ءبولىم باسشىسىنىڭ ايتۋىنشا، جاڭاوزەن قالاسىندا 52 ەسكى ءۇي بار. 2020 جىلى «سامۇرىق-قازىنا ترانس» الەۋمەتتىك جوبالاردى دامىتۋ قورىنىڭ قولداۋىمەن 27 تۇرعىن ۇيگە جوبالىق سمەتالىق قۇجاتتاما دايىندالعان-دى.
قازىرگى تاڭدا ءۇش ءۇي̆گە كۇردەلى جوندەۋ جۇمىستارى جۇرگىزىلۋدە. جوبالىق سمەتالىق قۇجاتتا كورسەتىلگەن نەگىزگى جۇمىستار – جەرتولەلەردە ورنالاسقان ىشكى ينجەنەرلىك كوممۋنيكاسيالىق ينفراقۇرىلىمدار جاڭارتۋ، تۇرعىن ۇيلەردىڭ قاسبەتتەرىن جوندەۋ جانە كولوننالاردى، شاتىردى، باسپالداقتاردى جاڭارتۋ بولىپ تابىلادى. جوسپار بويىنشا، اتالعان جۇمىستار مامىر ايىنىڭ سوڭىنا دەيىن اياقتالۋى ءتيىس.
– كەيبىر كوپپاتەرلى تۇرعىن ۇيلەردىڭ تۇرعىندارى ۇيگە كۇردەلى جوندەۋ جاساۋ ماسەلەسىن ءبىرجاقتى اكىمدىكتىڭ مىندەتى دەپ تۇسىنەدى. زاڭناماعا ساي، اكىمدىك تۇرعىن ءۇي قورىنىڭ ساقتالۋىنا باعىتتالعان ءىس-شارالاردى جۇرگىزۋگە جاۋاپتى. الايدا نەگىزگى جاۋاپكەرشىلىك سول تۇرعىنداردىڭ وزىندە، – دەدى سۇيىندىك مۇحاممەدوۆ.
ايتا كەتەيىك، جاڭاوزەن قالاسى «شاڭىراق» شاعىن اۋدانىنداعى №19 كوپقاباتتى تۇرعىن ۇيلەردىڭ 70%-ى، «شۇعىلا» شاعىن اۋدانىنداعى №5، 6 ۇيلەردى جوندەۋ جۇمىستارىنىڭ 40%-ى اياقتالدى.
ماڭعىستاۋ وبلىسىنىڭ قوعامدىق كوممۋنيكاسيا ورتالىعى
