Atyraý oblysy Qulsary qalasynda sý basqan baspanasyn qaraýǵa ketken ákesi men balasy áli kúnge deiin tabylmai jatyr. Olar tótenshe jaǵdai oryn alǵan kúni tarktorge minip, úi jaǵyn qarap kelmek bolǵan. Alaida sol kúii oralmaǵan. Qazirgi tańda izdestirý sharasy júrgizilip jatyr. Al joǵalǵan jandardyń jaqyndary jumys protsessine kóńili tolmai otyrǵanyn jetkizdi, dep habarlaidy Dalanews.kz.
Qusaly kúi keshken otbasy jumystyń óte baiaý júrip jatqanyna shaǵymdandy. Osy tusta olar tótenshe jaǵdailar ministrliginen jaǵdaidy baqylaýǵa alýdy surap otyr.
“Saǵat 14:00-de №8 mekteptiń mańyna kóligin qoiyp, ekeýi rezeńke kiim kiip, úi jaqqa barǵan. Sodan soń habarsyz ketti, telefondary óship turdy. Biz alańdap, jan-jaqtan izdestirip kettik. Tótenshe jaǵdailar qyzmetine habarlasyp, adamdar joǵalǵanyn habarladyq. 17:00 shamasynda otbasymyzben úidiń mańyna keldik. Olardy ózimiz qaiyqpen izdedik, biraq aǵys qatty bolǵandyqtan, sýdyń arǵy betine jete almadyq”, – dedi joǵalǵandardyń jaqyny Stan.kz agenttigine bergen suqbatynda.
Sol otbasynyń qyzy Diana tótenshe jaǵdailar qyzmeti men politsiia departamenti jumystaryna salǵyrttyq tanytqanyn aitady. Sebebi bastapqy eki kúnde izdeý jetkilikti deńgeide júrgizilmei, ýaqyttary zaia ketken.
“Aǵam men ákem joǵalǵan kúni Qulsaryda traktor mingen eki adam da joǵalyp ketken eken. TJD qyzmetkerleriniń bári soǵan ketipti, meniń jaqyndarym joǵalǵan jerge eshkim kelmedi. Tehnika men qaiyq berilmedi. 112-ge habarlasqan kezde de olardy shaqyra almadyq. Sondyqtan ózimiz TJD bastyǵymen jolyǵyp, Trekol kóligin aldyrttyq. Kólikpen ózimiz izdeýge shyqtyq, onymen tek úidiń mańyn ǵana kóre aldy, jan-jaqty izdegen joq. Ári aǵystyń kesirinen kólik sýda qalqyp, júre almady. Tańda TJD qyzmetkerleri basqa ótinish kelip túskenin aityp, ketip qaldy. Biz qaitadan TJD mekemesine bardyq, basqa kólikterdi surattyq. Mamandar “janarmai joq, sol úshin olardy qoldana almaimyz” dedi. Biz ózimiz janarmai tabýǵa ázirmiz. Atyraý men Almatydan qutqarý mamandary kelipti, biraq olar bóget salyp júrdi, al adam izdeitinder jetpei jatyr ǵoi. Eriktiler bóget salýmen ainalysa berip, al mamandar izdestirý sharalaryn nege jasamasqa”, – deidi Diana.
Otbasy eki kúnnen soń jýrnalisterge jolyǵyp, máseleni kótergen. Rezonans týdyrǵannan keiin jaýaptylar kelipti.
“Politsiia qyzmetkerleri telefondaǵy lokator kómegimen 1-shaǵynaýdan kórsetilip turǵanyn aitty. Qazir jaqyndarymdy izdestirýge Azylhan degen maman jaýapty. Onyń jumysyna qanaǵattanamyz, nátijeli bolady dep úmittenemiz, endi tótenshe jaǵdailar ministrligi tikushaq berse eken degen tilegimiz bar, ol sýdyń betin tolyq kórýge múmkindik beredi. Óitkeni aǵystyń kesirinen jumys baiaý júrip jatyr”, – dedi qyz.
Tikushaqty suratqanynda politsiia ákimdikke, ákimdik TJD-ǵa, TJD politsiiaǵa siltepti. Olar sharasyz otyrǵandaryna shamdanyp otyr.
Tótenshe jaǵdailar ministrligi jaǵdai baqylaýda ekenin aityp, adamdardy izdeý jalǵasyp jatqanyn túsindirdi.
“Kúni-túni, iaǵni táýlik boiy izdestirip jatyrmyz, súńgýirler arqyly sý arasyn aralaýdamyz. Biraq bul sharaǵa tikushaqtyń qajeti joq, óitkeni sý tereń, sýdyń arasyn tekserýimiz qajet”, – dedi TJM baspasóz qyzmeti Stan.kz tilshisine.
Alaida Diana Nurjaý táýlik boiy izdeý júrip jatyr degendi joqqa shyǵardy. Sózinshe, jumys 7:30-dan 19:30 aralyǵynda bolady.
Eske salsaq, buǵan deiin Qulsaryda sý astynda qalǵan úiin kórýge ketken ákesi men uly joǵalyp ketkeni aityldy.
