الماتى قالاسىنىڭ ماڭىنداعى اۋىلداردىڭ بىرىندە كوپبالالى وتباسى تۇرادى. باقىتتى جۇپتىڭ ءارقايسىسى التىننان قىمبات التى بىردەي قىزى بار. «قىزدىڭ نەسىبەسى - قۇدايدان» دەپ جاتادى عوي. بۇل وتباسىنىڭ ماتەريالدىق جاعدايى كول-كوسىر ەدى. ءبىراق ۇرپاق جالعاستىراتىن ۇلى بولماعاندىقتان، وتاعاسى قۋاتتىڭ كوڭىلىندە قاياۋ بار. الايدا ونىسىن سىرتقا بىلدىرمەيدى. التى قىزدى دۇنيەگە اكەلگەن جۇلدىزدىڭ جەتىنشى پەرزەنتكە اياعى اۋىر. قۋاتتىڭ بۇل بالادان ءۇمىتى زور ەدى. ەلدەن قالماي گەندەر-پاتي ۇيىمداستىرىپ، دوستارىن قوناققا شاقىرعان وتباسىدا ۇلكەن جاڭالىق بولدى. جاسىرىلعان شاردىڭ ىشىنەن كوك ءتۇستى جىلتىراقتار شاشىلعاندا، ۇل كۇتكەن اكەنىڭ قۋانىشىندا شەك بولمادى.
ايى-كۇنى جەتىپ جۇلدىز پەرزەنتحاناعا جاتادى. التى قىزبەن قوسا اكەلەرى قۋات تاعاتسىزدانا كۇتىپ ءجۇر. الايدا، تاعدىردىڭ جازعانى باسقاشا ەدى. جۇلدىز تاعى دا قىز تابادى. كۇتكەندەرى ورىندالماعاندىقتان اۋرە-سارساڭعا سالىنىپ، جۇلدىز دارىگەرلەردەن «ۇل بولۋى كەرەك ەدى» دەپ سۇراپ شىرىلداپ كەتەدى. دارىگەرلەر «ونداي-ونداي قاتەلىكتەر بولىپ تۇرادى» دەپ قانا جاۋاپ قايىرادى. جۇلدىزدىڭ پەرزەنتحانادان تاعى قىز الىپ شىقسا، كۇيەۋى قۋات ۇيگە كىرگىزبەي قويا ما دەگەن قورقىنىشى بار. نە ىستەرىن بىلمەي، امالى قۇرىعان انا پالاتاداعى ۇل تاپقان اۋىلداس كەلىنشەكپەن بالا اۋىستىرۋ تۋرالى كەلىسىمگە كەلەدى. اقشا ۇسىنعانىندا كونبەگەنىمەن، ارتىنان كوڭىلدى قوزعايتىن سوزدەرىن ايتىپ اقىرى جۇلدىز ونى كەلىستىرەدى.
وسى وقيعانىڭ ومىردە ورىن الۋى ابدەن مۇمكىن. الايدا، بۇل ءجاي عانا 2025 جىلدىڭ 6-ناۋرىزىنان باستاپ ەلىمىزدىڭ بارلىق كينوتەاترلارىندا شىعاتىن تولىقمەترلى ءفيلمنىڭ سيۋجەتى عانا. Dakeshi street، Taurus Asia Production جانە ZER cinema كومپانيالارى بىرلەسە وتىرىپ 2024 جىلدىڭ كوكتەمىندە وسىنداي تۋىندى ءتۇسىردى.
فيلمگە دانيار حاتيم، بۇحار مارات، انارا ءجۇنىسوۆا، اننا چاكيرتوۆا پروديۋسەرلىك ەتتى.
"بۇل فيلمدەگى وقيعانىڭ ماعان ەرەكشە ۇناعان تۇسى ونىڭ وزەكتىلىگى. شىنىمەندە 21-عاسىردا ءومىر ءسۇرىپ جاتساق تا، ءوز قىزدارىنا “ۇل” دەپ باستالاتىن ەسىم قوياتىن وتباسىلار بار. ونى ەجەلگى اتا-بابامىزدان قالعان ءداستۇر دەسەك تە، قازاقى ىرىم دەسەك تە جاڭا تۋعان نارەستەنىڭ تاعدىردىڭ بۇيرىعىنا نە قاتىسى بار؟ ەسەسىنە ونىڭ ءومىر بويى ءوزى قالامايتىن ەسىممەن عۇمىر كەشۋىنە تۋرا كەلەدى. فيلمدە وسى تاقىرىپتارعا تەرەڭىنەن توقتالىپ، وتباسىداعى قىز بالانىڭ ورنىن كورەرمەنگە ۇعىندىرۋعا تىرىستىق"، - دەدى باس پروديۋسەر دانيار حاتيم.
