«Jumys jasaimyn» jobasy eńbek naryǵyndaǵy shielenisti sheshýge jáne halyqty jumyspen qamtýǵa járdemdesý maqsatynda 2021-2023 jyldarǵa arnalyp iske qosylǵan. Joba aiasynda óńirdiń jumyssyz turǵyndary turaqty jumysqa ornalasady. Jobanyń erejesi boiynsha alǵashqy jyly ailyq jalaqy halyqty jumyspen qamtý ortalyǵy esebinen tólenedi. Al ekinshi jyly jobaǵa qatysýshynyń jalaqysynyń 70 paiyz mólsherin halyqty jumyspen qamtý ortalyǵy, 30 paiyzyn jumys berýshi tóleidi. Úshinshi jyly jalaqynyń 30 paiyz mólsherin jumyspen qamtý ortalyǵy, jumys berýshi 70 paiyzyn tóleidi.
Jumysqa ornalasqandar qatarynda Baýyrjan Ialgashov ta bar. Óńirlik baǵdarlamanyń arqasynda kópbalaly áke, búginde Jańaózen qalasyndaǵy boiaý jáne jinaqtaý tsehynda bilikti mamandardyń biri bolyp otyr. 1 jyl buryn jumyssyzdyqpen kezekte turǵan sheberge memleketten kóńilden shyǵatyndai óz qalaýyndaǵy jumys usynylǵan.
-1 jyldyń kólemi bolyp qaldy, «Jumys jasaimyn» jobasynyń arqasynda ózime qajetti, kóńilimnen shyǵatyn ári halyqqa paidasy bar jumysqa ornalastym. Jańaózen jigitterimen birge kez kelgen temir esik túrleri men mebel jinaqtaryn óz qolymyzdan jasap shyǵaryp kelemiz. Bul biz maqtanyp aita alatyndai úlken jetistik. Sebebi, tek jumys jasap qana qoimai, óńirge de paidamyzdy tigizip jatyrmyz. Sol úshin erekshe qýanyshtymyn. Ailyq tabysym da 4 balamdy baǵýǵa, kerek jaraǵymdy alýǵa da jetedi. Jasaimyn degen azamattardyń eki qolyna bir kúrek tabylyp jatyr. Sonyń ózi bizdi qýantady, - dedi Baýyrjan Ialgashov.
- Osydan 2 jyldan beri búldirshinderge tárbie berip, olardyń tulǵa bolyp qalyptasýyna úlesimdi qosqym keldi. Jumyspen qamtý ortalyǵyna baryp, ózim unatatyn, ózim armandaǵan jumysqa kirýge bel býdym. Maǵan der kezinde qajetti qyzmet pen jetkilikti ailyq tabysymdy tabýǵa «Jumys jasaimyn» jobasy kómektesti. Sol sebepti, jumyssyz azamattarǵa memleket usynǵan múmkindikti durys paidalanýǵa keńes bergim keledi, - dedi Gaýhar Shańdieva.
«Jumys jasaimyn» jobasynyń aiasynda jańaózendik Sholpan Qaqabaeva da jumysqa ornalasqan. Ol ózine ýaqyty yńǵaily ári laiyqty jalaqyǵa baǵdarlama aiasynda qol jetkizgenin aitady.
- Et ónimderi dúkeniniń satýshy qyzmetinde júrgenime 8 ai boldy. 4 ai arnaiy oqýdan ótip, emtihan arqyly osy jumysqa ornalastym. Jasap jatqan qyzmetim tolyqtai kóńilimnen shyǵyp jatyr. Onyń ústine ujymdastarymnyń 95%-y «Jumys jasaimyn» baǵdarlamasy arqyly kelgender. Jańaózen qalasynda jumyssyz azamattar kóp bolǵandyqtan, bul joba keremet múmkindik dep esepteimin, - dedi Sholpan Qaqabaeva.
