قازاقستاندا ەكٸمدەرگە ٶڭٸرلەردەگٸ ەلەۋمەتتٸك مەسەلەلەردٸ شەشۋگە كٶمەك كٶرسەتۋ ٷشٸن جاساندى ينتەللەكت (جي) تەحنولوگيياسىن ەنگٸزۋ جوسپارلانىپ جاتىر, دەپ حابارلايدى Dalanews.kz.
Informburo.kz مەلٸمەتٸنشە, بۇل باستاما “وتباسىنىڭ تسيفرلىق كارتاسى” جوباسى اياسىندا جٷزەگە اسىرىلماق.
ەڭبەك جەنە حالىقتى ەلەۋمەتتٸك قورعاۋ مينيسترٸ سۆەتلانا جاقىپوۆانىڭ ايتۋىنشا, بۇل باعدارلاماعا قازٸردٸڭ ٶزٸندە 6 ميلليوننان استام وتباسىنىڭ دەرەكتەرٸ ەنگٸزٸلگەن.
“ازاماتتاردىڭ ٶتٸنٸشتەرٸ مەن اقپاراتتارى اۋقىمدى دەرەكتەر بازاسىنا بٸرٸكتٸرٸلەدٸ. وسى دەرەكتەر نەگٸزٸندە جاساندى ينتەللەكت ٶڭٸرلەردەگٸ ەلەۋمەتتٸك مەسەلەلەر بويىنشا تالداۋ جاساپ, شەشۋ جولدارىن ۇسىنا الادى”, – دەلٸنگەن حابارلامادا.
ٶز كەزەگٸندە پرەمەر-مينيستر ولجاس بەكتەنوۆ ەكٸمدەرگە جي قولدانۋ جٶنٸندە ۇسىنىستار بەردٸ.
“ٶزەكتٸ اقپاراتتاردى اپتا سايىن اۆتوماتتى تٷردە جٸبەرٸپ وتىرۋ قاجەت. ەر ەكٸم جۇمىس ورنىندا وتىرىپ, ٶز ٶڭٸرٸندەگٸ مەسەلەلەردٸ كٶرٸپ, تالداي الۋى تيٸس. بۇل جي-دٸڭ ناقتى پايداسى – قولمەن جاسالعان تالداۋ كٶپ ۋاقىت پەن رەسۋرس تالاپ ەتەدٸ, ال جي ونى جىلدام ورىندايدى. ونى “ينتەللەكت” دەپ اتايدى, بۇل دا “ادام” سەكٸلدٸ, تەك جىلدام جۇمىس ٸستەيدٸ”, – دەپ اتاپ ٶتتٸ بەكتەنوۆ.
ايتا كەتەيٸك, بيىل اقپان ايىنىڭ باسىندا ٷكٸمەتتٸڭ كەڭەيتٸلگەن وتىرىسىندا پرەزيدەنت قاسىم-جومارت توقاەۆ قازاقستاندا جي دامىتۋ تۇجىرىمداماسىن جٷزەگە اسىرۋدى تاپسىرعان بولاتىن.
شٸلدە ايىندا قازاقستان ٷكٸمەتٸ جاساندى ينتەللەكت تەحنولوگيياسىن ەكونوميكانىڭ تٷرلٸ سالالارىنا ەنگٸزۋ جٶنٸندە ستراتەگييالىق قۇجات قابىلدادى. ساراپشىلاردىڭ ايتۋىنشا, جي قولدانۋ 2030 جىلعا قاراي جاھاندىق جٸٶ-دٸ 14%-عا ارتتىرۋعا مٷمكٸندٸك بەرەدٸ.
سونىمەن قاتار ٷكٸمەت جي-دٸ ەنگٸزۋدٸڭ باسىم سەكتورلارىن انىقتادى. ولار:
• مەملەكەتتٸك باسقارۋ;
• مۇناي-گاز, تاۋ-كەن, ەنەرگەتيكا, كٶلٸك جەنە لوگيستيكا سالالارىنداعى تابيعي مونوپولييا سۋبەكتٸلەرٸ;
• سۋ رەسۋرستارىن باسقارۋ جەنە اۋىل شارۋاشىلىعى.
