مۇناي ٶنەركەسٸبٸنە جۇمىسقا ورنالاسۋ مەسەلەسٸ 2019-جىلدان بەرٸ كٶتەرٸلٸپ كەلەدٸ. سوندىقتان «ٶزەنمۇنايگاز» اق جەنە جاڭاٶزەن قالاسى ەكٸمدٸگٸ بٸرلەسە قۇرعان الگوريتمگە سەيكەس «ٶزەنينۆەست» جشس, «تازاسۋ» جشس, «بن» جشس, «ٶزەنمۇنايگاز» اق كومپانييالارى بٷگٸنگە دەيٸن 4000-عا جۋىق ازاماتتى جۇمىسپەن قامتىپ وتىر. ال, سيرەك قولدانىستاعى ماماندىق بويىنشا 146 ادام قىزمەت ەتٸپ جٷر.
الايدا, جاڭاٶزەن قالالىق جۇمىسپەن قامتۋ ورتالىعىنىڭ باسشىسى ۇلبازار ورىنباەۆانىڭ ايتۋىنشا, الگوريتمگە سەيكەس ەلٸ دە 9996 ادام جۇمىسقا ورنالاسۋعا كەزەكتە تۇر.
– قازٸرگٸ تاڭدا 9996 ادام كەزەكتە تۇرعانىمەن ونىڭ ٸشٸندە 415 ادام جەكە كەسٸپكەر, ال 4333 ادامنىڭ زەينەتاقى قورىنا اۋدارىمدارى ٷزدٸكسٸز تٷسٸپ تۇر. 2603 جۇمىسسىز ازامات الگوريتمگە سەيكەس كەزەكتە تۇر. جۇمىسقا ورنالاسقىسى كەلگەن ادام الدىمەن «ٶزەنينۆەست» مەكەمەسٸندە ۋاقىتشا قىزمەت ەتٸپ, اۋتسورسينگ بويىنشا «ٶزەنمۇنايگاز» اق-نا تۇراقتى جۇمىسقا ورنالاسا الادى, – دەدٸ ۇلبازار ورىنباەۆا.
جيىندا مەكەمە باسشىلارى ٶز ويلارىن ايتىپ, ۇسىنىستارىن ورتاعا سالدى. «ٶزەنمۇنايگاز» اق باسشىسى نۇردەۋلەت يگٸلٸكۇلىنىڭ ايتۋىنشا, «ٶزەنمۇنايگاز» كومپانيياسى 10 000- عا جۋىق ادامدى جۇمىسپەن قامتىپ وتىر.
بۇدان ارتىق ادامدى جۇمىسپەن قامتۋ كومپانييانىڭ ەكونوميكالىق جاعدايىنا كەرٸ ەسەرٸن تيگٸزەدٸ. سول سەبەپتٸ «قازمۇنايگاز» ۇك اق باسقارما تٶراعاسىنىڭ ورىنباسارى دەۋلەتجان حاسانوۆ الداعى ۋاقىتتا ەلەۋمەتتٸك جاعدايى تٶمەن, جۇمىسسىز جاندارعا الگوريتم اياسىندا «ٶزەنمۇنايگاز» اق كومپانيياسىنا قاراستى ەنشٸلەس مەكەمەلەرگە جۇمىسقا ورنالاسۋعا ۇسىنىس بٸلدٸردٸ.
– قازٸرگٸ تاڭدا جۇمىسسىزدىق مەسەلەسٸ ماڭعىستاۋ وبلىسىندا ٶزەكتٸ بولىپ وتىر. شيەلەنٸسكەن جاعدايدىڭ شەشٸمٸن تابۋ ماقساتىندا جيىن ٶتكٸزدٸك. بٷگٸنگٸ كٷنٸ قوعامدا كەز كەلگەن ازامات «ٶزەنمۇنايگازعا» جۇمىسقا ورنالىسقىسى كەلەدٸ. قازٸر «ٶزەنمۇنايگازعا» قىزمەت كٶرسەتەتٸن «قازمۇنايگازدىڭ» اينالاسىندا وننان استام ٸرٸ كومپانييالار بار.
ايتا كەتەيٸك, وسى مەسەلەنٸ تەز ارادا شەشۋ ماقساتىندا قالا ەكٸمٸنٸڭ ارنايى تاپسىرماسىمەن دەپۋتاتتار, قوعامدىق كەڭەس مٷشەلەرٸ, كومپانييا جەنە كەسٸپوداق ٶكٸلدەرٸنەن تۇراتىن جۇمىس توبى قۇرىلىپ, جان-جاقتى زەردەلەپ شەشٸم قابىلدايدى.
