ايتا كەتەلىك 3 ناۋرىز كۇنى سەمەيدە «قازاتومونەركاسىپ» كومپانياسىنىڭ بۇرىنعى باسشىسى مۇحتار جاكىشيەۆتىڭ ىسىنە قاتىستى سوتى وتىرىسى ءوتتى.
سوت وتىرىسىندا جاكىشيەۆ بولمادى، ول تۇرمەدەن ۆيدەوبايلانىسقا شىقتى.
– بۇل – شارتتى تۇردە مەرزىمىنەن بۇرىن بوساتۋعا بەرىلگەن ءوتىنىش بويىنشا قارالىپ جاتقان ءۇشىنشى سوت ءىسى. بۇل شەشىمدى قاراستىرىپ جاتقان سوت بيلىكتىڭ ماڭىزدى تارماعى جانە قوعامنىڭ وكىلى دەپ سانايمىن... مەنى قولداۋعا كەلگەن كوپ ادامداردى كورىپ تۇرمىن. وسى ادامدارعا جانە ەلىمنىڭ جالپى قولداۋىنا سۇيەنە وتىرىپ، ءسىز ءوز سۇراقتارىڭىزعا (سوتتالۋشىنىڭ قاۋىپتىلىگى تۋرالى – رەد.) جاۋاپ الا الاسىز دەپ ويلايمىن، – دەگەن ەدى.
«مەنىڭ قازاقستان ازاماتى رەتىندەگى باستى ءوتىنىشىم – قازاقستان رەسپۋبليكاسىندا قابىلدانعان زاڭدار ماعان قولدانىلسا دەيمىن»، – دەگەن ەدى مۇحتار جاكىشيەۆ.
بۇگىندە مۇحتار جاكىشيەۆتى قولداۋشىلار تۇزەۋ مەكەمەسىنىڭ الدىنا جينالىپ، ونىڭ بوستاندىققا شىققانىن كۇتتى.
مۇحتار جاكىشيەۆ بوستاندىققا شىققان بەتىندە جينالعان قولداۋشىلارمەن از عانا ۋاقىتقا كەزدەسىپ، وزىنە قولداۋ كورسەتكەنىنە العىس ءبىلدىردى.
