تۇركىستان وبلىسىنىڭ اكىمى نۇرالحان كوشەروۆ مەملەكەتتىك ساتىپ الۋ سالاسىندا زاڭبۇزۋشىلىقتارعا جول بەرگەن اۋدان-قالا اكىمدەرىنىڭ ورىنباسارلارى مەن وبلىستىق باسقارما باسشىلارىنىڭ تارتىپتىك جاۋاپكەرشىلىگىن قاراۋدى تاپسىردى. بۇل تۋرالى وبلىس اكىمدىگىنىڭ باسپا ءسوز قىزمەتى مالىمدەدى، دەپ حابارلايدى Dalanews.kz
– مەملەكەتتىك قارجى ءار تيىنىنا دەيىن ءتيىمدى جۇمسالۋى قاجەت. قولعا الىنعان بارلىق جوبالار ۋاقتىلى ءارى ءتيىمدى جۇزەگە اسىرىلۋى ءتيىس. مەملەكەتتىك قاراجات تەك الەۋمەتتىك ماڭىزى بار، حالىققا پايداسى تيەتىن جوبالارعا عانا باعىتتالۋى كەرەك. ىسىراپشىلدىققا جول بەرىلمەيدى. قاجەتسىز جوبالار ءۇشىن قارجى شاشۋ توقتاتىلسىن. ءار باسشى جاۋاپكەرشىلىكتى سەزىنسىن، – دەدى نۇرالحان كوشەروۆ.
اكىم مەملەكەتتىك ساتىپ الۋ راسىمدەرىنىڭ بارىنشا اشىق جۇرگىزىلۋى قاجەت ەكەنىن ەسكەرتتى. ول ءۇشىن زاڭ بۇزۋشىلىق ءجيى تىركەلگەن اۋدان، قالا اكىمدىكتەرى مەن باسقارمالاردىڭ رەيتينگىن جاساپ، جۇيەلى تۇردە شارا قولدانۋ قاجەتتىگىن اتاپ ءوتتى.
– ءاربىر باسشى ءوز سالاسىنا جاۋاپ بەرۋى ءتيىس. ءتارتىپ پەن جاۋاپكەرشىلىك ءبىرىنشى ورىندا تۇرۋى كەرەك، – دەدى نۇرالحان كوشەروۆ.
