جالپى ءبىلىم بەرەتىن پاندەر بويىنشا رەسپۋبليكالىق عىلىمي جوبالار كونكۋرسى الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىندە وتكەن. مىڭعا جۋىق وقۋشى قاتىسقان رەسپۋبليكالىق سايىستىڭ ىرىكتەۋ كەزەڭىنەن 625 جوبا ءوتتى. ەڭ ۇزدىك دەپ تانىلعان عىلىمي جۇمىستار اقتىق سىنعا جولداما الدى.
جاس دارىن يەلەرىنىڭ ءبىلىمى تارازىعا سالىنعان سايىستا تۇركىستان وبلىسىنىڭ وقۋشىلارى 3 التىن، 7 كۇمىس، 12 قولا مەدالدارىن جەڭىپ الدى. عىلىمي جوبانىڭ قورىتىندىسى بويىنشا جەتىساي اۋدانىنداعى «دارىن» مامانداندىرىلعان مەكتەپ-ينتەرناتىنىڭ 11 سىنىپ وقۋشىلارى بولات ماحانبەتوۆ پەن دانيال تۇرسىمۇرات جانە سارىاعاش اۋدانى №4 مامانداندىرىلعان مەكتەپ-ينتەرناتىنىڭ 10-شى سىنىپ وقۋشىسى باعيلا اناربەك التىن مەدال يەگەرلەرى اتاندى.
ولار قوقىس وڭدەۋ ونەركاسىبىن دامىتۋ جولدارى بويىنشا عىلىمي ەڭبەكتەرىمەن وزىق شىقتى. جانە سال-سەرىلەر پوەزياسىنداعى قىز بەن جىگىت سيپاتىن بەرۋدەگى كوركەمدىك تاسىلدەردىڭ قولدانىلۋ ەرەكشەلىگى تاقىرىپتارىندا جۇمىستارىن قورعاپ شىقتى.
ال، كۇمىس مەدالدارىن كەنتاۋ قالاسىنداعى مامانداندىرىلعان "دارىن" مەكتەپ-ينتەرناتىنىڭ شاكىرتتەرى جەڭىپ الدى. ءدال وسى ءبىلىم ۇياسى مەن كەنتاۋ قالاسى، «شورناق» جالپى ورتا مەكتەبىنىڭ جانە قازىعۇرت اۋدانى، №5 ج.كاپپاروۆ اتىنداعى مامانداندىرىلعان فيزيكا-ماتەماتيكالىق مەكتەپ-ينتەرناتى جانە تۇركىستان قالاسى، ن.وڭداسىنوۆ اتىنداعى تۇركىستان مامانداندىرىلعان مەكتەپ-ينتەرناتىنىڭ شاكىرتتەرى قولا جۇلدە يەمدەندى.
مەكتەپ وقۋشىلارىنا ارنالعان سايىس وسىمەن 21-رەت ۇيىمداستىرىلىپ وتىر. «دارىن» رەسپۋبليكالىق عىلىمي-تاجىريبەلىك ورتالىعى ۇيىمداستىرعان جاس عالىمدار باسەكەسى بيىل ەرەكشە فورماتتا وتكەن. اشىقتىق پەن ايقىندىلىقتى قامتاماسىز ەتۋ ماقساتىندا بايقاۋ ونلاين-رەجيمدە ءوتتى.
تۇركىستان وبلىسى اكىمىنىڭ باسپا ءسوز قىزمەتى
