«وتباسى بانك» كليەنتتەرىنە كوپ ماسەلەنى قاشىقتان شەشۋگە كومەكتەسىپ جاتىر. ولاي دەيتىنىمىز، بۇرىن فيليالعا بارماسا شەشىلمەيتىن دۇنيەلەر ەندى گادجەتتەگى بىرەر پەرنەنى باسۋ ارقىلى ىسكە اسىرىلاتىن بولدى.  سونىمەن قاتار، «وتباسى بانك» اق مەن «ق.ي.ساتبايەۆ اتىنداعى ۇلتتىق عىلىمي-زەرتتەۋ ۋنيۆەرسيتەتى»  كەاق سەرىكتەستىك تۋرالى كەلىسىمگە كەلۋدى جوسپارلاپ وتىر.

مۇنداعى ماقسات – بىرلەسە وتىرىپ، بانك قىزمەتى سالاسى بويىنشا بىلىكتى مامانداردى تاجىريبە ارقىلى دايارلاۋ. سونىمەن قاتار، الداعى ۋاقىتتا ولاردى بانككە جۇمىسقا ورنالاستىرىپ، سالانى كاسىبي كادرلارمەن قامتاماسىز ەتۋ ويدا بار.

«وتباسى بانكتىڭ» ديدجيتال دۇنيەگە باسقان قادامى كوبەيىپ، كليەنتتەرىن كۇن وتكەن سايىن قۋانتىپ كەلەدى.

بۇگىنگى ستۋدەنت – ەرتەڭگى مامان

الدىمەن، «وتباسى بانك» پەن «ق.ي.ساتبايەۆ اتىنداعى ۇلتتىق عىلىمي-زەرتتەۋ ۋنيۆەرسيتەتى» اراسىنداعى كەلىسىمنەن باستايىق. ۋنيۆەرسيتەتتە وقىپ جاتقان ستۋدەنت، ماگيسترانت، دوكتورانتتاردىڭ كۋرستىق جانە ديپلومدىق جۇمىستارى مەن عىلىمي زەرتتەۋلەرىنىڭ تاقىرىپتارىن بەكىتكەن كەزدە ول پروسەسكە بانك مۇمكىندىگى مەن قاجەتىنە قاراي قاتىسادى.

ءارى ءبىلىم ورداسى وتكىزەتىن بوس جۇمىس ورىندارى جارمەڭكەسىنە، سەمينارلار، دوڭگەلەك ۇستەلدەر مەن كونفەرەنسيالاردى ۇيىمداستىرۋعا بانك ات سالىسادى. سونىمەن قاتار، ستۋدەنتتەردى وقۋ تاجىريبەسىنەن وتكىزۋگە دە بانك بارىنشا سەپتەسەدى.

ەكى اراداعى كەلىسىمنىڭ كەلەسى ءبىر باعىتى –  عىلىمي زەرتتەۋ جوبالارىنا تالىمگەرلىكتى دامىتىپ، ەلىمىزدىڭ الەۋمەتتىك-ەكونوميكالىق دامۋى ءۇشىن عىلىم مەن يننوۆاسيالىق ءوندىرىستىڭ ينتەگراسياسىنا جاردەمدەسۋ. ال بانك قىزمەتكەرلەرىنە باكالاۆريات، ماگيستراتۋرا، MBA، EMBA، دوكتورانتۋرا باعدارلامالارى بويىنشا وقۋ، بىلىگىن ارتتىرۋعا مۇمكىندىك بەرىلەدى.

ايتقانداي، بانك ستۋدەنتتەر مەن تۇلەكتەردىڭ وقۋ تاجىريبەسىنەن ياكي تاعىلىمدامادان وتۋىنە جاردەمدەسەدى. ۋنيۆەرسيتەتتىڭ ستۋدەنتەرى، ماگيسترانتتار، دوكتورانتتار مەن جاس عالىمدارىنىڭ باستاماسى بويىنشا جۇرگىزىلەتىن زەرتتەۋ جۇمىستارىنا عىلىمي جەتەكشى ءھام كەڭەسشى رەتىندە جول كورسەتەدى.

