ستارتاپتار، سايتتار، ءموبيلدى قوسىمشالار، ۇستەل ويىندارى - جاس ينجەنەرلەردىڭ ويلاپ تاپقان جوبالارىنىڭ ايتۋلى بولىگى عانا. سونىمەن قاتار زياتكەرلەر ماتەماتيكا، بيولوگيا، تىلدەر، تاريح، فيزيكا سالاسىندا عىلىمي زەرتتەۋلەر جۇرگىزۋدە .
ون ەكىنشى سىنىپ وقۋشىسى تەمىرلان كۋماروۆ دومبىرادا ۇيرەنۋگە ارنالعان ساندىق پلاتفورمانى ازىرلەدى. ەندى سمارتفون ارقىلى فورتەپيانودا، گيتارادا عانا ەمەس، قازاق حالقىنىڭ كيەلى اسپابىندا دا ءبىلىم الۋعا مۇمكىندىك تۋادى. دانيال سۇلتانوۆ كوز اۋرۋلارىن تانۋعا ارنالعان جاڭا ML جۇيەسىن ۇسىنسا، 10-سىنىپ وقۋشىلارى ياسمينا يسرايلوۆا مەن داۋلەت كالەل قازىلار القاسىنا ينفورماتيكا، ماتەماتيكا، بيولوگيا قيىلىسىندا ازىرلەنگەن STEM جوباسىن ۇسىندى. اۆتوماتتاندىرىلعان يپپوتەراپيا قۇرىلعىسى اتقا ءمىنۋدى يميتاسيالاپ تىرەك-قيمىل اپپاراتى اۋرۋلارى بار ءتۇرلى جاستاعى ادامداردىڭ وڭالتۋىنا ۇلكەن سەپتىگىن تيگىزەدى.
وڭتۇستىك استانانىڭ جەتەكشى جوعارى وقۋ ورىندارىنىڭ عالىمدارىنان قۇرالعان بەدەلدى قازىلار القاسى وقۋشىلاردىڭ ازىرلەمەلەرگە تالدامالىق كوزقاراسىن، قاتىسۋشىلاردىڭ زەرتتەۋ داعدىلارىن اتاپ ءوتتى.
عىلىمي جوبالار بايقاۋى جاس ونەرتاپقىشتار ءۇشىن وزدەرىنىڭ ينجەنەرلىك يدەيالارىن ناقتى پروتوتيپتەرگە اينالدىرۋدىڭ باستاپقى الاڭى بولىپ تابىلادى.
– NIS وقۋشىلارىنىڭ ءوز ازىرلەمەلەرىندە حالىقتىڭ رۋحاني قۇندىلىقتارىنا، داستۇرلەرىنە جۇگىنەتىنى قۋانتادى. "كوكپار" ۇلتتىق ويىنىن سيفرلاندىرۋ بويىنشا وقۋشىلار قىزىقتى جوبانى ۇسىندى، وندا ويىنداردى ءبىر ۋاقىتتا مىڭداعان كورەرمەن تاماشالاي الادى. سونداي - اق، وقۋشىلار "7" سانىنىڭ قاسيەتتى ءمانىن جانە ينستيتۋتتىڭ حالىق تاريحىنداعى ءرولىن زەرتتەپ، گەنەتيكالىق كودقا تالداۋ جاساعان "جەتى اتا ينستيتۋتتىڭ بيولوگيالىق دالەلدەمەسىى" اتتى جاقسى جوبا بولدى، – دەپ اتاپ ءوتتى ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ قازىلار القاسىنىڭ مۇشەسى تالعات رامازانوۆ.
