ءازىمحان يسابەك 1996 جىلى شىم شاھاردا دۇنيەگە كەلگەن. جاس عالىم، ءارى زەرتتەۋشى. ابايتانۋشى، عالىم مەكەمتاس مىرزاحمەت ۇلى جانە اقجول قالشابەك سەكىلدى پروفەسسورلاردىڭ شاكىرتى. بۇگىندە ول م.اۋەزوۆ اتىنداعى وقمۋ-دا اشىلعان «مۇحتارتانۋ» عىلىمي ورتالىعىندا عىلىمي مامان بولىپ جۇمىس جاسايدى.
– اباي شىعارمالارىنىڭ ءالى دە اشىلماعان قىرلارى بار. بولاشاقتا مۇحتار اۋەزوۆتىڭ ءوزى ايتقانداي اشا الماي كەتكەن قىرى مەن سىرىن اشقىم كەلەدى. ماسەلەن، ابايدىڭ بۇكىل شىعارمالارىن مۇرسەيىت بىكى ۇلى ەسىمدى قولجازباگەر كوشىرگەن. الماتى قالاسىنداعى اۋەزوۆتىڭ جەكە ارحيۆىندە ساقتالعان سول قولجازبانى قولعا ءتۇسىرىپ ءبىز قازاق ادەبيەتىندە ابايدىڭ "كيتاب تاسديق" تۋىندىسىنىڭ ترانسكريپسياسىن جاساپ شىقتىق. بۇل شىعارما - بۇكىل تۇركى حالقىنا ورتاق شىعارما، ەڭبەك قازاق ادەبيەتىندە تۇڭعىش رەت جاسالىپ وتىر. ءدال وسى ابايدىڭ ءبىر عانا شىعارماسىنان 400-گە جۋىق اراب-پارسى تۇرىك تىلدەرىنەن تۇراتىن سوزدىگىن جاساپ شىقتىق. ەندىگى ماقسات كىتاپتى شعارىپ، وقىرماندارعا ۇسىنۋ بولىپ تۇر، – دەيدى ءازىمحان.
سونىمەن قاتار، ءازىمحان جاقىندا وتكەن «اۋەزوۆ وقۋلارى – 17: الەمدىك كەڭىستىكتەگى عىلىم مەن رۋحانياتتىڭ جاڭا سەرپىلىستەرى» اتتى حالىقارالىق كونفەرەنسياسىندا «مەكەمتاس مىرزاحمەت ۇلى جانە مۇحتارتانۋ ماسەلەلەرى» تاقىرىپتارىندا بايانداما جاسادى. «جاڭا جاھاندىق احۋالدا قازاقستاننىڭ دامۋىنداعى جاستاردىڭ ۇلەسى» اتتى رەسپۋبليكالىق عىلىمي كونفەرەنسياسىندا 1-ورىنمەن جانە 2017 جىلى «الاش» قوزعالىسىنىڭ قۇرىلعانىنا 100 جىل تولۋىنا وراي وتكىزىلگەن «ازاتتىقتى اڭساعان – ارىستارىم ارداقتى!» اتتى شىعارماشىلىق بايقاۋىندا 1-ورىندى يەلەنگەن.
ودان وزگە ءوز زەرتتەۋلەرىن «ماعجاننىڭ ءبىر كەم دۇنيەسى»، «باۋىرجاننىڭ باتاسى»، «تۇنگى عيبادات»، «ءومىردىڭ وزىنەن ورىلگەن جىر»، «ويلى ادامعا قىزىق جوق بۇل جالعاندا»، «اباي نەگە ۇلى؟» سىندى ماقالالارىندا ۇسىنىپ ءجۇر.
