– Túrli etnos jastarynyń memlekettik til týraly tushymdy oilaryn memlekettik tilde tyńdap, ózimdi sheksiz baqytty sezinip otyrmyn. Óitkeni Qazaqstan halqy Assambleiasy óz tarihynda tuńǵysh ret tek memlekettik tilde kongress ótkizip, mańyzdy másele kóterip otyr.
Buryn osyndai jiyndar eki aýyz sózben qazaqsha bastalyp, ary qarai oryssha jalǵasqanda qarynymyz ashyp, tilimizdiń múshkil halin oilap, ózimizdi sheksiz baqytsyz sezinetinbiz.
Qyzyl imperiianyń kezinde qazaq jerinde qazaq mektebin ashý úlken aiqai-shý bolatyn. Qazir Táýelsiz el atandyq, alaida imperiianyń qushaǵynan shyqqan Qazaqstan halqy otyz jylda otyz aýyz sóz bilmese, óte uiat.
Ásirese, qazaq intelligentsiiasy úshin keshirilmeitin kúná. Sizder aityp otyrǵan máseleler Parlamentte sheshilýge tiis, Til týraly derbes zań qabyldaityn ýaqyt jetti.
Til máselesin sheshýdiń bir tamasha jolyn jańa Nargizam Mahmýdova qaryndasymyz «Tildi balabaqshadan, mektepten úirenip shyǵýy kerek» dep aityp ótti. Shyntýaityna kelgende kez kelgen bala balabaqshadan bastap qazaq tilin úirense, sairap shyǵady.
Respýblikadaǵy til máselesin balabaqshadan mektep bitirgenge deiin on bir jylda sheshýge bolady. Qazaq mektepteri, orys mektepteri, káris mektepteri degen emes, memlekettik mektep degen bolýy kerek.
Qazaqsha sóilei almaityn qazaqtardan, men úshin meniń ana tilimde sairap turǵan ózge ult ókilderi áldeqaida jaqyn. Kezinde biz ult janashary Gerold Belgerdi qazaqsha sóilegeni úshin erekshe qurmettep, baýyrymyzdai jaqsy kóretin edik.
Ol bizge qazaqtardan da jaqyn boldy. Qazaqsha bilmeitin qazaqtarǵa jaqyndai almaitynbyz. Óitkeni ol – rýhani bólek adam. Búgin qazaqsha jetik sóilep otyrǵan sizder de endigi jerde meniń baýyryma ainaldyńyzdar.
Biz qazir Dostyq úiinde bas qosyp otyrmyz. Eger biz Gerold Belger siiaqty óz tilimizdi de qurmettep, qazaq tilin de qurmettesek, kóp uzamai kúlli Qazaqstan Dostyq úiine ainalady. Bizdiń maqsatymyz osy.
Qazaq eshkimdi bólmeidi, Qazaqstannyń patriotymyn degen kez kelgen ult ókilin jaqsy kóredi. Qazaqtyń qushaǵy da, qazaqtyń júregi de baitaq daladai keń. Oǵan bári siiady. Sondyqtan da Uly Dalanyń ultaralyq tili bárimizdiń tilimizge, bizdiń dostyqtyń kepiline ainalsyn!
Elýbai SMAǴUL, jazýshy, kinodramatýrg, T.Júrgenov atyndaǵy Óner akademiiasynyń professory.
