جاڭعىرتىلعان «بوگاتىر» كومىر كەنىشى ءوندىرىس كولەمىن ۇلعاتادى

Dalanews 15 قىر. 2021 03:02 458

ەلىمىزدە ەلەكتر قۋاتىن وندىرۋدە نەگىزىگى شيكىزات كومىر ەكەنى ايتپاساق تا تۇسىنىكتى. ءقازىر ەلىمىزدە بارلىق وڭرىندەگى جەس-تەردىڭ باسىم بولىگى كومىرمەن ىستەيدى. سوندىقتان «جاسىل ەنەرگيا» جاقىن كۇندەردىڭ قازاقستاننىڭ ەنەرگەتيكا نارىعىنان كومىردى ىعىستىرىپ تاستايدى دەپ ايتۋعا ءالى ەرتە. ءيا، ءقازىر بيلىك ورىندارى «جاسىل ەنەرگەتيكانى» دامىتۋعا ايرىقشا كوڭىل ءبولىپ وتىر. ءبىراق، ول الداعى ونداعان جىلدا كومىردىڭ ورنىن الماستىرا المايدى. سول سەبەپتى ەلىمىزدە كومىر ءوندىرۋ، ونى تۇتىنۋ ماڭىزىن جويمايدى.

ەلىمىزدەگى ەڭ ءىرى «بوگاتىر» كومىر كەنىشىندە جۇزەگە اسىپ جاتقان جاڭعىرتۋ جۇمىستارى ءبىزدىڭ ءسوزىمىزدى قۋاتتاي تۇسەدى. بۇل رەتتە الىپ كەن ورىنى كومىردى ءوندىرۋ مەن تاسىمالداۋدىڭ زامان تالابىنا ساي تەحنولوگيالارىن ەڭگىزىپ، جۇمىستارىن جەتىلدىرۋدى كوزدەپ وتىر.

ەكىباستۇز قالاسىندا ورنالاسقان «بوگاتىر كومىر» سەرىكتەستىگى ءقازىر جىل سايىن 42 ملن توننا كومىر ءوندىرىپ كەلەدى. ال جاڭعىرتۋ جۇمىستان كەيىن كومىر ءوندىرۋدىڭ كولەمى ءبىر جىلدا 50 ملن تونناعا دەيىن جوعارلايتىن بولادى. مامانداردىڭ ايتۋىنشا، «بوگاتىر» رازرەزىندە جۇزەگە اسىرىلىپ جاتقان «كومىر ءوندىرۋدىڭ سيكلدىق-اعىندىق تەحنولوگياسى» جوباسى ەڭبەك ونىمدىلىگىن ارتتىرىپ، كومىر ءوندىرىسىنىڭ وزىندىك قۇنىن تومەندەتۋگە سەپتىگىن تيگىزەتىنىن ايتا كەتۋىمىز كەرەك.

قازىرگى تاڭدا الىپ كەنىشتەگى «بوگاتىر» مەن «سيەۆەرنىي» كەن ورىندارىندا كومىر اشىق تاسىلمەن وندىرىلەتىنى بەلگىلى. بىرىنشە كەنىشتە جىلىنا 32 ملن توننا كومىر وندىرىلسە، ەكىنشىسىندە 10 ملن توننا كومىر قازىپ الىنادى.

«بوگاتىر» كومىر كەنىشىندە 2019 جىلدان باستاپ قولعا الىنعان جاڭعىرتۋ جۇمىستارى كەزىندە جەرۇستىندەگى تەمىر جول ىلمەكتەرى، كىرمە اۆتوجولدار، كومىر تيەۋ پۋنكتتەرىنىڭ قۇرىلىس-مونتاجداۋ جۇمىستارى جۇرگىزىلسە، 2020 جىلدىڭ قىركۇيەگىنەن باستاپ رازرەز ىشىندە ۋاتۋ-تيەۋ پۋنكتتەرىن، كونۆەيەرلەردى، ورتاشالاندىرۋ قويمالارىن سالۋ جۇمىستار قارقان العان بولاتىن.

سالا باسشىلارىنىڭ ايتۋىنشا، قازىرگى تاڭدا «بوگاتىر كومىرگە» 104 ملن ەۋرونىڭ جابدىقاتارى تولىقتاي جەتكىزىلگەن. بۇل جالپى جوسپارلانعان كولەمنىڭ 98،8% قۇرايدى.

«بوگاتىر كومىر» ج ش س ۇلەسىنە ەكىباستۇز كومىر باسسەينىندە وندىرىلەتىن بارلىق كومىردىڭ 60 پايىزى قۇراسا، ەلىمىزدە وندىرىلەتىن كومىردىڭ جالپى كولەمىنىڭ 40 پايىزى وسى كەنىشكە تيەسىلى.

ۇسىنىلعان
سوڭعى جاڭالىقتار