قارجىلىق مونيتورينگ اگەنتتىگى 14 ناۋرىزدا پەريزات قايرات پەن عايني الاشبايەۆانىڭ ارەكەتتەرى ساراپتالىپ، ولار الاياقتىقتىڭ اسا ءىرى كولەمدە جاسالۋىنا جانە قىلمىستىق جولمەن الىنعان قاراجاتتى زاڭداستىرۋعا كۇدىكتى دەپ تانىلعانىن مالىمدەدى، – دەپ حابارلايدى Dalanews.kz.
پەريزات قايرات 2021-2024 جىلدار ارالىعىندا بىرنەشە رەت قايىرىمدىلىق كومەك كورسەتۋ ماقساتىندا حالىقتان اقشا جيناۋعا شاقىرعان. ونىڭ ايتۋىنشا، بۇل قاراجاتتار مۇقتاج بالالارعا، پالەستينا جانە سۋ تاسقىنىنان زارداپ شەككەندەرگە كومەك كورسەتۋ ءۇشىن جۇمسالماق بولعان.
"جالپى ۇرلانعان قارجى كولەمى 3،5 ملرد تەڭگە بولادى. پەريزات قايرات «Biz Birgemiz Qazaqstan 2030» قورىنا تۇسكەن قاراجاتتى ءوز جەكە جانە اناسى عايني الاشبايەۆانىڭ ەسەپشوتتارىنا اۋدارىپ، كەيىن ولاردى زەرگەرلىك بۇيىمدارعا، كيىم-كەشەككە، جيھازعا، ساياحاتتارعا، جوندەۋ قىزمەتتەرىنە، اۆتوكولىك جالداۋ جانە باسقا دا شىعىندارعا جۇمساعان"، - دەپ جازىلعان حابارلامادا.
"قىلمىستىق تابىستى جىمقىرۋ ماقساتىندا ول 16 سەرىكتەس جەكە كاسىپكەرمەن مەتالدان جاسالعان كيىز ۇيلەر، قايىقتار، ەتىكتەر جانە باسقا دا زاتتاردى جەتكىزۋ جونىندە جالعان كەلىسىمدەر جاساسقان. الايدا بۇل كەلىسىمدەر ءىس جۇزىندە ورىندالماعان"، - دەپ جازىلعان حابارلامادا.
قما اقپاراتى بويىنشا ناتيجەسىندە ميلليارد تەڭگەدەن اسا قاراجات قولما-قول اقشاعا اينالدىرىلىپ، جەكە ماقساتتارعا جۇمسالعان.
"وسى سومانىڭ 72 ملن تەڭگەسى ونىڭ اناسى عايني الاشبايەۆانىڭ ەسەپشوتىنا «سولتۇستىك قازاقستان وبلىسىنداعى زارداپ شەككەن تۇرعىندارعا تۇرمىستىق تەحنيكا ساتىپ الۋ» دەگەن سىلتاۋمەن اۋدارىلىپ، كەيىن ول پ.قايرات ارقىلى قولما-قول اقشاعا اينالدىرىلدى.
اقشانىڭ ءبىر بولىگى سوماسى 6،9 ملن تەڭگە تۇراتىن «Rolex» ساعاتىن ساتىپ الۋعا جۇمسالعان. پالەستيناعا كومەك كورسەتۋ ءۇشىن جينالعان قاراجاتتىڭ ءبىر بولىگىن 2024 جىلدىڭ قاڭتارىندا پ.قايرات «Rebel flowers» ءجشس-ىن ساتىپ الۋعا جۇمسالعان. ونىڭ قۇنى 23 ملن تەڭگە بولسا دا، ول كەلىسىمشارتتا كۇدىك تۋعىزباۋ ءۇشىن 2 ملن تەڭگەگە تومەندەتىلگەن سومانى كورسەتكەن"، - دەپ جازىلعان حابارلامادا.
گۇل بيزنەسىنەن تۇسكەن تابىسى 69 ملن تەڭگە بولعان. سونىمەن قاتار، اگەنتتىك مالىمەتىنشە، ۇرلانعان قاراجاتقا 4 اۆتوكولىك، 4 پاتەر، 2 اۆتوتۇراق ورنى، ءۇي، جەر تەلىمى جانە عيمارات ساتىپ الىنعان.
"جالپى قۇنى 158 ملن تەڭگە بولاتىن زەرگەرلىك بۇيىمدار، اياق كيىم جانە سومكەلەر تاركىلەندى. جالپى قۇنى 865 ملن تەڭگە بولاتىن قىلمىستىق جولمەن الىنعان مۇلىككە تىيىم سالىندى.
عايني الاشبايەۆاعا قاتىستى ءۇي قاماق تۇرىندەگى بۇلتارتپاۋ شاراسى قابىلداندى"، - دەپ جازىلعان حابارلامادا.
