بۇل تۋرالى ءماجىلىس دەپۋتاتى بەرىك ءابدىعالي ءمالىم ەتتى.
"كونستيتۋسيالىق رەفورما جونىندەگى جۇمىس توبى كونستيتۋسيالىق كەڭەسكە جاڭا كونستيتۋسيا جوباسىنان ءبىرىنشى پرەزيدەنتتىڭ تاريحي ءرولى جونىندەگى باپتى الىپ تاستاۋ جونىندە ۇسىنىس ەنگىزگەن ەدى.
كونستيتۋسيالىق كەڭەس بۇل ۋاجبەن كەلىستى.
جاڭا كونستيتۋسيانىڭ جوباسىنان ءبىرىنشى پرەزيدەنتتىڭ تاريحي ءرولى جونىندەگى باپ الىنىپ تاستالدى.
پرەزيدەنت قاسىم-جومارت توقايەۆ حالىقتىڭ تالابىن ەسكەرىپ وتىر"، – دەدى بەرىك ءابدىعالي.
ايتا كەتەلىك بۇعان دەيىن قازاقستان كونستيتۋسياسىن وزگەرتۋ بويىنشا جۇمىس توبى اتا زاڭعا ەلدىڭ ەكس-پرەزيدەنتى نۇرسۇلتان نازاربايەۆتى "تاۋەلسىز قازاقستاننىڭ نەگىزىن قالاۋشى" دەگەن ستاتۋسپەن ەنگىزۋدى ۇسىنعان. بۇل تۋرالى جۇمىس توبىنىڭ مۇشەسى ەرمەك ءابدىراسىلوۆ مالىمدەگەن بولاتىن.
"جۇمىس توبى بۇل ستاتۋستى كونستيتۋسيادا كورسەتۋدى ۇيعاردى. ياعني، قازاقستاننىڭ ءبىرىنشى پرەزيدەنتى – تاۋەلسىز قازاقستاننىڭ نەگىزىن قالاۋشى. وسى ستاتۋس بەكىتىلەدى"، – دەگەن ەدى ول.
بۇل ۇسىنىس كوپشىلىك تاراپىنان سىنعا ۇشىراپ، حالىق نازاربايەۆتىڭ اتى اتا زاڭعا ەنۋىنە قارسى شىققان.
– نازاربايەۆ – تاۋەلسىز قازاقستاننىڭ نەگىزىن قالاۋشى ەمەس، قازاقستان سوۆەت وداعىنىڭ ىدىراۋىنان قۇرىلدى، – دەگەن ەدى وسى ماسەلەگە وراي پىكىر بىلدىرگەن اقىن ولجاس سۇلەيمەنوۆ.
