ەرتەڭ، 18 قاراشا، ساعات 14.30-دا  الماتىداعى جامبىل اتىنداعى قالالىق جاسوسپىرىمدەر كىتاپحاناسىندا قالامگەر ىرىسبەك دابەيدىڭ "ءمولتىل" اتتى شىعارمالار جيناعىنىڭ تۇساۋكەسەرى وتەدى.

بۇل جيناققا ەنگەن اڭگىمەلەر كەشەگى قازاقى ءومىردىڭ تىنىس-تىرشىلىگىن جانە بۇگىنگى قوعامنىڭ كەيبىر ساتتەرىن اڭداتادى. ال «قارعا تامعان كوز جاسى» اتتى حيكاياتتا اراعا كوپ جىل سالىپ تۋعان جەرىنە بارعان كەيىپكەردىڭ كىندىك قانى تامعان ولكەگە دەگەن ساعىنىشى مەن ماحابباتى باياندالادى. رومانتيكاعا تولى جاس ءومىردىڭ كوڭىلدەن كەتپەس كەزەڭى كوركەم تىلمەن كەستەلەنگەن. وقيعاسى شيراق، ءتىلى شۇرايلى شىعارمالار قالىڭ كوپشىلىك قاۋىمعا ارنالعان.

بۇعان دەيىن قالامگەردىڭ "اكەلەرىمىز ايتاتىن اڭگىمە" اتتى ەسسەلەر جيناعى جۇرتتىڭ ىقىلاسىن تۋدىرعان.