جامبى اتۋدان ۇلتتىق قۇرامامىز 5ء-شى دۇنيەجۇزىلىك كوشپەندىلەر ويىندارىندا ەل نامىسىن قورعايتىن ۇزدىك تورتتىكتى انىقتادى. ەلىمىزدىڭ ەڭ ۇزدىك 10 جامبى اتۋشىسى كوشپەندىلەر ويىندارىنا تىكەلەي جولداما بەرەتىن 3 ورىندى ساراپقا سالىپ، ىرىكتەۋ ويىندارىنا قاتىستى، – دەپ حابارلايدى Dalanews.kz ق ر ۇلتتىق سپورت قاۋىمداستىعىنىڭ باسپا ءسوز قىزمەتىنە سىلتەمە جاساپ.
مەرگەندەرىمىز «ماجار»، «ازيا»، «تۇركى»، «جامبى» ستيلدەرى بويىنشا ب ا ق سىنادى. جالپى ەسەپتى قورىتىندىلاي كەلە، 1-ورىندى ايتبەك سارىباي، 2-ورىن ابزال تۇلىبەكوۆ، ال سوڭعى جولدامانى ەرالحان ايكوز ۇتىپ الدى. ايتا كەتەيىك، الەم چەمپيونى باتىر بەكساۋىت كوشپەندىلەر ويىندارىنا تىكەلەي جولداما العان ەدى.
«ىرىكتەۋ سايىستارى وتە تارتىستى ءوتتى. ال ەندى ءبىز الداعى 5ء-شى دۇنيەجۇزىلىك ويىندارىندا التىن الۋ ءۇشىن بارىمىزدى سالامىز. ەل نامىسىن ابىرويمەن قورعاۋعا ۋادە بەرەمىن»، - دەدى جامبى اتۋدان ۇلتتىق قۇراما سپورتشىسى ەرالحان ايكوز.
وسىلايشا جامبى اتۋدان 5ء-شى دۇنيەجۇزىلىك كوشپەندىلەر ويىندارىنا قاتىساتىن قازاقستان ۇلتتىق قۇراماسى:
- ەرالحان ايكوز - 1998 جىلى 5 ماۋسىندا تۇركىستان وبلىسى، تولە بي اۋدانى، مايبۇلاق اۋىلىندا دۇنيەگە كەلگەن. 2021 ج. تەگەرانداعى XVI الەم چەمپيوناتىنىڭ جەڭىمپازى جانە كۇمىس جۇلدەگەرى؛
- باتىر بەكساۋىت - 2001 جىلدىڭ 8 تامىزىندا تۇركىستان وبلىسى، تولە بي اۋدانى، مايبۇلاق اۋىلىندا دۇنيەگە كەلگەن. 2021 جىلى جاستار اراسىنداعى ق ر چەمپيوناتىندا 1-ورىن، شىمكەنتتە وتكەن ازيا چەمپيوناتىنىڭ التىن جانە قولا جۇلدەگەرى، قىتايدا وتكەن الەم چەمپيوناتىنىڭ التىن جانە قولا جۇلدەگەرى؛
- ايتبەك سارىباي – 1998 جىلى 30 قاڭتاردا، تۇركىستان وبلىسى، تولە بي اۋدانى، مايبۇلاق اۋىلىندا دۇنيەگە كەلگەن. 2019 ج. وڭتۇستىك كورەيادا وتكەن XV الەم چەمپيوناتىنىڭ جەڭىمپازى جانە قولا جۇلدەگەرى، قىتايدا وتكەن الەم چەمپيوناتىنىڭ كۇمىس جۇلدەگەرى؛
- ابزال تۇلىبەكوۆ – 1996 جىلى 31 قازاندا الماتى وبلىسىندا دۇنيەگە كەلگەن. 2018 جىلى جامبى اتۋدان الەم چەمپيوناتىنىڭ جەڭىمپازى.
قازىرگى ۋاقىتتا سپورتشىلارىمىز 6 تامىز كۇنى الاتاۋ بوكتەرىندە باستالعان وقۋ-جاتتىعۋ جيىنىندا. جاتتىعۋ 18 تامىزعا دەيىن جالعاسادى. وقۋ-جاتتىعۋ جيىندارىن ق ر تۋريزم جانە سپورت مينيسترلىگىنىڭ ۇلتتىق جانە ات سپورتى تۇرلەرى ورتالىعى ۇيىمداستىرىپ وتىر.
«دايىندىعىمىز وتە جوعارى دەڭگەيدە. 70-80 پايىز دايىنبىز دەپ ايتا الامىن. ءالى جۇمىس ىستەۋ كەرەك تۇستارىمىز بار. كوشپەندىلەر ويىندارىنا 4 سپورتشىمىز جولداما الدى. ولارمەن ارى قاراي دايىندىقتى قىزدىرا تۇسەمىز. 5ء-شى دۇنيەجۇزىلىك كوشپەندىلەر ويىندارى ۇلتتىق سپورت ءۇشىن وليمپيادا دەپ ايتساق تا بولاتىن شىعار»، - دەپ اتاپ ءوتتى جامبى اتۋدان ۇلتتىق قۇرامانىڭ باس باپكەرى ەلدوس باداشيەۆ.
ال، 5ء-شى دۇنيەجۇزىلىك كوشپەندىلەر ويىندارى الدىنداعى قورىتىندى وقۋ-جاتتىعۋ جيىنى 27 تامىز بەن 7 قىركۇيەك ارالىعىندا استانادا وتەدى.
ەسكە سالا كەتەيىك، رەسپۋبليكالىق «جامبى اتۋ» فەدەراسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە «اۋدارىسپاق»، «كوكپار»، «تەڭگە ءىلۋ»، «ساداق اتۋ»، «بايگە»، «قۇسبەگىلىك»، «اسىق اتۋ»، «JORYQ» ات سپورتى جانە ت.ب. فەدەراسيالار بار. ق ر ۇلتتىق سپورت قاۋىمداستىعىن يسلامبەك سالجانوۆ باسقارادى.
ايتا كەتەرلىگى، 8-13 قىركۇيەكتە استانا قالاسىندا 5ء-شى دۇنيەجۇزىلىك كوشپەندىلەر ويىندارى وتەدى. ءىس-شاراعا 89 ەلدەن 2000-نان استام سپورتشى قاتىسادى دەپ جوسپارلانۋدا. 5ء-شى دۇنيەجۇزىلىك كوشپەندىلەر ويىندارىنىڭ باس دەمەۋشىسى - ALAGEUM ELECTRIC، ويىنداردىڭ باس سەرىكتەسى - Halyk Bank. استانادا وتەتىن دۇنيەجۇزىلىك كوشپەندىلەر ويىندارىندا بارلىعى 21 سپورت تۇرىنەن 97 مەدال جيىنتىعى ساراپقا سالىنادى.
