"جانارماي جوق...". قۇلسارىدا جوعالعان جانداردىڭ جاقىندارى شەنەۋنىكتەردىڭ جۇمىسىنا شاعىمداندى

قاراكوز امانتاي 10 ءساۋ. 2024 13:06 2425

اتىراۋ وبلىسى قۇلسارى قالاسىندا سۋ باسقان باسپاناسىن قاراۋعا كەتكەن اكەسى مەن بالاسى ءالى كۇنگە دەيىن تابىلماي جاتىر. ولار توتەنشە جاعداي ورىن العان كۇنى تاركتورگە ءمىنىپ، ءۇي جاعىن قاراپ كەلمەك بولعان. الايدا سول كۇيى ورالماعان. قازىرگى تاڭدا ىزدەستىرۋ شاراسى جۇرگىزىلىپ جاتىر. ال جوعالعان جانداردىڭ جاقىندارى جۇمىس پروسەسسىنە كوڭىلى تولماي وتىرعانىن جەتكىزدى، دەپ حابارلايدى Dalanews.kz.

قۇسالى كۇي كەشكەن وتباسى جۇمىستىڭ وتە باياۋ ءجۇرىپ جاتقانىنا شاعىمداندى. وسى تۇستا ولار توتەنشە جاعدايلار مينيسترلىگىنەن جاعدايدى باقىلاۋعا الۋدى سۇراپ وتىر.

“ساعات 14:00-دە №8 مەكتەپتىڭ ماڭىنا كولىگىن قويىپ، ەكەۋى رەزەڭكە كيىم كيىپ، ءۇي جاققا بارعان. سودان سوڭ حابارسىز كەتتى، تەلەفوندارى ءوشىپ تۇردى. ءبىز الاڭداپ، جان-جاقتان ىزدەستىرىپ كەتتىك. توتەنشە جاعدايلار قىزمەتىنە حابارلاسىپ، ادامدار جوعالعانىن حابارلادىق. 17:00 شاماسىندا وتباسىمىزبەن ءۇيدىڭ ماڭىنا كەلدىك. ولاردى ءوزىمىز قايىقپەن ىزدەدىك، ءبىراق اعىس قاتتى بولعاندىقتان، سۋدىڭ ارعى بەتىنە جەتە المادىق”، – دەدى جوعالعانداردىڭ جاقىنى Stan.kz اگەنتتىگىنە بەرگەن سۇقباتىندا.

سول وتباسىنىڭ قىزى ديانا توتەنشە جاعدايلار قىزمەتى مەن پوليسيا دەپارتامەنتى جۇمىستارىنا سالعىرتتىق تانىتقانىن ايتادى. سەبەبى باستاپقى ەكى كۇندە ىزدەۋ جەتكىلىكتى دەڭگەيدە جۇرگىزىلمەي، ۋاقىتتارى زايا كەتكەن.

“اعام مەن اكەم جوعالعان كۇنى قۇلسارىدا تراكتور مىنگەن ەكى ادام دا جوعالىپ كەتكەن ەكەن. تجد قىزمەتكەرلەرىنىڭ ءبارى سوعان كەتىپتى، مەنىڭ جاقىندارىم جوعالعان جەرگە ەشكىم كەلمەدى. تەحنيكا مەن قايىق بەرىلمەدى. 112-گە حابارلاسقان كەزدە دە ولاردى شاقىرا المادىق. سوندىقتان ءوزىمىز تجد باستىعىمەن جولىعىپ، ترەكول كولىگىن الدىرتتىق. كولىكپەن ءوزىمىز ىزدەۋگە شىقتىق، ونىمەن تەك ءۇيدىڭ ماڭىن عانا كورە الدى، جان-جاقتى ىزدەگەن جوق. ءارى اعىستىڭ كەسىرىنەن كولىك سۋدا قالقىپ، جۇرە المادى. تاڭدا تجد قىزمەتكەرلەرى باسقا ءوتىنىش كەلىپ تۇسكەنىن ايتىپ، كەتىپ قالدى. ءبىز قايتادان تجد مەكەمەسىنە باردىق، باسقا كولىكتەردى سۇراتتىق. ماماندار “جانارماي جوق، سول ءۇشىن ولاردى قولدانا المايمىز” دەدى. ءبىز ءوزىمىز جانارماي تابۋعا ءازىرمىز. اتىراۋ مەن الماتىدان قۇتقارۋ ماماندارى كەلىپتى، ءبىراق ولار بوگەت سالىپ ءجۇردى، ال ادام ىزدەيتىندەر جەتپەي جاتىر عوي. ەرىكتىلەر بوگەت سالۋمەن اينالىسا بەرىپ، ال ماماندار ىزدەستىرۋ شارالارىن نەگە جاساماسقا”، – دەيدى ديانا.

وتباسى ەكى كۇننەن سوڭ جۋرناليستەرگە جولىعىپ، ماسەلەنى كوتەرگەن. رەزونانس تۋدىرعاننان كەيىن جاۋاپتىلار كەلىپتى.

“پوليسيا قىزمەتكەرلەرى تەلەفونداعى لوكاتور كومەگىمەن 1-شاعىناۋدان كورسەتىلىپ تۇرعانىن ايتتى. ءقازىر جاقىندارىمدى ىزدەستىرۋگە ازىلحان دەگەن مامان جاۋاپتى. ونىڭ جۇمىسىنا قاناعاتتانامىز، ناتيجەلى بولادى دەپ ۇمىتتەنەمىز، ەندى توتەنشە جاعدايلار مينيسترلىگى تىكۇشاق بەرسە ەكەن دەگەن تىلەگىمىز بار، ول سۋدىڭ بەتىن تولىق كورۋگە مۇمكىندىك بەرەدى. ويتكەنى اعىستىڭ كەسىرىنەن جۇمىس باياۋ ءجۇرىپ جاتىر”، – دەدى قىز.

تىكۇشاقتى سۇراتقانىندا پوليسيا اكىمدىككە، اكىمدىك تجد-عا، تجد پوليسياعا سىلتەپتى. ولار شاراسىز وتىرعاندارىنا شامدانىپ وتىر.

توتەنشە جاعدايلار مينيسترلىگى جاعداي باقىلاۋدا ەكەنىن ايتىپ، ادامداردى ىزدەۋ جالعاسىپ جاتقانىن ءتۇسىندىردى.

“كۇنى-تۇنى، ياعني تاۋلىك بويى ىزدەستىرىپ جاتىرمىز، سۇڭگۋىرلەر ارقىلى سۋ اراسىن ارالاۋدامىز. ءبىراق بۇل شاراعا تىكۇشاقتىڭ قاجەتى جوق، ويتكەنى سۋ تەرەڭ، سۋدىڭ اراسىن تەكسەرۋىمىز قاجەت”، – دەدى تجم باسپا ءسوز قىزمەتى Stan.kz تىلشىسىنە.

الايدا ديانا نۇرجاۋ تاۋلىك بويى ىزدەۋ ءجۇرىپ جاتىر دەگەندى جوققا شىعاردى. سوزىنشە، جۇمىس 7:30-دان 19:30 ارالىعىندا بولادى.

ەسكە سالساق، بۇعان دەيىن قۇلسارىدا سۋ استىندا قالعان ءۇيىن كورۋگە كەتكەن اكەسى مەن ۇلى جوعالىپ كەتكەنى ايتىلدى.


ۇسىنىلعان
سوڭعى جاڭالىقتار