رەسەيلىك ينۆەستور «ەۆروحيم» قازاقستاندا مينەرالدى تىڭايتقىشتار شىعاراتىن ءىرى زاۋىت سالادى، - دەپ حابارلايدى Dalanews.
جامبىل وبلىسىندا حيميا كەشەنىن جوبالاۋ، سالۋ جانە پايدالانۋعا بەرۋ تۋرالى كەلىسىم-شارتقا رەسەيلىك «ەۆروحيم» جانە قىتايدىڭ جۇڭگو ۇلتتىق ينجينيرينگتىك كومپانياسى (CNCEC) قول قويدى.
«ازىق-تۇلىك قاۋىپسىزدىگى جەردىڭ نەمەسە سۋدىڭ بولۋىمەن عانا شەكتەلمەيدى. بۇل ونىڭ نەگىزگى ىرگەتاسى، ءبىراق شىن مانىندە ازىق-تۇلىك قاۋىپسىزدىگىن قامتاماسىز ەتۋ ءۇشىن تىڭايتقىش قاجەت. سوندىقتان ءبىز ءۇشىن بۇل وتە ماڭىزدى جوبا. ءبىز ونى ەۋروحيممەن جانە قىتايلىق سەرىكتەستەرمەن بىرىگىپ جۇزەگە اسىرامىز. بۇل وتە ۇلكەن ەۋرازيالىق كووپەراسيانىڭ ەڭ جاقسى مىسالى. وڭىرلىك ازىق-تۇلىك قاۋىپسىزدىگى ءۇشىن بۇل وتە ۇلكەن وقيعا»، - ءدىد ونەركاسىپ جانە قۇرىلىس ءمينيسترى قانات شارلاپايەۆ كەلىسىمشارتقا قول قويۋ راسىمىندە.
زاۋىتتىڭ قۋاتى جىلىنا 1 ملن توننادان استام مينەرالدى تىڭايتقىشتار مەن ونەركاسىپتىك ونىمدەردى وڭدەۋ. كاسىپورىندا 2،4 مىڭنان استام جاڭا جۇمىس ورنى قۇرىلادى جانە جۇمىسپەن قامتىلعانداردىڭ كەمىندە 80%-ى قازاقستان ازاماتتارى بولادى.
«قازاقستان – ورتالىق ازيا نارىعىنداعى «ەۆروحيم» ءۇشىن نەگىزگى ەل، ءبىز ءۇشىن ينۆەستور رەتىندە اسا تارتىمدى. ءبىز جاڭا كەشەننىڭ تىڭايتقىشتارى اۋىل شارۋاشىلىعى سالاسى مەن ەلدىڭ ەكسپورتتىق الەۋەتىن دامىتۋدا ماڭىزدى ءرول اتقارادى دەپ سانايمىز. مەنشىكتى ديستريبۋسيا جەلىسى جانە ءبىزدىڭ «كەنىشتەن فەرماعا دەيىن» قاعيداتى ديقانداردىڭ جوعارى ساپالى تىڭايتقىشتارعا قول جەتكىزۋىن قامتاماسىز ەتە وتىرىپ، قازاقستاننىڭ جانە وزگە دە ەلدەردىڭ اۋىل شارۋاشىلىعى ونىمدەرىن ءوندىرۋ كولەمىن ۇلعايتۋعا ىقپال ەتەدى»، - دەدى «ەۆروحيم» توبىنىڭ پرەزيدەنتى ولەگ شيريايەۆ.
جالپى، قازاقستانداعى رەسەيلىك ينۆەستوردىڭ ينۆەستيسيالىق جوباسى ءۇش كەزەڭنەن تۇرادى. ءبىرىنشى جوبانىڭ اياسىندا جىلىنا 640 مىڭ توننا فوسفوريت ۇنىن وندىرەتىن تاۋ-كەن كەشەنى سالىندى. ەكىنشى كەزەڭ 2026 جىلى پايدالانۋعا بەرىلەتىن كۇكىرت قىشقىلى ءوندىرىسىنىڭ قۇرىلىسىن، ال ءۇشىنشى كەزەڭ – 2027 جىلى ىسكە قوسىلاتىن حيميالىق كەشەن قۇرۋدى كوزدەيدى. وسىلايشا، ينۆەستيسيالاردىڭ جالپى كولەمى $1 ملرد بولادى.
«ەۆروحيم» - رەسەيدەگى مينەرالدى تىڭايتقىشتار وندىرىسىندەگى ەڭ ءىرى ينۆەستور. سوڭعى بىرنەشە جىلدا كومپانيا رف ءبىرقاتار جاڭا وندىرىستىك قۋاتتى ىسكە قوستى، سونىمەن قاتار لەنينگراد وبلىسىنداعى ەۆروحيم – سولتۇستىك-باتىس-2، ستاۆروپول ولكەسىندە كاليي نيتراتىن وندىرەتىن اممياك پەن كارباميد وندىرەتىن زاۋىتتىڭ قۇرىلىسىن جۇرگىزۋدە. 2024 جىلدىڭ ناۋرىز ايىندا كومپانيا برازيليادا فوسفاتتى تىڭايتقىش وندىرەتىن زاماناۋي كەشەن اشتى.
CNCEC – مۇناي-حيميا سالاسى كاسىپورىندارىن، ونىڭ ىشىندە قازاقستاندا قۇرىلىس سالۋ تاجىريبەسى مول جەتەكشى ونەركاسىپتىك ينجينيرينگتىك كومپانيانىڭ ءبىرى.
