Қаржылық мониторинг агенттігі 14 наурызда Перизат Қайрат пен Ғайни Алашбаеваның әрекеттері сарапталып, олар алаяқтықтың аса ірі көлемде жасалуына және қылмыстық жолмен алынған қаражатты заңдастыруға күдікті деп танылғанын мәлімдеді, – деп хабарлайды Dalanews.kz.

Перизат Қайрат 2021-2024 жылдар аралығында бірнеше рет қайырымдылық көмек көрсету мақсатында халықтан ақша жинауға шақырған. Оның айтуынша, бұл қаражаттар мұқтаж балаларға, Палестина және су тасқынынан зардап шеккендерге көмек көрсету үшін жұмсалмақ болған.

"Жалпы ұрланған қаржы көлемі 3,5 млрд теңге болады. Перизат Қайрат «Biz Birgemiz Qazaqstan 2030» қорына түскен қаражатты өз жеке және анасы Ғайни Алашбаеваның есепшоттарына аударып, кейін оларды зергерлік бұйымдарға, киім-кешекке, жиһазға, саяхаттарға, жөндеу қызметтеріне, автокөлік жалдау және басқа да шығындарға жұмсаған", - деп жазылған хабарламада.

"Қылмыстық табысты жымқыру мақсатында ол 16 серіктес жеке кәсіпкермен металдан жасалған киіз үйлер, қайықтар, етіктер және басқа да заттарды жеткізу жөнінде жалған келісімдер жасасқан. Алайда бұл келісімдер іс жүзінде орындалмаған", - деп жазылған хабарламада.

ҚМА ақпараты бойынша нәтижесінде миллиард теңгеден аса қаражат қолма-қол ақшаға айналдырылып, жеке мақсаттарға жұмсалған.

"Осы соманың 72 млн теңгесі оның анасы Ғайни Алашбаеваның есепшотына «Солтүстік Қазақстан облысындағы зардап шеккен тұрғындарға тұрмыстық техника сатып алу» деген сылтаумен аударылып, кейін ол П.Қайрат арқылы қолма-қол ақшаға айналдырылды.

Гүл бизнесінен түскен табысы 69 млн теңге болған. Сонымен қатар, агенттік мәліметінше, ұрланған қаражатқа 4 автокөлік, 4 пәтер, 2 автотұрақ орны, үй, жер телімі және ғимарат сатып алынған.

"Жалпы құны 158 млн теңге болатын зергерлік бұйымдар, аяқ киім және сөмкелер тәркіленді. Жалпы құны 865 млн теңге болатын қылмыстық жолмен алынған мүлікке тыйым салынды.

Ғайни Алашбаеваға қатысты үй қамақ түріндегі бұлтартпау шарасы қабылданды", - деп жазылған хабарламада.