جيىنعا وڭىردەگى اۋدان، قالاداعى جاستار رەسۋرستىق ورتالىقتارىنىڭ باسشىلارى، وبلىستىق قوعامدىق دامۋ باسقارماسى مەن جۇمىسپەن قامتۋ جانە الەۋمەتتىك باعدارلامالار باسقارماسىنىڭ جانە قارجىلىق ۇيىمداردىڭ وكىلدەرى قاتىستى.
تۇركىستان وبلىسى اكىمىنىڭ ورىنباسارى جاقسى ناتيجە كورسەتكەن جاستار ورتالىقتارىنىڭ باسشىلارىنا تاجىربيە ءبولىسۋدى ۇسىنىپ، بەلگىلەنگەن مەجەگە تولىق جەتپەگەن باسشىلارعا ۇيلەستىرۋ-ۇيىمداستىرۋ جۇمىستارىن كۇشەيتۋدى تاپسىردى.
– سىزدەرگە ۇلكەن مىندەت جۇكتەلگەن. ءارقايسىسىڭىز اۋدان، قالا جاستارىنا جاۋاپتىسىزدار. جاستاردى سۇيەمەلدەۋ، باعىتتاۋ، ءتۇسىندىرۋ جۇمىستارىن جۇرگىزۋ – سىزدەردىڭ مويىندارىڭىزدا.
ولاردى اۋىل شارۋاشىلىعىنان بولەك، باسقا دا تىڭ جوبالارعا، كاسىپتەرگە تارتىڭىزدار. «بيزنەس يدەيا» كونكۋرسىن ۇيىمداستىرىلىپ، 2،5% كولەمىندەگى جەڭىلدەتىلگەن نەسيە بويىنشا ءتۇسىندىرۋ جۇمىستارى ءتيىستى دەڭگەيدە جۇرگىزىلسىن.
قارجىلىق ۇيىمدارمەن بىرلەسىپ، جاستارعا كاسىپ اشۋ، نەسيە الۋ جولدارى تۋرالى وقىتۋ جۇمىستارىن جۇرگىزۋ كەرەك. بيىل كوللەدجدەردە زامان تالابىنا ساي، سۇرانىسقا يە 10 جاڭا ماماندىق اشىلادى. سول تۋرالى جاستاردى قۇلاعدار ەتىڭىزدەر.
مەملەكەتتىك مەكتەپتەردەن بولەك، جەكەمەنشىك مەكتەپتەرمەن دە ماماندىق تاڭداۋ بويىنشا پروفوريەنتاسيالىق جۇمىستار جۇرگىزۋ قاجەت. جاقسى كورسەتكىش كورسەتكەن اۋداندار پايدالانعان تاسىلدەرىڭىزدى باسقا اۋداندارداعى ارىپتەستەرىڭىزگە ۇيرەتىڭىزدەر.
جاستار اراسىندا قىلمىستى ازايتۋ باعىتىنداعى جۇمىستار كۇشەيتىلسىن. وسى مەملەكەتتىك باعدارلامالار ەسەبىنەن جاستار اراسىنداعى پروبلەمالاردىڭ ءبىرقاتارى شەشىلۋى ءتيىس، – دەدى بەيسەن تاجىبايەۆ.
وبلىستىق جاستار رەسۋرستىق ورتالىعىنىڭ باسشىسى ەرنار بەكتايەۆتىڭ بايانداۋىنشا، وتكەن جىلى جۇمىس ورىندارىن سۋبسيديالاۋدى ۇيىمداستىرۋ ارقىلى كاسىپكەرلىكتى قولداۋ، ۋاقىتشا جۇمىس ورىندار سيپاتىنداعى قامتۋ شارالارىنا 19 203 جاس قاتىستى. ونىڭ ىشىندە، جاستار پراكتيكاسىمەن 9007 ادام جولدانسا، تۇراقتى جۇمىسقا 23407، قوعامدىق جۇمىسقا 6350، الەۋمەتتىك جۇمىس ورىندارىنا 1716، العاشقى جۇمىس ورنىنا 2130 ازامات ورنالاستى.
مەملەكەتتىك گرانتقا 702 ازامات يە بولدى. «باستاۋ بيزنەس» جوباسى اياسىندا كاسىپكەرلىك نەگىزدەرگە وقۋعا – 11740، enbek.kz پلاتفورماسىندا ونلاين وقىتۋعا – 1808، قىسقا مەرزىمدىك كاسىپتىك وقىتۋعا 196 ازامات جولداندى.
جيىن بارىسىندا ءار اۋدان، قالاداعى جاستار رەسۋرستىق ورتالىقتارىنىڭ باسشىلارى بيىل ۇيىمداستىرىلاتىن اۋقىمدى ءىس-شارالار مەن جوبالاردى تانىستىردى. جوبالاردى ۇيىمداستىرۋدا وتباسىلىق جانە ۇلتتىق قۇندىلىقتاردى دارىپتەۋگە، ەكولوگيالىق مادەنيەتتى قالىپتاستىرۋعا، جاستاردىڭ كوشباسشىلىق قابىلەتىن ارتتىرۋعا دەن قويىلعان.
ماسەلەن، اۋداندىق دەڭگەيدە ۇلتتىق ويىنداردى جاڭعىرتۋ ماقساتىندا «مەرگەندەر» سايىسىن، ەكولوگيالىق مادەنيەتتى قالىپتاستىرۋعا باعىتتالعان «پلوگگينگ» تازالىق ءىس-شاراسىن، وتباسىلىق قۇندىلىقتاردى دارىپتەۋ ماقساتىندا «ۇلاعاتتى انا – ۇلت مەرەيى» انالار مەن قىزدار فورۋمىن، ءبىلىمدى ورتا قالىپتاستىرۋدى كوزدەيتىن «جاستار – بيزنەستە»، «ءار كۇن – جاڭا مۇمكىندىك» اتتى سەمينار-ترەنينگتەر وتكىزۋ جوسپارلانۋدا.
سونىمەن قاتار وبلىستىق دەڭگەيدە اسكەري-پاتريوتتىق «ءبىز جاۋىنگەر» جوباسى، «Al-Farabi» ينتەللەكتۋالدى شوۋى سەكىلدى جاڭاشىل جانە جاستار اراسىندا سۇرانىسقا يە جەلىلىك جوبالار ۇيىمداستىرىلادى. بۇدان بولەك، ونەردى شىڭداۋعا باعىتتالعان «تۇركى ەلدەرىنىڭ تالانتتى جاستارى» حالىقارالىق تالانتتى جاستار تەلەجوباسى قولعا الىنباق.
جوبالارمەن ءجىتى تانىسىپ شىققان وبلىس اكىمىنىڭ ورىنباسارى ءىس-شارالاردى ۇيىمداستىرۋدا وتباسىلىق قۇندىلىقتاردى ناسيحاتتاۋعا باسىمدىق بەرۋ كەرەك ەكەنىن ءتۇرتىپ، لۋدومانيا، سۋيسيد سەكىلدى قازىرگى زامان دەرتتەرىنە قارسى شارالاردى قولعا الۋدى، قاجەتسىز جوبالاردى قىسقارۋدى ۇسىندى.
ايتا كەتەيىك، بۇگىنگى تاڭدا تۇركىستان وبلىسىنداعى حالىق سانى 2،1 ميلليوندى قۇراسا، سونىڭ ىشىندەگى 14-35 جاس ارالىعىنداعى جاستار سانى – 654 مىڭنان اسادى. بۇل – ءوڭىر حالقىنىڭ 30 پايىزى.
