– ءتۇرلى ەتنوس جاستارىنىڭ مەملەكەتتىك ءتىل تۋرالى تۇششىمدى ويلارىن مەملەكەتتىك تىلدە تىڭداپ، ءوزىمدى شەكسىز باقىتتى سەزىنىپ وتىرمىن. ويتكەنى قازاقستان حالقى اسسامبلەياسى ءوز تاريحىندا تۇڭعىش رەت تەك مەملەكەتتىك تىلدە كونگرەسس وتكىزىپ، ماڭىزدى ماسەلە كوتەرىپ وتىر.
بۇرىن وسىنداي جيىندار ەكى اۋىز سوزبەن قازاقشا باستالىپ، ارى قاراي ورىسشا جالعاسقاندا قارىنىمىز اشىپ، ءتىلىمىزدىڭ مۇشكىل ءحالىن ويلاپ، ءوزىمىزدى شەكسىز باقىتسىز سەزىنەتىنبىز.
قىزىل يمپەريانىڭ كەزىندە قازاق جەرىندە قازاق مەكتەبىن اشۋ ۇلكەن ايقاي-شۋ بولاتىن. ءقازىر تاۋەلسىز ەل اتاندىق، الايدا يمپەريانىڭ قۇشاعىنان شىققان قازاقستان حالقى وتىز جىلدا وتىز اۋىز ءسوز بىلمەسە، وتە ۇيات.
اسىرەسە، قازاق ينتەلليگەنسياسى ءۇشىن كەشىرىلمەيتىن كۇنا. سىزدەر ايتىپ وتىرعان ماسەلەلەر پارلامەنتتە شەشىلۋگە ءتيىس، ءتىل تۋرالى دەربەس زاڭ قابىلدايتىن ۋاقىت جەتتى.
ءتىل ماسەلەسىن شەشۋدىڭ ءبىر تاماشا جولىن جاڭا نارگيزام ماحمۋدوۆا قارىنداسىمىز «ءتىلدى بالاباقشادان، مەكتەپتەن ۇيرەنىپ شىعۋى كەرەك» دەپ ايتىپ ءوتتى. شىنتۋايتىنا كەلگەندە كەز كەلگەن بالا بالاباقشادان باستاپ قازاق ءتىلىن ۇيرەنسە، سايراپ شىعادى.
رەسپۋبليكاداعى ءتىل ماسەلەسىن بالاباقشادان مەكتەپ بىتىرگەنگە دەيىن ون ءبىر جىلدا شەشۋگە بولادى. قازاق مەكتەپتەرى، ورىس مەكتەپتەرى، كارىس مەكتەپتەرى دەگەن ەمەس، مەملەكەتتىك مەكتەپ دەگەن بولۋى كەرەك.
قازاقشا سويلەي المايتىن قازاقتاردان، مەن ءۇشىن مەنىڭ انا تىلىمدە سايراپ تۇرعان وزگە ۇلت وكىلدەرى الدەقايدا جاقىن. كەزىندە ءبىز ۇلت جاناشارى گەرولد بەلگەردى قازاقشا سويلەگەنى ءۇشىن ەرەكشە قۇرمەتتەپ، باۋىرىمىزداي جاقسى كورەتىن ەدىك.
ول بىزگە قازاقتاردان دا جاقىن بولدى. قازاقشا بىلمەيتىن قازاقتارعا جاقىنداي المايتىنبىز. ويتكەنى ول – رۋحاني بولەك ادام. بۇگىن قازاقشا جەتىك سويلەپ وتىرعان سىزدەر دە ەندىگى جەردە مەنىڭ باۋىرىما اينالدىڭىزدار.
ءبىز ءقازىر دوستىق ۇيىندە باس قوسىپ وتىرمىز. ەگەر ءبىز گەرولد بەلگەر سياقتى ءوز ءتىلىمىزدى دە قۇرمەتتەپ، قازاق ءتىلىن دە قۇرمەتتەسەك، كوپ ۇزاماي كۇللى قازاقستان دوستىق ۇيىنە اينالادى. ءبىزدىڭ ماقساتىمىز وسى.
قازاق ەشكىمدى بولمەيدى، قازاقستاننىڭ پاتريوتىمىن دەگەن كەز كەلگەن ۇلت وكىلىن جاقسى كورەدى. قازاقتىڭ قۇشاعى دا، قازاقتىڭ جۇرەگى دە بايتاق دالاداي كەڭ. وعان ءبارى سيادى. سوندىقتان دا ۇلى دالانىڭ ۇلتارالىق ءتىلى ءبارىمىزدىڭ تىلىمىزگە، ءبىزدىڭ دوستىقتىڭ كەپىلىنە اينالسىن!
ەلۋباي سماعۇل، جازۋشى، كينودراماتۋرگ، ت.جۇرگەنوۆ اتىنداعى ونەر اكادەمياسىنىڭ پروفەسسورى.
