زاڭگەر مولداحان ادىلەتحان جامبىل وبلىسىندا التى ادام قازا تاپقان جول اپاتىنا قاتىستى ويىن ايتتى، - دەپ حابارلايدى Dalanews.kz.
زاڭگەر جول اپاتىنا كىنالى – تويوتا الفارد جۇرگىزۋشىلەرى ەكەنىن اتاپ ءوتتى.
«الفارد، مينيۆەن ايدايتىندار قىزىلوردادان استاناعا بارادى، استانادان بەرى ۇيىنە، اۋىلىنا قاراي قايتادى. ۇيىنە كەلىپ، تالىپ ۇيىقتايدى. ادام ءدال سولاي ءومىر سۇرە بەرسە ميى «ءوشىپ» قالادى. قانشا مىقتى بولساڭ دا، جاس بولساڭ دا، قانشاما ەنەرگەتيكالىق سۋسىن ىشسەڭ دە ۇيىقتاپ كەتەسىڭ. سول مينيۆەندەرگە وتىراتىن حالىق، قالاي قورىقپايسىزدار؟ ونىڭ ۇستىنە ۇزاق جول جۇرسەڭىزدەر «الفاردقا» وتىرماڭىزدار.
پوليسيا قىزمەتكەرلەرىنىڭ كولىگىندە ەسكەرتەتىن جارىق (ميگالكا) جانىپ كەلە جاتىر، ول ءوزىنىڭ جولاعىندا ساعاتىنا 90 شاقىرىممەن كەلە جاتادى. «الفارد» قارسى جولاققا شىعىپ كەتەدى، ءبىراق ءوزى ۇيىقتاپ كەتكەن. ەگەر جۇرگىزۋشى ۇيىقتاپ كەتپەگەن بولسا قارسى جولاققا شىقپاس ەدى، سەبەبى پوليسەيدى كورىپ تۇر. قاراپايىم حالىققا ايتارىم، پوليسيا بولماسا تاسجولدا قىرىلىپ قالاسىزدار»، - دەيدى زاڭگەر.
مولداحان ادىلەتحان كوپ جۇرگىزۋشى تاسجولدا اسقان جىلدامدىقپەن جۇرەتىنىن ايتادى.
«پوليسيا جامان» دەگەن تۇسىنىك دۇرىس ەمەس. پوليسيا بولماسا كوشەدە ەمىن-ەركىن جۇرە المايسىڭ. كولىگىڭدى قويساڭ ونى توناپ كەتەدى، كوشەدە كەتىپ بارا جاتساڭ الدەكىمدەر ۇرىپ-سوعىپ، تەلەفونىڭدى الىپ كەتەدى. ۇيىڭدە تىنىش جاتا المايسىڭ، سىرتقا شىعىپ كەتسەڭ قىلمىسكەرلەر ايەلىڭدى زورلاپ كەتەدى. پوليسيا بولماسا باسقا دا قىلمىستار كوبەيەدى. پوليسيا حالىقتىڭ تىنىشتىعىن ويلاپ، كۇزەتەدى. پوليسيا بولماسا بەيبەرەكەت جاعداي بولادى، 90-جىلدارعا ورالامىز. ءقازىر ءبىر جاعداي بولسا نە ىستەيسىز؟ ەشتەڭە ىستەي المايسىز، ەڭ ءبىرىنشى كەزەكتە 102-گە حابارلاساسىز. ولار كەلىپ، كومەكتەسەدى»، - دەيدى مولداحان ادىلەتحان.
ەسكە سالايىق، جامبىل وبلىسىنداعى جانتۇرشىگەرلىك جول اپاتىنان كەيىن قازاقستاندىقتار جامبىل وبلىسىنداعى جانتۇرشىگەرلىك جول اپاتىنان كەيىن تويوتا الفارد ماركالى اۆتوكولىكتەرىنە قارسى شىققان بولاتىن.
جەلى بەلسەندىسى بەكايدار المۇحانوۆ قازاقستاندىقتاردى تويوتا الفارد كولىكتەرىنە مىنبەۋگە شاقىردى.
