جۋىردا تانىمال قايىرىمدىلىق قوردىڭ جەتەكشىسى ءىلياس سارييەۆ ۇستالعانى تۋرالى اقپارات تارادى. جۋرناليست رۋسلان وتەپباي جاڭا دەرەكتى ءبولىستى، - دەپ حابارلايدى Dalanews.kz.

ونىڭ سوزىنشە، ءىلياس سارييەۆ جانسۇلۋ ەسىمدى كەلىنشەككە اۋديو جىبەرگەن، ماقساتى جالعىزباستى اناعا نەسيە الدىرۋ بولعان. الايدا جانسۇلۋ نەسيە الىپ بەرە المايتىنىن ايتقان.

"ءبىراق ءىلياس اناسى اۋىرىپ جاتقانىن الدىعا تارتىپ، ءوتىنىش ەمەس، كەلىنشەككە تالاپ قويادى. جانسۇلۋ ءىلياسقا قۇدايداي سەنىپ، ونىڭ تۋعان قارىنداسىنا 2 ميلليون تەڭگە نەسيە الىپ بەرەدى. الايدا ول قىز ءىلياستىڭ قارىنداسى ەمەس، ءسىز بەن بىزگە تانىس اقتوتى بولىپ شىعادى. ەڭ سوراقاسى اقتوتى كەلىنشەكتىڭ تەلەفونىن الىپ، باسقا بانكتان تاعى دا 1 ميلليون تەڭگە نەسيە شىعارىپ، دەرەۋ ءوزىنىڭ شوتىنا اۋدارىپ الادى. مۇنى جانسۇلۋ تەك كەلەسى كۇنى بايقايدى"، - دەدى جۋرناليست.

ءجۋرناليستىڭ ايتۋىنشا، بۇل دەرەك بويىنشا دا اقتوتى مەن ءىلياستىڭ ۇستىنەن قىلمىستىق ءىس قوزعالعان.

بلوگەر نەلىكتەن ۇستالدى؟

"ەلگە كومەك بەر" قايىرىمدىلىق قورىنىڭ جەتەكشىسى ءىلياس سارييەۆ ۇستالعانىن العاشىندا زاڭگەر نۇرسۇلتان ورىنبەكوۆ مالىمدەدى. ونىڭ سوزىنشە، جۇرتتان سارييەۆتىڭ ۇستىنە ارىز تۇسكەن.

"قازاق روبين گۋد ءىلياس سارييەۆ الاياقتىق بابى بويىنشا ۇستالدى. الماتىدان وسىنداي حابار كەلدى. بىرنەشە ادامنان الاياقتىق ارەكەتى بويىنشا ارىز تۇسكەن ەدى. ءقازىر سول بويىنشا ۇستالعانى بەلگىلى بولدى. الدانعاندار بولسا، الماتى ىىد-نە ارىزدانساڭىزدار بولادى"، - دەدى ول.

ارتىنشا Dalanews.kz الماتى پوليسيا دەپارتامەنتىنە ساۋال جولداپ، رەسمي اقپارات تا الدى.

"المالى اۋداندىق پب-نا قاراستى پوليسيا ءبولىمى الاياقتىق دەرەگى بويىنشا قىلمىستىق ءىس قوزعادى. جان-جاقتى جانە وبەكتيۆتى تەرگەۋگە باعىتتالعان تەرگەۋ شارالارى جۇرگىزىلىپ جاتىر. ولاردىڭ قورىتىندىسى بويىنشا پروسەسسۋالدىق شەشىم قابىلدانادى"، - دەپ جازىلعان الماتى پوليسيا دەپارتامەنتىنىڭ بۇعان دەيىنگى جاۋابىندا.