ال رەجيسسەر مەن سەناريي اۆتورلارىنىڭ ايتقىسى كەلگەن باستى ويى قۇراننىڭ مىنا ءبىر اياتتارىمەن تۇسپا-تۇس كەلەدى:
«كۇللى اسپان الەمى مەن جەردىڭ بار بيلىگى مەن يەلىگى ءبىر اللاعا ءتان! ول قالاعانىن جاراتادى. قالاعانىنا قىز سىيلايدى (بەرەدى)، قالاعانىنا ۇل سىيلايدى (بەرەدى). ياكي قالاعانىنا ۇل مەن قىزدى بىرگە بەرەدى.» («شۋرا» سۇرەسى 49 ايات)
ءسوزسىز «جەتى گۇل» ءفيلمى قازىرگى تاڭداعى وزەكتى تاقىرىپقا نەگىزدەلگەن. عاسىرلار بويى ىشتە ساقتالعان نازىك جاندىلار ءۇنىن قالىڭ كورەرمەنگە ەكران ارقىلى جەتكىزۋگە تىرىسقان ەرەكشە تۋىندى. ال بۇل فيلمدە پروديۋسەرلىك قىزمەت اتقارعان بۇحار مارات كينونىڭ نەگىزگى يدەيا اۆتورى:
«العاشىندا «جەتى گۇل» ءفيلمىنىڭ يدەياسى 2023 جىلى «تاپتىم-اۋ سەنى» تۋىندىسىنىڭ ورىنىنا ويلاپ تابىلعان ەدى. دەگەنمەن داريعا بادىقوۆا پرديۋسەرلىك ەتكەن اتالمىش فيلمگە باسقا وقيعا جەلىسى جازىلىپ، باستاپقى يدەيا بىزدە قالدى. سول ۇشىندە بۇل ءفيلمدى ءوزىمىز ءتۇسىرۋدى ءجون سانادىق. ياعني “جەتى گۇلدىڭ” سەنارييى باس-اياعى 2 ايدىڭ توڭىرەگىندە جازىلعانىمەن، ونىڭ يدەياسى 1 جىلدان اسا ءپىسىپ جەتىلدى دەۋگە بولادى. ءسىزدىڭ تۋىسىڭىز، دوسىڭىز، كەم دەگەندە ءبىر تانىسىڭىزدا ءفيلمنىڭ سيۋجەتىنە ارقاۋ بولعان وقيعاعا ۇقساس سيتۋاسيانىڭ بولۋى بەك مۇمكىن. كەيبىر جانۇيالار ءبىر پەرزەنتكە زار بولىپ جۇرگەندە، قۇداي بەرگەن قىزدارىنىڭ باعاسىنا جەتە الماي جۇرگەن اتا-انالار وكىنىشكە قاراي قوعامدا جەتەرلىك. وسى ءجايتتار «جەتى گۇل» ءفيلمىنىڭ يدەياسىنىڭ تۋۋىنا تۇرتكى بولدى».
دارحان كاريپوۆتىڭ بۇل فيلم رەجيسسەر رەتىندەگى العاشقى تۋىندىسى. ءوزىنىڭ دەبيۋتتىك كينوسى تۋرالى رەجيسسەردىڭ ايتار پىكىرى مىناداي:
«بۇل «جەتى گۇل» وتە نازىك فيلم. مۇنداعى ءاربىر جاننىڭ وزىندىك مىنەزى، بولمىسى، كورەرمەنگە ايتار ويى، بەرەر ناسيحاتى بار. كينوداعى بارلىق كەيىپكەردىڭ ىشكى الەمىندە ءوزى عانا تۇسىنەر مۇڭ مەن سىر جاتىر. سول ءۇشىن ءسىز ءفيلمدى كورۋ بارىسىندا جامان ادامدى بايقامايسىز. كەرىسىنشە بارلىعىن ءوز ىشىڭىزدە اقتاپ الاسىز».
ءتىپتى باس كەيىپكەر قۋاتتىڭ ۇل اڭسايمىن دەپ، ءوزىنىڭ التى قىزىنا قاتالدىق تانىتىپ كەتۋىنىڭ ءوزىن فيلم سوڭىندا تۇسىنۋگە تىرىساسىز. ليريكالىق كومەديا جانرىندا تۇسىرىلگەن بۇل فيلمدە وتباسى قۇندىلىعى، اكە تاربيەسى، قىز ءقادىرى سياقتى تاقىرىپتاردى قوزعاي وتىرا، قاراپايىم ادام ىشىندەگى سان الۋان ارپالىسقا تولى سەزىمدەردىڭ قاقتىعىسى كورسەتىلەدى. سول ۇشىندە بۇل تۋىندى ومىرشەڭ فيلمدەر قاتارىنا كىرەدى دەگەنگە سەنىم بار.
ەستەرىڭىزگە سالا كەتەيىك، «جەتى گۇل» ليريكالىق كومەدياسى 2025 جىلدىڭ 6-ناۋرىزىنان باستاپ كورەرمەنگە جول تارتادى.
ءتۇسىرىلىم توبى:
- رەجيسسەر - دارحان كاريپوۆ
- سەناريستەر - بۇحار مارات، دارحان كاريپوۆ، نۇرجان ارمان، باقىتجان قاحار
- قويۋشى وپەراتور - قانىبەك قالماتوۆ
- قويۋشى سۋرەتشى - كاميلا نۋگمانوۆا
- كومپوزيتور - اباي اقبايەۆ
- پروديۋسەرلەر - دانيار حاتيم (باس پروديۋسەر)، بۇحار مارات، انارا ءجۇنىسوۆا، اننا چاكيرتوۆا
باستى رولدەردە:
- جۇلدىز - ۇلبوسىن شالقاروۆا
- قۋات - ولجاس اباي
- شىنار - مادينا وسپان
- جاسۇلان - نۇرسۇلتان ۇسەنوۆ