"بۇكىل جەرگە قاراساڭ وسى كولىك. قازاقستاندا بۇدان باسقا كولىك قالمادى ما؟ نەگە "الفارد" جۇرگىزۋشىلەرىنىڭ كوپشىلىگى تاكسي؟ سىزدەرگە ايتار اقىلىم، "الفارد" اۆتوكولىكتەرىنە مىنبەڭىزدەر. تۇندەگى سۇمدىق جاعدايدا كولىكتىڭ ىشىندەگى ءتورت ادام تىرىدەي جانىپ كەتتى، ەكى پوليسيا قىزمەتكەرى قايتىس بولدى.
كولىكتى تىزگىندەيتىن بەسىكتەن بەلى شىقپاعان جاس بالالار. فارالاردى «ءولتىرىپ» جاعىپ، ىرجىڭ-تىرجىڭ ەتىپ، تاسجولدا وزدەرىنەن باسقا ادام جوق سياقتى ەلىرىپ جۇرەدى. ىشكى ىستەر قىزمەتكەرلەرى ولاردىڭ زاڭعا قايشى ورناتىلعان فارالارىن الىپ تاستاۋى ءتيىس. تاعى دا ايتا كەتەيىن، ەۋروپا ەلدەرىندە جۇك كولىگى جۇرگىزۋشىلەرىنە تاحوگراف (جۇرگىزۋشىلەردىڭ قوزعالىسىن تىركەۋگە ارنالعان مەحانيكالىق نەمەسە ەلەكتروندى باقىلاۋ قۇرالى) قويىلادى. تويوتا الفاردتارعا دا ءدال وسىنداي قۇرىلعى قويۋ كەرەك، ولار اتالعان چيپ-كارتامەن زاڭدى بۇزباي ايداۋى ءتيىس. ءار قالادان كەلگەن سايىن پوليسيا قىزمەتكەرلەرى الفارد يەلەرىن تەكسەرسىن»، - دەيدى بلوگەر.
بەكايدار المۇحانوۆ "الفارد" يەلەرىنىڭ كولىكتى باسقارۋ تەحنيكاسى دۇرىس ەمەس ەكەنىن ايتادى.
"كولىكتىڭ گازىن تۇبىنە دەيىن باسپاسا، الفارد دا جىن قۋعانداي جۇرمەس ەدى. كولىكتى جايمەن، بايسالدى ايدايتىن جۇرگىزۋشىلەر دە بار. الايدا قازىرگى كۇنى وسى كولىكتى تىزگىندەگەندەردىڭ دەنى جاس بالالار. وسى تۋراسىندا پوليسيادان ماڭىزدى اقپارات الدىم. تويوتا الفاردتىڭ رولىندە كوبىنە-كوپ 2000 جىلداردىڭ باس كەزىندە ومىرگە كەلگەن بۋىن وتىر"، - دەيدى بلوگەر.
جامبىل وبلىسى پوليسيا دەپارتامەنتىنىڭ حابارلاۋىنشا، 17 تامىز كۇنى تۇنگى ساعات 01:00 شاماسىندا رەسپۋبليكالىق ماڭىزى بار مەركى-شۋ-بۋرىلبايتال تاس جولىنىڭ 34ء-شى شاقىرىمىندا، مەركى اۋدانىنا قاراستى ءتاتتى اۋىلىنىڭ ماڭىندا جول-كولىك وقيعاسى بولعان. تoyota Alfard مينيۆەنى مەن Skoda-Octavia پوليسيا كولىگى بەتپە-بەت سوقتىعىسىپ، مينيۆەن ورتەنىپ كەتكەن.
تويوتا الفارد كولىگىندە 8 جولاۋشى بولعان. ولاردىڭ تورتەۋى سول جەردە قازا بولىپ، ءۇش جولاۋشى مەن جۇرگىزۋشى ءارتۇرلى دارەجەدەگى دەنە جاراقاتتارىمەن اۋداندىق ورتالىق اۋرۋحاناعا جاتقىزىلدى.
بۇل دەرەك بويىنشا ق ر قك 345-بابى 4-بولىگىمەن سوتقا دەيىنگى تەرگەۋ باستالدى. پوليسيا مۇقيات تەرگەۋ جۇرگىزىپ، وقيعانىڭ ءمان-جايىن انىقتاۋ بويىنشا بارلىق قاجەتتى شارالاردى قابىلداۋدا.