بىرلەسە وتىرىپ ءىس-شارالار وتكىزۋ ارقىلى ۋنيۆەرسيتەت پەن بانك اراسىنداعى بايلانىستى نىعايتۋ كوزدەلىپ وتىر.

ءارى بانكتىڭ توپ-مەنەدجەرلەرى شەبەرلىك ساعاتىن، ترەنينگتەر وتكىزىپ، ۋنيۆەرسيتەت ستۋدەنتتەرىمەن كەزدەسۋ ۇيىمداستىرادى دەگەن جوسپار بار. ءتيىستى تەوريالىق بازاسى بار بىلىكتى مامانداردى (باكالاۆرياتتىڭ جوعارى كۋرس ستۋدەنتتەرىن، ماگيسترانتتاردى جانە دوكتورانتتاردى) دايىنداۋ ءۇشىن، ونىڭ ىشىندە بانكتىڭ وقۋ تاجىريبەسىنە (وندىرىستىك تاجىريبەسىنە) قويىلاتىن تالاپتارىنا سايكەس جاعداي جاسالۋى باستى شارتتاردىڭ ىشىندە.

ودان بولەك، ستۋدەنتتەردىڭ تەوريا تۇرىندە العان ءبىلىمىن ءىس جۇزىندە قولدانۋعا دەگەن قىزىعۋشىلىعىن ارتتىرۋ كەرەك.

وسىلاي بىرلەسكەن جۇمىس ناتيجەسىندە بانك پەن ۋنيۆەرسيتەت ستۋدەنتتەرىنىڭ وقۋ تاجىريبەسى (وندىرىستىك تاجىريبە) ماسەلەلەرى بويىنشا ءوزارا ءىس-قيمىلدار ادەمى ۇيلەسىم تاباتىن بولسا كەرەك.

 قۇندى تاجىريبە بەرگەن تاعىلىمداما

قازىرگى تاڭدا ۋنيۆەرسيتەت ستۋدەنتتەرى سيفرلىق ترانسفورماسيا دەپارتامەنتىندە UI/UX ديزاينەر، .NET باعدارلامالاۋشى، جۇيەلەردى تەستىلەۋشى سەكىلدى باعىتتار بويىنشا وندىرىستىك تاجىريبەدەن ءوتىپ جاتىر. جاس ماماندارعا ديزاين سىزۋ، بانك كليەنتتەرىنىڭ ونلاين وپەراسيالارىن باعدارلامالاۋ مەن تەستىلەۋ بويىنشا ناقتى تاپسىرمالار بەرىلگەن. ارينە، بانكتىڭ تاجىريبەلى ماماندارى جەتەكشىلىك ەتىپ، جول كورسەتەدى. تاعىلىمدامادا ستۋدەنتتەر بولاشاق IT-ماماننىڭ بويىنان تابىلۋى كەرەك كاسىبي بىلىك پەن قاسيەتتەردى قالىپتاستىرۋ ءۇشىن ءبىلىمى مەن ماشىعىن ۇشتايدى.

ماسەلەن، Computer Science فاكۋلتەتىنىڭ 3-كۋرس ستۋدەنتى ءاليحان ءسابيتوۆ سيفرلىق ترانسفورماسيا دەپارتامەنتىندە .net باعدارلامالاۋشى بولىپ تاجىريبەدەن ءوتىپ جاتىر.

