الەۋمەتتىك جەلىدە توميريس پاتشايىمنىڭ كيىمىن كيگەن ەمشىنىڭ مەكتەپكە بارعان ۆيدەوسى تارادى. بەينەجازبادا ونىڭ جامبىل وبلىسىنداعى اۋىلداردىڭ بىرىندە ۇرانداتىپ كەلە جاتقانىن بايقاۋعا بولادى. بۇل كورىنىس كوپشىلىكتىڭ اشۋىن تۋدىردى، دەپ حابارلايدى Dalanews.kz.
الەمجەلىدە تاراعان مالىمەتتەرگە سۇيەنسەك، جامبىل وبلىسى تۇرار رىسقۇلوۆ اۋدانى تەرەڭوزەك اۋىلىندا گۇلسارا سۋاز قىزى كەلىپ كەتكەننەن كەيىن داۋ شىققان. “توميريس” ەسىمىمەن تانىلعان ەمشىنى كۇتىپ الۋ ءۇشىن مۇعالىمدەردەن 4 مىڭ تەڭگەدەن جيناعان. ال جەرگىلىكتى تۇرعىندار سول قاراجاتپەن وعان قۇرمەت كورسەتكەن.
كوپشىلىكتىڭ سىنىنا ىلىككەن وقيعاعا قاتىستى تەرەڭوزەك اۋىلدىق وكرۋگىنىڭ اكىمى قانات سمات پىكىر ءبىلدىردى.
“قوناقتاردى كۇتىپ الۋ، جاتار ورىنعا جايعاستىرۋ، داستارحان شىعىندارىنا اۋدان اكىمدىگىنىڭ دە، ءبىزدىڭ دە ەش قاتىسىمىز جوق”، - دەپ جاۋاپ بەردى اۋىل اكىمى تuraninfo.kz اگەنتتىگىنىڭ جۋرناليستەرى جولداعان ساۋالعا.
ال مەكتەپ باسشىلىعى ۇستازداردان ەمشىنى كۇتىپ الۋ ءۇشىن اقشا جينالعانىن راستادى. ونىڭ قۇرمەتىنە وراي مەكتەپ تاراپىنان “تۋعان جەرگە تاعزىم” — “مەكتەپكە جول!” رەسپۋبليكالىق قايىرىمدىلىق اكسيالارى اياسىندا ءىس-شارا ۇيىمداستىرىلعان.
“توميريس” لاقاپ اتىن ەنشىلەگەن ەمشى ءوزىن ق ر دەنساۋلىق ساقتاۋ سالاسىنىڭ ۇزدىگى، مەديسينا عىلىمدارىنىڭ دوكتورى، پروفەسسور، ميشەل نوسترادامۋس اتىنداعى پروسكوپيا عىلىمدارىنىڭ اكادەميگى دەپ تانىستىرعان.
وسى تۇستا Dalanews بەلگىلى جۋرناليست گۇلميرا ءابىقايدىڭ جازباسىنا دا نازار اۋداردى. ونىڭ ايتۋىنشا، باقسىنىڭ 4 مەترلىك شلەيفى بار كويلەگىن وقۋشىلار كوتەرىپ جۇرگەن. ەڭ قىزىعى ول مەكتەپكە كومەكتەسەمىن دەپ، ونىڭ ورنىنا مەكتەپكە جىرتىلعان كيىم، سىنعان ويىنشىقتار مەن ىسكە جارامايتىن كومپيۋتەر بەرگەن كورىنەدى.
جامبىل وبلىسىنىڭ ءبىلىم بەرۋ باسقارماسى اتالمىش جاعدايعا بايلانىستى تولىققاندى تەكسەرىس جۇرگىزىلەتىنىن مالىمدەدى.
"تۇرار رىسقۇلوۆ اۋدانىنداعى جامبىل اتىنداعى ورتا مەكتەپ باسشىلىعىنىڭ مالىمەتىنشە، مەكتەپ تۇلەگى كوپبايەۆا گۇلسارا سۋاز قىزى از قامتىلعان وتباسىنان شىققان 100 وقۋشىعا قايىرىمدىلىق جاسايتىنىن ايتقان. 29 تامىزدا تەرەڭوزەك اۋىلىنداعى مادەنيەت ۇيىندە "تۋعان جەرگە تاعزىم" اتتى اكسيا وتكەن. وندا اۋىل تۇرعىندارى دا قاتىسقان. بۇل دەرەك بويىنشا ءبىلىم باسقارماسى تەكسەرىس جۇرگىزىپ جاتىر جانە قاجەت شارا قابىلداناتىن بولادى"، – دەلىنگەن رەسمي اقپاراتتا.
