«جۇمىس جاسايمىن» جوباسى ەڭبەك نارىعىنداعى شيەلەنىستى شەشۋگە جانە حالىقتى جۇمىسپەن قامتۋعا جاردەمدەسۋ ماقساتىندا 2021-2023 جىلدارعا ارنالىپ ىسكە قوسىلعان. جوبا اياسىندا ءوڭىردىڭ جۇمىسسىز تۇرعىندارى تۇراقتى جۇمىسقا ورنالاسادى. جوبانىڭ ەرەجەسى بويىنشا العاشقى جىلى ايلىق جالاقى حالىقتى جۇمىسپەن قامتۋ ورتالىعى ەسەبىنەن تولەنەدى. ال ەكىنشى جىلى جوباعا قاتىسۋشىنىڭ جالاقىسىنىڭ 70 پايىز مولشەرىن حالىقتى جۇمىسپەن قامتۋ ورتالىعى، 30 پايىزىن جۇمىس بەرۋشى تولەيدى. ءۇشىنشى جىلى جالاقىنىڭ 30 پايىز مولشەرىن جۇمىسپەن قامتۋ ورتالىعى، جۇمىس بەرۋشى 70 پايىزىن تولەيدى.
جۇمىسقا ورنالاسقاندار قاتارىندا باۋىرجان يالگاشوۆ تا بار. وڭىرلىك باعدارلامانىڭ ارقاسىندا كوپبالالى اكە، بۇگىندە جاڭاوزەن قالاسىنداعى بوياۋ جانە جيناقتاۋ سەحىندا بىلىكتى مامانداردىڭ ءبىرى بولىپ وتىر. 1 جىل بۇرىن جۇمىسسىزدىقپەن كەزەكتە تۇرعان شەبەرگە مەملەكەتتەن كوڭىلدەن شىعاتىنداي ءوز قالاۋىنداعى جۇمىس ۇسىنىلعان.
-1 جىلدىڭ كولەمى بولىپ قالدى، «جۇمىس جاسايمىن» جوباسىنىڭ ارقاسىندا وزىمە قاجەتتى، كوڭىلىمنەن شىعاتىن ءارى حالىققا پايداسى بار جۇمىسقا ورنالاستىم. جاڭاوزەن جىگىتتەرىمەن بىرگە كەز كەلگەن تەمىر ەسىك تۇرلەرى مەن مەبەل جيناقتارىن ءوز قولىمىزدان جاساپ شىعارىپ كەلەمىز. بۇل ءبىز ماقتانىپ ايتا الاتىنداي ۇلكەن جەتىستىك. سەبەبى، تەك جۇمىس جاساپ قانا قويماي، وڭىرگە دە پايدامىزدى تيگىزىپ جاتىرمىز. سول ءۇشىن ەرەكشە قۋانىشتىمىن. ايلىق تابىسىم دا 4 بالامدى باعۋعا، كەرەك جاراعىمدى الۋعا دا جەتەدى. جاسايمىن دەگەن ازاماتتاردىڭ ەكى قولىنا ءبىر كۇرەك تابىلىپ جاتىر. سونىڭ ءوزى ءبىزدى قۋانتادى، - دەدى باۋىرجان يالگاشوۆ.
بۇدان بولەك، جاڭاوزەندىك گاۋحار شاڭدييەۆا دا وڭىرلىك باعدارلاما ارقىلى تۇراقتى جۇمىس تاپقان. 2 جىل بويى جۇمىسسىز جۇرگەن ول، بۇگىندە بالاباقشا تاربيەشىسى بولىپ قىزمەت ەتەدى.
- وسىدان 2 جىلدان بەرى بۇلدىرشىندەرگە تاربيە بەرىپ، ولاردىڭ تۇلعا بولىپ قالىپتاسۋىنا ۇلەسىمدى قوسقىم كەلدى. جۇمىسپەن قامتۋ ورتالىعىنا بارىپ، ءوزىم ۇناتاتىن، ءوزىم ارمانداعان جۇمىسقا كىرۋگە بەل بۋدىم. ماعان دەر كەزىندە قاجەتتى قىزمەت پەن جەتكىلىكتى ايلىق تابىسىمدى تابۋعا «جۇمىس جاسايمىن» جوباسى كومەكتەستى. سول سەبەپتى، جۇمىسسىز ازاماتتارعا مەملەكەت ۇسىنعان مۇمكىندىكتى دۇرىس پايدالانۋعا كەڭەس بەرگىم كەلەدى، - دەدى گاۋحار شاڭدييەۆا.
«جۇمىس جاسايمىن» جوباسىنىڭ اياسىندا جاڭاوزەندىك شولپان قاقابايەۆا دا جۇمىسقا ورنالاسقان. ول وزىنە ۋاقىتى ىڭعايلى ءارى لايىقتى جالاقىعا باعدارلاما اياسىندا قول جەتكىزگەنىن ايتادى.
- ەت ونىمدەرى دۇكەنىنىڭ ساتۋشى قىزمەتىندە جۇرگەنىمە 8 اي بولدى. 4 اي ارنايى وقۋدان ءوتىپ، ەمتيحان ارقىلى وسى جۇمىسقا ورنالاستىم. جاساپ جاتقان قىزمەتىم تولىقتاي كوڭىلىمنەن شىعىپ جاتىر. ونىڭ ۇستىنە ۇجىمداستارىمنىڭ 95%-ى «جۇمىس جاسايمىن» باعدارلاماسى ارقىلى كەلگەندەر. جاڭاوزەن قالاسىندا جۇمىسسىز ازاماتتار كوپ بولعاندىقتان، بۇل جوبا كەرەمەت مۇمكىندىك دەپ ەسەپتەيمىن، - دەدى شولپان قاقابايەۆا.
