جانداربەك بەكشيننىڭ ايتۋىنشا، وتكەن تاۋلىكتە الماتىدا ءقاۋىپتى ىندەتتى جۇقتىرعان 638 جاڭا جاعداي تىركەلدى. بۇل – بيىلعى جازداعى انتيرەكورد. ماۋسىم ايىنىڭ سوڭعى كۇندەرى اۋرۋعا شالدىققان 600 جاعداي انىقتالدى. بۇل كوروناۆيرۋستىڭ «ءۇندى» شتاممىنىڭ تارالۋىمەن بايلانىستى.
– جىل باسىنان بەرى قالادا كوروناۆيرۋس ينفەكسياسىن جۇقتىرعان 60 مىڭنان استام جاعداي تىركەلدى. شىلدە ايىنىڭ باسىنان بەرى 4 610 ادام ءقاۋىپتى ىندەتكە شالدىققان. ال وتكەن اپتادا 3 085 جاعداي تىركەلدى. الدىڭعى اپتامەن سالىستىرعاندا 1،4 ەسە ارتىق، – دەدى الماتىنىڭ باس سانيتارلىق دارىگەرى.
جانداربەك بەكشين جاڭا «دەلتا» نۇسقاسى اسا جۇقپالى جانە ونىڭ كلينيكالىق سيپاتى اۋىر ەكەنىن ايتتى.
– وزدەرىڭىز بىلەتىندەي كەزەكتى زەرتتەۋلەردە «دەلتا» كوروناۆيرۋسىنىڭ اينالىمداعى نۇسقالارى 78-80% باسىم دارەجەدە، «الفا» («بريتاندىق») 16%، سOVID-19 («ۋحان») 3% قۇرايدى.
وتكەن 7 كۇندە «سيمپتومدىق» ناۋقاستاردىڭ ۇلەس سالماعى 2 ەسەگە، ياعني 53%-دان 88%-عا دەيىن وسكەن. «سيمپتومداردىڭ ۇلەسىنىڭ ارتۋى اۋىر كلينيكالىق كورىنىستەردى تۋدىراتىن «دەلتا» پاتوگەندىك نۇسقاسىنىڭ تارالۋىمەن بايلانىستى.
جانداربەك بەكشين الماتىداعى ەپيدەميولوگيالىق احۋالعا جۇرگىزىلگەن مونيتورينگ قورىتىندىلارى تۋرالى ايتتى. تالداۋ ناتيجەسىندە، سوڭعى ەكى اپتادا بالالار مەن جاستار ۆيرۋس جۇقتىرعان. 14 جاسقا دەيىنگى بالالاردىڭ 13%-ى ينفەكسيا جۇقتىرۋعا بەيىم.
– ەڭ ۇلكەن الاڭداۋشىلىق 20 جاستان 40 جاسقا دەيىنگى ازاماتتار اراسىندا سىرقاتتانۋشىلىقتىڭ ءوسۋى 3،4%-عا ۇلعايىپ، وسى جىلى ەڭ جوعارى دەڭگەيگە جەتتى (39%). سونداي-اق، 40 پەن 59 جاس ارالىعىندا 25% دەڭگەيدى قۇرايدى. ياعني ءاربىر 4ء-شى جۇقتىرعان ادام، – دەدى جانداربەك بەكشين.
وسى دەرەكتەرمەن قاتار، 60 جاستان اسقان ادامدار اراسىندا جۇقتىرۋدىڭ ۇلەس سالماعى ولاردىڭ يممۋنداۋ جانە ەكپە الۋ ناتيجەسىندە 1،6%-عا تومەندەگەنى بايقالادى.
الماتىنىڭ باس سانيتارلىق دارىگەرى كوروناۆيرۋستىڭ جاڭا شتاممىنىڭ تەز تارالاتىنىن ءارى قالا تۇرعىندارىنىڭ دەنساۋلىعى ءۇشىن ءقاۋىپتى ەكەنىن ەسكەرتتى. جانداربەك بەكشين بەتپەردە رەجيمىن ساقتاۋدى ءارى ونى ءجيى اۋىستىرۋ قاجەت ەكەندىگىن ەسكەرتتى.
