14 جىلعا سوتتالعان جاكىشيەۆ جازاسىنىڭ 10 جىلىن وتەگەن بولاتىن. سوت سوندا دا يلىكپەدى.
سوتتىڭ مالىمەتىنشە، جاكىشيەۆ ءبىرقاتار اۋىر جانە اسا اۋىر قىلمىستار بويىنشا ايىپتى دەپ تانىلعان. اتاپ ايتقاندا، بوتەننىڭ مۇلكىن ۇرلاۋ، پارا الۋ، الاياقتىق جاساۋ، قىزمەت بابىن اسىرا پايدالانۋ، قۇجاتتاردى قولدان جاساۋ سىندى باپتارمەن سوتتالىپ، وعان 14 جىلعا باس بوستاندىعىنان ايىرۋ جازاسى كەسىلگەن.
– بۇل اراداعى جالپى شىعىن 99،6 ملرد تەڭگەنى قۇرايدى. جاكىشيەۆ كەلتىرىلگەن وسى زالالدى وتەمەگەن. وسى فاكتىنى سوت نازارعا الا وتىرىپ، ونىڭ شارتتى تۇردە مەرزىمىنەن بۇرىن بوساتۋ تۋرالى ءوتىنىشىن قاناعاتتاندىرۋدان باس تارتۋعا تۇرتكى بولدى، – دەپ اتاپ ءوتتى سوتتاعىلار.
بۇل ورايدا جاكىشيەۆتىڭ «قازاتومپرومداعى» ءارى ارىپتەسى، ءارى ۇزەڭگىلەسى بولعان عالىم نازاروۆتىڭ مۇحتار قاماۋعا الىنعان العاشقى كەزدەگى سۇحباتىن نازارلارىڭىزعا ۇسىنامىز. «جاس الاشقا» جەدەل سۇحبات بەرگەن عالىم نازاروۆ «مۇحتار جاكىشيەۆتىڭ جازىعى جوق» دەگەن بولاتىن.
– عالىم باعدات ۇلى، بىرەۋلەر «م.جاكىشيەۆ قاماۋعا ءتۇستى» دەيدى. باس پروكۋراتۋرا وكىلى بولسا، «ءبىز ەشتەڭە بىلمەيمىز» دەدى. سىزگە وسى ءىستىڭ جايى بەلگىلى مە (سۇحبات جەكسەنبى كۇنى الىندى)؟
– وكىنىشكە كاراي، مۇحتاردى قاماۋعا العانى راس.
– سوندا مۇحتار جاكىشيەۆتى كىم ۇستاعان؟
– مەنىڭ بىلۋىمشە، ول ۇلتتىق قاۋىپسىزدىك كوميتەتىنىڭ تەرگەۋ يزولياتورىندا جاتىر.
– نە ءۇشىن قاماۋعا الىنعان؟
– ەكس-دەپۋتات ت.كۆياتكوۆسكايانىڭ مالىمدەمەسى بويىنشا ۇستاعان سەكىلدى.
– ءسىز وسى كومپانيادا قاشاننان بەرى جۇمىس ىستەيسىز؟
– 2001 جىلدان بەرى.
– دەمەك، «كازاتومپرومنىڭ» قىزمەتىن ءبىر كىسىدەي بىلەسىز عوي. ءوزىڭىز ت.كۆياتكوۆسكايانىڭ مالىمدەمەسىن قالاي قابىلدادىڭىز؟
– مەن كومپانيانىڭ قارجى دەپارتامەنتىندە قىزمەت ەتەمىن. ۆيسە-پرەزيدەنتى ەمەسپىن. باسشىلىقتاعىلار بىلەتىن بار اقپاراتتى بىلە بەرمەيمىن. دەگەنمەن ت.كۆياتكوۆسكايانىڭ مالىمدەمەسىندە تۇيىردەي نەگىز جوق. بوس ساندىراق دەسە دە بولادى.
نەگە دەسەڭىز، ەكى جىل بۇرىن كومپانيادا كەشەندى تۇردە تەكسەرۋ ءجۇردى. ءدال وسى ت.كۆياتكوۆسكايانىڭ تۋرا وسى مالىمدەمەسى بويىنشا.
قارجى، ەسەپ كوميتەتىندەگى اۋديتورلىق تەكسەرۋ، ۇقك، پروكۋراتۋرا سەكىلدى ءتۇرلى مەملەكەتتىك ورىندارى جۇرگىزگەن بۇل تەكسەرىس ءبىر جىلعا سوزىلدى. وسى تەكسەرىستەردە كومپانيادا ەشقانداي زاڭسىزدىقتىڭ بولماعانى انىقتالدى.
كومپانيادا جەكە ادامداردىڭ اكسياسى بولعان ەمەس. ءقازىر دە كومپانيانىڭ 100 پايىز اكسياسى «سامۇرىق-قازىنا» قورىنىڭ قولىندا.
ياعني جەر قويناۋىنا شەتەلدىكتەردىڭ كەلۋى جوعارعى باسشىلىقتىڭ رۇقساتىمەن عانا جۇزەگە اسادى. «قازاتومپروم» ءوز قالاۋى بويىنشا مۇلكىن اركىمگە ءبولىپ بەرە سالاتىن جەكەمەنشىك كومپانيا ەمەس. بىزدە ديرەكتورلار كەڭەسى بار. قۇرامىنا ۇكىمەتتىڭ، ءتيىستى مينيسترلىكتەردىڭ باسشىلارى كىرەدى. تابىستىڭ بارلىعى سول كەڭەستە تالقىلانادى.
ىس-ارەكەتىنىڭ ءبارى مەملەكەتتىڭ قاداعالاۋىنداعى كومپانيانىڭ باسشىلىعىن عانا قۋدالاپ، ايىپتاۋ اقىلعا سىيمايتىن قىلىق. م.جاكىشيەۆ بارلىق ۋاقىتتا كومپانيانىڭ جۇزەگە اسىراتىن بار جۇمىسىن جوعارعى جاقپەن اقىلداسىپ شەشتى. ءوز بەتىنشە ارەكەت ەتكەن ەمەس. م.جاكىشيەۆتىڭ ەشقانداي كىناسىنىڭ جوقتىعىنا سەنىمدىمىن. جانە ەكس-دەپۋتاتتىڭ مالىمدەمەسىن اققا كۇيە جاعۋ دەپ بىلەمىن.
