەڭكەسى بولىپ ءوتتى. جارمەڭكەدە «QAZYNA»، «وتباسى حرەستوماتياسى»، «Olja Peak»، «MARFU book»، «MAZMUNDAMA»، «Qasym kitaphanasy»، «KitapAl»، «Steppe&world»، «Ziyat»، «KAZAKH CONTENT» سەكىلدى الماتى قالاسىنان شاقىرىلعان 10 باسپا 15 مىڭنان استام ءتۇرلى جانرلاردا جازىلعان كىتاپتاردى كوپشىلىك نازارىنا ۇسىندى. بۇدان بولەك، ۇلتتىق سپورتتى دارىپتەۋ جانە بۇقارالىق سپورتقا دەگەن جاستاردىڭ قىزىعۋشىلىعىن ارتتىرۋ ماقساتىندا ارقان تارتۋ، قول كۇرەسى، گىر تاسىن كوتەرۋ، ساداق اتۋ، قوشقار كوتەرۋ سىندى سپورت تۇرلەرىنەن جارىس ءوتتى.
- بۇدان وزگە، ورتالىق ساياباقتا جاسوسپىرىمدەر اراسىندا كىشى فۋتبولدان اۋداننىڭ اشىق بىرىنشىلىگى مەن «الىپتار سايىسى» ءوتتى. اۋداندا تۇڭعىش رەت وتكىزىلگەن بايراقتى باسەكەگە V دۇنيەجۇزىلىك كوشپەندىلەر ويىندارىنىڭ جەڭىمپازى ازامات ماقۇلبەكوۆ قوناق رەتىندە ارنايى قاتىستى.
