پرەسس-تۋرعا تۇركىستان وبلىسى اكىمىنىڭ ورىنباسارى ۇلان تاجىبايەۆ، تۇركىستان وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى قايرات ابدۋالييەۆ، تۇركىستان قالاسىنىڭ اكىمى نۇربول تۇراشبەكوۆ پەن قالا اقساقالدارى قاتىستى.
«جاسىل بەلدەۋ» ايماعىن العاشىندا 7 700 گەكتارعا قۇرۋ جوسپارلانسا، ءقازىر ول مەجە 13 629 گەكتارعا جەتىپ، اتالعان ايماقتا كوشەتتەر كۇتىپ-باپتالۋدا. پرەسس تۋر بارىسىندا قالا تۇرعىندارىنا شاھار اينالاسىنداعى جاسىل ايماق پەن بولاشاق دەمالىس ورىندارىنىڭ سىزباسى تانىستىرىلدى.
بۇگىندە تۇركىستان قالاسىنىڭ ەكولوگيالىق جاعدايىن جاقسارتۋ ماقساتىندا قالا اۋماعىندا ساياباقتار مەن اللەيالاردىڭ كولەمى ارتىپ، 495 گەكتارعا جەتكەن. ارىق-اتىزدار قالپىنا كەلتىرىلىپ، جاسىل جەلەك كوپتەپ ەگىلۋدە. وعان قوسا قالا اۋماعىندا كوگالداندىرۋدىڭ جاڭا تەحنولوگيالارىن قولدانۋ ناتيجەسىندە كوشەتتەردىڭ ونىمدىلىگى ارتقان.
اتالعان جۇمىستاردىڭ ناتيجەسىندە، قازىرگى تاڭدا «قازگيدرومەت» مەكەمەسىنىڭ مالىمەتىنە سايكەس، تۇركىستان قالاسىندا اتموسفەرالىق اۋانىڭ لاستانۋى 65%-عا تومەندەگەن.
ارنايى شارا بارىسىندا قالا ىشىندەگى جەلىلىك ساياباقتاردان بولەك، شويتوبە پودستانسياسى مەن كەنتاۋ تاس جولى بويىنداعى «جاسىل بەلدەۋ» ايماعىنداعى كوشەتتەردىڭ ونىمدىلىگى كورسەتىلدى. سونىمەن قاتار، پرەسس تۋر اياسىندا تۇرعىندار مەن جۋرناليستەر جۋىردا تولىق پايدالانۋعا بەرىلەتىن «شاعا» جاعاجاي سۋ ايدىنى مەن «ەسكەك ەسۋ» كانالىمەن تانىستى.
