ءماجىلىس دەپۋتاتى گەنناديي شيپوۆسكيحتىڭ ايتۋىنشا حالىق تاراپىنان تۇسەتىن ارىز-شاعىمداردىڭ دەنى پوليسيا قىزمەتكەرلەرىنىڭ دورەكىلىگىمەن بايلانىستى.
«قۇقىق قورعاۋ سالاسىن رەفورمالاۋ كەزەك كۇتتىرمەيتىن ماسەلە. سونىڭ ىشىندە جولداعى ءتارتىپتى قاداعالاۋمەن اينالىساتىن اۆتوينسپەكسيا قىزمەتكەرلەرىنە ەلدىڭ تاراپىنان قويىلار ساۋال كوپ. ءيا، بەس ساۋساق بىردەي ەمەس، ءوز كاسىبىنە ادال، جولداعى جۇرتقا قۇرمەتپەن قارايتىن، ەرەجە بۇزسا، بارلىعىن زاڭ شەڭبەرىندە ءتۇسىندىرىپ بەرەتىن كاسىبي كادرلار بار. دەسە دە، كەيبىر پوليسەيلەر جول ەرەجەلەرىن جەتىك بىلمەيتىنى كوزگە ۇرىپ تۇرادى»، – دەيدى دەپۋتات.
شيپوۆسكيحتىڭ اتاپ وتكەنىندەي، دەپۋتاتتاردىڭ حالىقپەن جۇزدەسۋىندە، جۇرتتىڭ تاراپىنان «جولپولعا» قاتىستى شاعىم ءجيى تۇسەدى.
حالىق پوليسيا قىزمەتكەرلەرىنىڭ ءوز قۇزىرەتىن اسىرا پايدالانىپ، كوپ جاعدايدا دورەكىلىك كورسەتكەنىنە اشىنادى. سويلەسۋ مادەنيەتىن، قاراپايىم ەتيكانى مەڭگەرمەگەن پوليسەيلەر كۇللى سالانىڭ جۇمىسىنا كەسىرىن تيگىزۋدە.
ءسوي دەگەن ءماجىلىس دەپۋتاتى: قۇقىق قورعاۋ جۇيەسىن رەفورمالاۋ اياسىندا پوليسيا قىزمەتكەرلەرىن سويلەۋ مادەنيەتىنە ۇيرەتۋىمىز كەرەك دەيدى.
“قۇقىق قورعاۋ سالاسىندا تەر توگىپ جۇرگەن ءاربىر ازامات ەتيكا كودەكسىنىڭ ەرەجەلەرىن جەتىك مەڭگەرۋى ءتيىس. پوليسيا قىزمەتكەرلەرىنىڭ دورەكىلىگىن اشكەرە ەتكەن الەۋمەتتىك جەلىدەگى ۆيدەولار بۇل ماسەلەدە ۇلكەن ولقىلىق بارىن كورسەتەدى. سوندىقتان رەفورما مادەنيەتتەن باستالۋى ءتيىس»، – دەيدى حالىق قالاۋلىسى.
ال ىشكى ىستەر مينيسترلىگىنىڭ ايتۋىنشا، بۇل ماسەلە ۆەدومستۆو باسشىلىعىنىڭ باقىلاۋىندا. مينيسترلىك تاراپىنان پوليسيا قىزمەتكەرلەرىنىڭ مادەنيەتىن كوتەرۋدە كەشەندى جوبالار قولعا الىنعان.
«وسى كۇنگە دەيىن ىشكى ىستەر سالاسىنا كادر دايىنداپ كەلگەن 20-عا جۋىق وقۋ ورىندارىنىڭ سانى قىسقارىپ، ءقازىر 6-ى عانا قالدى. تالاپتى كۇشەيتتىك. پوليسيا قىزمەتكەرلەرىن دايىندايتىن وقۋ ورىندارى بۇدان بىلاي ءتارتىپ ساقشىلارىنىڭ جۇرتپەن تىلدەسۋ مادەنيەتىن دامىتۋعا باسىمدىق بەرەدى. وسى ماقساتتا اتالعان وقۋ ورىندارىنداعى ۇستازدار قۇرامىن جاڭارتىپ، ءدارىس بەرۋ ىسىنە قوعام بەلسەندىلەرىن تارتتىق.
ءبىر كەزدەرى اسكەرگە بارىپ كەلگەندەر ەرتەسىنە-اق پوليسياعا ورنالاساتىن ەدى. ءقازىر بۇل جۇيە جويىلدى. قۇقىق قورعاۋ جۇيەسىن رەفورمالاۋ اياسىندا 8 مىڭعا جۋىق سەرجانت لاۋازىمىن وفيسەرلىك لاۋازىمعا اۋىستىردىق. ياعني، بۇدان بىلاي بۇل لاۋازىمعا جوعارى ءبىلىمى بار، ومىرلىك كوزقاراسى قالىپتاسقان ازاماتتار عانا قابىلدانادى»، – دەيدى ءماجىلىس دەپۋتاتىنا جاۋاپ قاتقان ۆەدومستۆو باسشىلىعى.