«وتباسى بانكىندەگى تاعىلىمداما تۋرالى اسەرىمدى ايتقىم كەلىپ وتىر. مەن بانكتىڭ .NET جانە .NET Core پلاتفورمالارىندا بانك جۇيەلەرىن باعدارلامالاۋشى بولىپ تاعايىندالدىم. كەلگەن ساتتەن باستاپ مەنى قۇشاق جايا قارسى الدى. كوماندا كاسىبي بىلىگى مول، وتە تاتۋ ەكەن. مەنتورلارىم مەن ارىپتەستەرىم ۇنەمى قول ۇشىن سوزۋعا دايىن تۇراتىن. بانك ءىسى مەن باعدارلامالاۋ سالاسىنىڭ ناعىز بىلگىرلەرى بولعاندىقتان، ولاردان ۇيرەنگەنىم كوپ بولدى. اسىرەسە، قاتتى ۇناعانى – بانكتىڭ ءتۇرلى جۇيەلەرىندە جۇمىس ىستەپ كورۋ. .NET جانە .NET Core پلاتفورمالارىنا نەگىزدەلگەن جۇيەلەردى باعدارلامالاۋ، قولداۋ جۇمىستارى بويىنشا قۇندى تاجىريبە الدىم. كرەاتيۆ پەن ساراپتامالىق ماشىقتى تالاپ ەتەتىن كادىمگى تاپسىرمالار بەرىلدى. بارلىعىن سونداي ىجداعاتپەن ورىندادىم.

بانك ماماندارى ماعان جان-جاقتى قولداۋ ءبىلدىرىپ، باستان-اياق كومەكتەستى. كەرى بايلانىس جۇيەسى جاقسى ويلاستىرىلعان ەكەن.

الدەبىر كومەك كەرەك بولسا، قىسىلماي سۇراپ، دەرەۋ جاۋاپ الىپ وتىردىم. يدەيالارىم مەن ۇسىنىستارىمدى دا اياق-استى قالدىرمايتىن. سول ارقىلى ءوزىمنىڭ اجەپتاۋىر ۇلەس قوسىپ جاتقانىمدى سەزەتىنمىن. ودان بولەك، وتباسى بانكتىڭ زاماناۋي تەحنولوگيالاردى قولدانۋ جانە يننوۆاسيالاردى ەنگىزۋدى باستى نازاردا ۇستايتىنىن ەستىپ، قۋانىپ قالدىم. تاجىريبە كەزىندە جۇمىسىم .NET جانە .NET Core پلاتفورمالارىمەن جۇمىستىڭ ارتىقشىلىعىن بايقاۋعا كومەكتەستى. بانكتىڭ تەحنولوگيالىق دامۋ جولىندا الدىڭعى قاتاردا بولعىسى كەلەتىنىنە كوز جەتكىزدىم.

جالپى العاندا وتباسى بانكتەگى وقۋ تاجىريبەم كوڭىلىمنەن تولىقتاي شىقتى.

بۇل – ءسوزسىز، قۇندى تاجىريبە. باعدارلامالىق، اناليتيكالىق قابىلەتتەرىمدى ارتتىردىم، كوماندانىڭ مۇشەسى ەكەنىمدى سەزىندىم. وتباسى بانككە وسىناۋ مۇمكىندىك بەرگەنىنە ريزامىن. كاسىبي ءوسۋ، دامۋعا ارنالعان بىردەن-بىر جەر دەپ وسى كومپانيانى ۇسىنار ەدىم» دەيدى ءاليحان اسەرىن ءبولىسىپ.

