جامبىل وبلىسىندا بولعان كۇشتى جەل ءبىرقاتار ەلدى مەكەندەرگە زيانىن تيگىزدى. اسىرەسە ت. رىسقۇلوۆ اۋدانى اۋماعىندا ەكپىنى سەكۋندىنا 30 مەترگە دەيىن جەتكەن داۋىل الەۋمەتتىك نىساندار مەن تۇرعىن ۇيلەردىڭ شاتىرلارىن ۇشىرىپ، ينفراقۇرىلىمعا زاقىم كەلتىردى، دەپ حابارلايدى Dalanews.kz

الدىن الا مالىمەتكە سايكەس، جەتى ەلدى مەكەندە جالپى سانى 29 نىساننىڭ شاتىرى بۇلىنگەن. ونىڭ ىشىندە 10-ى – مەكتەپتەر مەن باسقا دا الەۋمەتتىك ماڭىزى بار عيماراتتار. قاتتى جەل سالدارىنان 19 ەلدى مەكەندە ەلەكتر جارىعى ءوشىپ، 7 اۋىلدا گاز قۇبىرىنىڭ جۇمىسى ۋاقىتشا توقتاتىلدى.

ابىروي بولعاندا، تابيعي اپاتتان زارداپ شەككەندەر مەن قازا تاپقاندار تىركەلمەگەن.

ءقازىر ايماقتا قالپىنا كەلتىرۋ جۇمىستارى ءجۇرىپ جاتىر. ەلەكتر جانە گاز جەلىلەرىن جوندەۋ ءۇشىن ارنايى بريگادالار جۇمىلدىرىلعان. ماماندار ءبىرىنشى كەزەكتە جارىق پەن گازدى تولىق قالپىنا كەلتىرۋدى، سونداي-اق بۇلىنگەن نىسانداردى ءقاۋىپسىز جاعدايعا كەلتىرۋدى قولعا العان. زالال كولەمى ناقتىلانىپ جاتىر.

جەرگىلىكتى بيلىك جاعدايدى باقىلاۋعا الىپ، الەۋمەتتىك نىسانداردىڭ جۇمىسىن قالىپقا كەلتىرۋدى جەدەلدەتۋگە ۋادە بەردى.