Májilis depýtaty Gennadii Shipovskihtyń aitýynsha halyq tarapynan túsetin aryz-shaǵymdardyń deni politsiia qyzmetkerleriniń dórekiligimen bailanysty.
«Quqyq qorǵaý salasyn reformalaý kezek kúttirmeitin másele. Sonyń ishinde joldaǵy tártipti qadaǵalaýmen ainalysatyn avtoinspektsiia qyzmetkerlerine eldiń tarapynan qoiylar saýal kóp. Iá, bes saýsaq birdei emes, óz kásibine adal, joldaǵy jurtqa qurmetpen qaraityn, ereje buzsa, barlyǵyn zań sheńberinde túsindirip beretin kásibi kadrlar bar. Dese de, keibir politseiler jol erejelerin jetik bilmeitini kózge uryp turady», – deidi depýtat.
Shipovskihtiń atap ótkenindei, depýtattardyń halyqpen júzdesýinde, jurttyń tarapynan «jolpolǵa» qatysty shaǵym jii túsedi.
Halyq politsiia qyzmetkerleriniń óz quziretin asyra paidalanyp, kóp jaǵdaida dórekilik kórsetkenine ashynady. Sóilesý mádenietin, qarapaiym etikany meńgermegen politseiler kúlli salanyń jumysyna kesirin tigizýde.
Sói degen Májilis depýtaty: quqyq qorǵaý júiesin reformalaý aiasynda politsiia qyzmetkerlerin sóileý mádenietine úiretýimiz kerek deidi.
“Quqyq qorǵaý salasynda ter tógip júrgen árbir azamat etika kodeksiniń erejelerin jetik meńgerýi tiis. Politsiia qyzmetkerleriniń dórekiligin áshkere etken áleýmettik jelidegi videolar bul máselede úlken olqylyq baryn kórsetedi. Sondyqtan reforma mádenietten bastalýy tiis», – deidi halyq qalaýlysy.
Al Ishki ister ministrliginiń aitýynsha, bul másele vedomstvo basshylyǵynyń baqylaýynda. Ministrlik tarapynan politsiia qyzmetkerleriniń mádenietin kóterýde keshendi jobalar qolǵa alynǵan.
«Osy kúnge deiin Ishki ister salasyna kadr daiyndap kelgen 20-ǵa jýyq oqý oryndarynyń sany qysqaryp, qazir 6-y ǵana qaldy. Talapty kúsheittik. Politsiia qyzmetkerlerin daiyndaityn oqý oryndary budan bylai tártip saqshylarynyń jurtpen tildesý mádenietin damytýǵa basymdyq beredi. Osy maqsatta atalǵan oqý oryndaryndaǵy ustazdar quramyn jańartyp, dáris berý isine qoǵam belsendilerin tarttyq.
Bir kezderi áskerge baryp kelgender ertesine-aq politsiiaǵa ornalasatyn edi. Qazir bul júie joiyldy. Quqyq qorǵaý júiesin reformalaý aiasynda 8 myńǵa jýyq serjant laýazymyn ofitserlik laýazymǵa aýystyrdyq. Iaǵni, budan bylai bul laýazymǵa joǵary bilimi bar, ómirlik kózqarasy qalyptasqan azamattar ǵana qabyldanady», – deidi Májilis depýtatyna jaýap qatqan vedomstvo basshylyǵy.
