Áleýmettik jelide Tomiris patshaiymnyń kiimin kigen emshiniń mektepke barǵan videosy tarady. Beinejazbada onyń Jambyl oblysyndaǵy aýyldardyń birinde urandatyp kele jatqanyn baiqaýǵa bolady. Bul kórinis kópshiliktiń ashýyn týdyrdy, dep habarlaidy Dalanews.kz.
Álemjelide taraǵan málimetterge súiensek, Jambyl oblysy Turar Rysqulov aýdany Tereńózek aýylynda Gúlsara Sýazqyzy kelip ketkennen keiin daý shyqqan. “Tomiris” esimimen tanylǵan emshini kútip alý úshin muǵalimderden 4 myń teńgeden jinaǵan. Al jergilikti turǵyndar sol qarajatpen oǵan qurmet kórsetken.
Kópshiliktiń synyna ilikken oqiǵaǵa qatysty Tereńózek aýyldyq okrýginiń ákimi Qanat Smat pikir bildirdi.
“Qonaqtardy kútip alý, jatar orynǵa jaiǵastyrý, dastarhan shyǵyndaryna aýdan ákimdiginiń de, bizdiń de esh qatysymyz joq”, - dep jaýap berdi aýyl ákimi Turaninfo.kz agenttiginiń jýrnalisteri joldaǵan saýalǵa.
Al mektep basshylyǵy ustazdardan emshini kútip alý úshin aqsha jinalǵanyn rastady. Onyń qurmetine orai mektep tarapynan “Týǵan jerge taǵzym” — “Mektepke jol!” respýblikalyq qaiyrymdylyq aktsiialary aiasynda is-shara uiymdastyrylǵan.
“Tomiris” laqap atyn enshilegen emshi ózin QR densaýlyq saqtaý salasynyń úzdigi, meditsina ǵylymdarynyń doktory, professor, Mishel Nostradamýs atyndaǵy Proskopiia ǵylymdarynyń akademigi dep tanystyrǵan.
Osy tusta Dalanews belgili jýrnalist Gúlmira Ábiqaidyń jazbasyna da nazar aýdardy. Onyń aitýynsha, baqsynyń 4 metrlik shleifi bar kóilegin oqýshylar kóterip júrgen. Eń qyzyǵy ol mektepke kómektesemin dep, onyń ornyna mektepke jyrtylǵan kiim, synǵan oiynshyqtar men iske jaramaityn kompiýter bergen kórinedi.
Jambyl oblysynyń Bilim berý basqarmasy atalmysh jaǵdaiǵa bailanysty tolyqqandy tekseris júrgiziletinin málimdedi.
"Turar Rysqulov aýdanyndaǵy Jambyl atyndaǵy orta mektep basshylyǵynyń málimetinshe, mektep túlegi Kópbaeva Gúlsara Sýazqyzy az qamtylǵan otbasynan shyqqan 100 oqýshyǵa qaiyrymdylyq jasaitynyn aitqan. 29 tamyzda Tereńózek aýylyndaǵy Mádeniet úiinde "Týǵan jerge taǵzym" atty aktsiia ótken. Onda aýyl turǵyndary da qatysqan. Bul derek boiynsha Bilim basqarmasy tekseris júrgizip jatyr jáne qajet shara qabyldanatyn bolady", – delingen resmi aqparatta.
