يسپانيالىق اگرو كومپانيانىڭ وكىلى فاۋيستينو كوررالبەلبەلدىڭ ايتۋىنشا، ءزايتۇن ەگۋگە جەتىسايدىڭ توپىراعى مەن كليماتى وتە قولايلى ەكەن. شەتەلدىك كومپانيا بۇل قورىتىندىعا زەرتتەۋ جۇمىستارىنىڭ ناتيجەسىندە كەلگەنىن ايتىپ وتىر.
«ءبىز وسىدان بىرنەشە اي بۇرىن جەتىساي اۋدانىنىڭ توپىراعىن ساراپتامادان وتكىزۋ ءۇشىن يسپانياعا جولداعان بولاتىنبىز. ناتيجەسىندە ءزايتۇن ەگۋگە ىڭعايلى دەگەن قورىتىندىعا قول جەتكىزىپ وتىرمىز: ەندىگى ماقساتىمىز – وسى اۋداننان ءزايتۇن باعىن ەگۋگە قولايلى جەر تاۋىپ، قوسىمشا ساراپتاما جۇمىستارىن وتكىزۋ. ول ءۇشىن بىزگە جەرگىلىكتى بيلىك مەملەكەت مەنشىگىندەگى جەر تەلىمىن تاۋىپ بەرۋگە كومەك قولىن سوزسا، جوسپارىمىزدى ىسكە اسىرۋعا نيەتتىمىز.العاشقىدا ءبىز 25 گەكتار جەرگە ەكسپەريمەنت رەتىندە ەگىپ، ەگەر تابىستى بولىپ جاتسا، ونىڭ كولەمىن جىل ساناپ ۇلعايتۋ جوسپارىمىزدا بار»،- دەيدى «پرومەتەي» كومپانياسىنىڭ وكىلى قانات قۇدايبەرگەن.
اۋدان اكىمى قوناقتارعا ءار جەردە ورنالاسقان 3 جەر تەلىمىنىڭ توپىراعىن ساراپتامادان وتكىزىپ كورۋگە كەڭەس بەردى. سونداي-اق، ەگەر جوبا تولىق ىسكە اسىپ جاتسا، اۋدانىمىزدان ءزايتۇندى قايتا وڭدەيتىن كاسىپورىن اشۋعا بولاتىنىن ەسكەرتتى.
«ءبىز سىزدەردىڭ بۇل ۇسىنىستارىڭىزدى قۋانا قولداۋعا دايىنبىز. اۋدانىمىزداعى ەگىستىك جەرلەردىڭ ءبارى دەرلىك سۋارمالى. ونىڭ ۇستىنە جەكە شارۋا قوجالىقتارىنىڭ يەلەگىندە. سوندىقتان ءبىز سىزدەرگە بۇعان دەيىن يگەرىلمەي جاتقان جەرلەردى دە ۇسىنىپ وتىرمىز»، - دەدى جامانتاي قاناي ۇلى.
ايتا كەتەيىك، ءزايتۇن اعاشى ەگىلگەننەن كەيىن ءۇش جىلدان سوڭ ءونىم بەرە باستايدى. ەگەر كۇتىپ-باپتاۋى دۇرىس بولسا، 150 جىلعا دەيىن ءونىم بەرۋگە قاۋقارلى ەكەن. شامامەن 1 گەكتارىنان 10 تونناعا جۋىق ءونىم الۋعا بولادى. ال ءزايتۇننىڭ ءبىر كەلىسى ەلىمىزدە 35 دوللاردىڭ شاماسىندا بولسا، ودان الىناتىن مايدىڭ ءبىر ءليترى 450 تەڭگەگە باعالانۋدا.
كاسىپكەرلەر ەگەر توپىراقتى زەرتتەۋ ناتيجەلەرى وڭ قورتىندى بەرسە، الداعى اقپان ايىندا كوشەتتەردى يسپانيادان اكەلىپ وتىرعىزۋعا ءازىر ەكەندىكتەرىن جەتكىزدى. ولار سونداي-اق، تامشىلاتىپ سۋارۋ ءادىسىن قولدانباق.
جەتىساي اۋدانى اكىمىنىڭ باسپا ءسوز قىزمەتى
سۋرەتتەردى تۇسىرگەن قۋانىش اۋەلبەكوۆ
