الدىن-الا انىقتالعان دەرەك بويىنشا، ناۋقاستار قالاداعى «يۋجنىي» ساۋدا نۇكتەسىنەن بالمۇزداق ساتىپ الىپ جەگەن. ولاردىڭ العاشقى لەگى شىمكەنت قالالىق جۇقپالى اۋرۋلار اۋرۋحاناسىنا 29-30 ناۋرىز كۇندەرى جەتكىزىلگەن. ناۋقاستار بىرنەشە رەت توقتاماي قۇسۋ مەن ءىش وتۋگە شاعىمدانعان. بۇگىنگى ۋاقىتتا ناۋقاستاردىڭ 38ء-ى ۇيلەرىنە جىبەرىلسە، قالعاندارىنا ءتيىستى ەم-دوم كورسەتىلىپ جاتىر.
ورىن العان جاعدايعا بايلانىستى وبلىس اكىمىنىڭ تاپسىرماسىمەن ارنايى جۇمىس توبى قۇرىلىپ، قىزمەتتىك تەكسەرۋ شارالارى باستالدى. ناۋقاستاردىڭ حال-احۋالى وبلىستىق دەنساۋلىق ساقتاۋ باسقارماسىنىڭ ءجىتى قاداعالاۋىنا الىندى. وبلىس اكىمى ناۋقاستاردىڭ تەز ارادا ساۋىعىپ كەتۋىنە بارلىق جاعدايلاردى جاساۋ كەرەكتىگىن ەسكەرتىپ، جاۋاپتى باسقارماعا قوسىمشا دارىگەر مامانداردى تارتۋعا تاپسىرما بەردى.
– بارلىق ناۋقاستاردىڭ جاعدايىمەن تانىسىپ شىقتىم. بۇگىنگى كۇنگە ولاردىڭ جاعدايى تۇراقتى، بارلىق ءتيىستى ەم-دوم كورسەتىلۋدە. اۋرۋحانادا دارى-دارمەك پەن توسەك ورىندارى جەتكىلىكتى. ەڭ باستىسى – ناۋقاستاردىڭ تەز جازىلىپ كەتۋىنە بارلىق جاعداي جاساۋىمىز قاجەت. وسى رەتتە مەن شىمكەنت قالالىق جۇقپالى اۋرۋلار اۋرۋحاناسىنداعى جۇمىس كەستەسىن كۇشەيتۋدى تاپسىرامىن، – دەدى جانسەيىت قانسەيىت ۇلى.
شتاب وتىرىسىندا ورىن العان وقيعانىڭ سەبەپ-سالدارى تالقىلاندى. مامانداردىڭ ايتۋىنشا، ءجىتى ىشەك ينفەكسيا سانيتارلىق ەپيدەميولوگيالىق تالاپتاردىڭ ساقتالماۋىنان ورىن العان. قازىرگى تاڭدا قوسىمشا ساراپتاما جۇمىستارى جۇرگىزىلۋدە. ال مۇنداي دەرتكە شالدىققاندار شۇعىل جاسالعان ەمەننەن سوڭ ساۋىعىپ، وتباسىلارىنا ورالۋدا.
اتالعان وقيعاعا بايلانىستى ءوڭىر باسشىسى وبلىستىڭ مەملەكەتتىك سانيتارلىق-ەپيدەميولوگيالىق قاداعالاۋ دەپارتامەنتىنىڭ جۇمىسىن سىنعا الدى. جالپى قوعامدىق تاماقتاندىرۋ ورىندارى تۇرعىندارعا قىزمەت كورسەتۋدە سانيتارلىق نورمالاردى قاتاڭ ساقتاۋعا مىندەتتى. ەڭ ءبىرىنشى كەزەكتە حالىقتىڭ دەنساۋلىعى قىمبات ەكەنىن ەسكەرىپ، جاۋاپتى دەپارتامەنت تاماقتاندىرۋ ورىندارىنا ءتيىستى قاداعالاۋ جۇرگىزۋى قاجەت.
ال وقيعاعا وراي وقو ىشكى ىستەر دەپارتامەنتى قىلمىستىق ءىس قوزعاپ، سوتقا دەيىنگى تەرگەۋ جۇمىستارىمەن اينالىسۋدا.
وقو اكىمىنىڭ باسپا ءسوز قىزمەتى
