19 جەلتوقسان كۇنى تۇركىستان قالاسىنىڭ بىرنەشە تۇرعىنى وبلىس اكىمى ج.تۇيمەبايەۆتىڭ قابىلداۋىندا بولدى.

تارقاتا ايتساق، وبلىس ورتالىعى بولعان تۇركىستان قالاسىندا جاڭا جوسپارعا سايكەس كوپتەگەن قۇرىلىس نىساندارى سالىنادى دەپ جوسپارلانىپ وتىر.

وسىعان وراي، سيتۋاسيالىق سىزباداعى 98 گەكتار جەردى قۇرايتىن ەكىنشى ايماق اتالاتىن «رۋحاني-مادەني ورتالىق» ايماعىنا قاجەتتى جەردى دايىنداۋ ماقساتىندا  مەملەكەت مۇقتاجدىعى ءۇشىن 171 نىساندى (13 كاسىپكەرلىك، 158 تۇرعىن ءۇي) قالا اكىمىنىڭ 2018 جىلعى 16-قازانداعى №1370 جانە 27-قاراشاداعى №1604 ««مەملەكەتتىك مۇقتاجدىق ءۇشىن جەر ۋچاسكەلەرىن نەمەسە وزگە دە جىلجىمايتىن مۇلىكتەردى ماجبۇرلەپ يەلىكتەن شىعارۋدىڭ باستالۋى تۋرالى قاۋلىلارىنا» سايكەس جەردى قايتارۋ جۇمىستارى جۇرگىزىلۋدە. اتالعان قاۋلى باسىلىم بەتىندە جاريالانىپ («تۇركىستان»، «تۋركيستون» گازەتىنىڭ 2018 جىلعى، 19 قازان، №42 سانىندا)، زاڭعا سايكەس تۇرعىن ءۇي يەلەرىنە ەسكەرتۋ قاعازدارى تاراتىلعان.

اتالعان 171 نىسانعا اكت تولتىرىلىپ سۋرەتكە تۇسىرىلگەن. ونىڭ ىشىندە 165-نىساننىڭ قۇجاتتارى تولىق جيناقتالىپ، باعالاۋ جۇمىستارى ءجۇرىپ جاتىر.

بۇگىنگى تاڭدا 90 ءۇيدىڭ باعالاۋ جۇمىستارى تولىق اياقتالدى. 33 ءۇيدىڭ يەلەرى كەلىسىمىن بەردى.

قابىلداۋعا قاتىسۋشىلاردى وبلىس اكىمى ج. تۇيمەبايەۆ قابىلداپ: «تۇركىستان — تۋريزم، تۇركى حالىقتارىنىڭ ورتالىعىنا اينالسىن دەپ جاتىرمىز. ول ءۇشىن اينالاداعى ەسكى ۇيلەردىن ورنىنا جاڭا عيماراتتار بوي كوتەرۋ كەرەك. ال بۇرىنعى تۇرعىندارعا نارىققا ساي جىلجىمايتىن مۇلكىنە قارجى، جەر تەلىمى نە باسپانا بەرىلەتىن بولادى»، — دەدى.