ونلاين-وپەراسيانىڭ وڭتايلى تۇسى

IT-سەكتور جۇمىسىنىڭ قورىتىندىسىنا قاراساق، «وتباسى بانك» ءبىراز  پروسەستى اۆتوماتتاندىرعانىن بايقاۋعا بولادى. ايتالىق، ءقازىر بارلىق وپەراسيانىڭ 83،2 پايىزىن كليەنتتەر قاشىقتان ىستەيدى ەكەن. ءارى مۇنداعى قاشىقتاعى ارنالار ۇلەسى جىل وتكەن سايىن ارتىپ كەلەدى. بۇگىنگى تاڭدا بانك وپەراسيالارىنىڭ 76،6 پايىزى ينتەرنەت-بانكينگ پەن ۆيدەو-بانكينگكە تيەسىلى. كەلەسى 6،6 پايىزى – اگەنت جەلىسىندە. بۇل – 2023 جىلدىڭ العاشقى جارتى جىلدىعىنداعى عانا دەرەكتەر. بىلتىر قاشىقتاعى ارنالار ۇلەسى 81،9 پايىز بولعان ەدى. ال 2021 جىلدىڭ قورىتىندىسىندا بۇل كورسەتكىش 67،1 پايىزعا تەڭ بولعان. بيىلعى التى ايدىڭ وزىندە «وتباسى بانك» كليەنتتەرى بولىمشەگە كەلمەستەن، 1 ميلليوننان استام وپەراسيا جاساعان. ولاردىڭ ءبارى ينتەرنەت-بانكينگ، ۆيدەو-بانكينگ نەمەسە اگەنت جەلىسىنىڭ قىزمەتىنە جۇگىنگەن. بانك كليەنتتەرى اراسىندا تانىمالدىق بويىنشا ءبىرىنشى ورىندا «Otbasy bank» ءموبيلدى قوسىمشاسى تۇر. بيىل كليەنتتەرگە قولايلى بولۋى ءۇشىن قولدانبا فۋنكسيونالى جاڭا ءارى پايدالى وپسيالارمەن تولىقتىرىلعان ەكەن.

 «ديپلوممەن – اۋىلعا» دۇركىرەي تۇسپەك

سونىمەن قاتار، بيىل «وتباسى بانك» «ديپلوممەن – اۋىلعا» جوباسىن ديدجيتال فورماتقا اۋىستىردى. 2023 جىلدىڭ 1 ساۋىرىنەن باستاپ، «وتباسى بانك» اتالعان جوبانىڭ سەنىمدى اگەنتى بولىپ بەكىتىلگەن ەدى. جوبا اياسىندا ءۇي الۋعا نەمەسە سالۋعا نەسيە بەرۋ، كوتەرمە جاردەماقى تولەۋ قاراستىرىلعان.

ەندى ازاماتتاردىڭ ۋاقىتىن ۇنەمدەپ، مەملەكەتتىك قولداۋدى الۋ مەرزىمىن جەدەلدەتۋ ءۇشىن «ديپلوممەن – اۋىلعا» جوباسى سيفرلىق فورماتقا اۋىستىرىلدى. قازاقستاندىقتاردىڭ جاڭا وتىنىمدەرى otbasybank.kz جىلجىمايتىن مۇلىك پورتالىندا ونلاين تۇردە قابىلدانادى.

ادامداردىڭ بولىمشەگە بارىپ جۇرمەي-اق قىزمەتتەردى الۋىنا وتباسى بانكتىڭ مەملەكەتتىك مالىمەتتەر بازاسىمەن ينتەگراسيالانۋى مەن ۆlockchain تەحنولوگياسىن قولدانۋى سەپ بولدى. «ديپلوممەن – اۋىلعا» جوباسىنا  قاتىسۋ ءۇشىن otbasybank.kz پورتالىنا تىركەلىپ، وتىنىمگە ەسق ارقىلى قول قويۋ قاجەت. بۇل باعدارلاماعا كەز كەلگەن جاستاعى قازاقستاندىق قاتىسا الادى. اۋىلعا ەندى كوشىپ كەلگەن نە بۇرىننان بەرى تۇراتىن، سول جاقتا ءبىرقاتار ماماندىق بويىنشا جۇمىس ىستەپ جاتقان بولۋعا ءتيىس. اتاپ ايتقاندا، دەنساۋلىق ساقتاۋ، ءبىلىم، الەۋمەتتىك قامسىزداندىرۋ، مادەنيەت، سپورت، اگروونەركاسىپ كەشەنى ماماندارى، اۋىلدىق وكرۋگتەر اكىمشىلىكتەرىندە ىستەيتىن مەملەكەتتىك قىزمەتشىلەر (اكىمدەر مەن اكىم ورىنباسارلارىن قوسپاعاندا) قاتىسا الادى.