گرەكيادا ارال ورتەندى: قازاقستاننىڭ ءسىم مالىمدەمە جاسادى

ساعىنىش سارداروۆا 24 ماۋ. 2024 10:24 1936

باق-تا گرەكيادا قازاقستاندىقتار ورمان ورتىنە سەبەپ بولعانى تۋرالى اقپارات تاراعان ەدى. قازاقستاننىڭ سىرتقى ىستەر مينيسترلىگى وسى اقپاراتقا قاتىستى پىكىر ءبىلدىردى، - دەپ حابارلايدى Dalanews.kz.

وقيعا گرەكيانىڭ باستى تۋريزم ورتالىقتارىنىڭ بىرىندە بولعان. ارالعا دەمالۋعا كەلگەندەر ياحتادان وتشاشۋ اتقان، ارتىنشا بۇل ورمان ورتىنە سەبەپ بولعان.

گيدرا مەرى گيورگوس كۋكۋداكيس اكىمشىلىك ءورتتى ۇيىمداستىرعان شەتەلدىكتەردى سوتقا بەرۋگە نيەتتى ەكەنىن دە ايتقان.

Orda.kz مالىمەتىنشە، ياحتانى جالعا العان كاسىپكەر دانيار ابىلعازين.

"كەيىنىرەك ياحتانى دانيار ابىلعازين جالعا العانى بەلگىلى بولدى، الايدا كەيىن ول قازاقستاندا ەكەنى حابارلاندى"، - دەپ جازدى باسىلىم.

دەگەنمەن قازاقستاننىڭ سىرتقى ىستەر مينيسترلىگى ۇستالعاندار اراسىندا قازاقستان ازاماتتارى جوق ەكەنىن مالىمدەدى.

"قازاقستاننىڭ كونسۋلى بۇل اقپارات جاريالانعاننان كەيىن وسى ىسكە قاتىستى بىردەن گرەكيا بيلىگىنە حابارلاستى. پوليسيانىڭ مالىمەتىنە سايكەس، ۇستالعاندار اراسىندا قازاقستان ازاماتتارى جوق جانە ولارعا ەشقانداي دا تالاپتار قويىلماعان"، - دەپ جازىلعان ۆەدومستۆو حابارلاماسىندا.


ۇسىنىلعان
سوڭعى جاڭالىقتار