قازاقستاندا كومىرسۋتەك پەن ۋران وندىرەتىن كومپانيالاردىڭ عىلىمي زەرتتەۋلەرگە ارنالعان اۋدارىمدارى ەندى تىكەلەي رەسپۋبليكالىق بيۋدجەتكە باعىتتالاتىن بولدى، دەپ حابارلايدى Dalanews.kz.
بۇل وزگەرىس مەملەكەت باسشىسىنىڭ اۋدارىمداردى ورتالىقتاندىرۋ جونىندەگى تاپسىرماسىن ورىنداۋ جانە بيۋدجەت كودەكسىنىڭ تالاپتارىنا سايكەستەندىرۋ ماقساتىندا ەنگىزىلدى. بۇعان دەيىن جەر قويناۋىن پايدالانۋشىلار عىلىمدى ءارتۇرلى تەتىكتەر ارقىلى قارجىلاندىرىپ كەلگەن.
ەندى كومىرسۋتەك پەن ۋران وندىرەتىن كومپانيالار عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا ارنالعان قاراجاتتى ارنايى بيۋدجەت كودى ارقىلى تىكەلەي مەملەكەتتىك قازىناعا اۋدارادى. وسى ماقساتتا 401103 كودى بەكىتىلدى.
ءتيىستى تۇزەتۋلەر 2025 جىلعى 17 جەلتوقساندا ەنەرگەتيكا مينيسترلىگى مەن عىلىم جانە جوعارى ءبىلىم مينيسترلىگىنىڭ بىرلەسكەن بۇيرىعىمەن قابىلداندى.
بيلىك وكىلدەرىنىڭ ايتۋىنشا، بۇل قادام عىلىمدى قارجىلاندىرۋ جۇيەسىن بىرىزدەندىرۋگە، اشىقتىقتى ارتتىرۋعا جانە بولىنگەن قاراجاتتىڭ ماقساتتى جۇمسالۋىن كۇشەيتۋگە باعىتتالعان.
