قازاقستاندا مەملەكەت باسشىسىنىڭ تاپسىرماسىنا سايكەس گەولوگيالىق اقپاراتتى جەدەل سيفرلاندىرۋ جانە جۇيەلەۋ جونىندەگى ۇلتتىق باعدارلاما جۇزەگە اسىرىلىپ جاتىر، دەپ حابارلايدى Dala News.
جوبا ەل اۋماعىنىڭ گەولوگيالىق زەرتتەلۋ دەڭگەيىن ارتتىرۋعا، ينۆەستيسيالىق تارتىمدىلىعىن كۇشەيتۋگە جانە دەرەكتەردىڭ اشىقتىعىن قامتاماسىز ەتۋگە باعىتتالعان. گەولوگيالىق ماتەريالداردى سكانەرلەۋ مەن سيفرلاندىرۋ كەيىن جاساندى ينتەللەكتى قولداناتىن زاماناۋي تالداۋ قۇرالدارىن ەنگىزۋگە نەگىز قالايدى.
بۇگىندە 66 180 ەكىنشى رەتتىك گەولوگيالىق ەسەپ قۇرىلىمدالدى. ولاردىڭ العاشقى تومدارى ءبىرىڭعاي جەر قويناۋىن پايدالانۋ پورتالىندا قولجەتىمدى. بۇل مۇددەلى تاراپتارعا گەولوگيالىق قورلارعا بارماي-اق، ونلاين ءارى تەگىن تانىسۋعا مۇمكىندىك بەرەدى. ەكىنشى رەتتىك ەسەپتەردى سكانەرلەۋ جۇمىستارى 2000 جىلداردىڭ باسىنان جۇرگىزىلىپ كەلەدى.
جالپى العاندا، 4،7 ملن-عا جۋىق بىرلىك سيفرلىق فورماتقا كوشىرىلگەن. بۇل – باستاپقى گەولوگيالىق اقپاراتتىڭ 97،5%-ى.
اتاپ ايتقاندا:
– 2023–2024 جىلدارى 2 728 620 بىرلىك؛
– 2025 جىلى 1 969 216 بىرلىك سيفرلاندىرىلدى.
گەولوگيالىق قورلاردا ساقتالعان باسىم باستاپقى اقپارات كولەمى شامامەن 5 ملن بىرلىكتى قۇرايدى. دەرەكتەر قاعاز قۇجاتتار، گرافيكالىق قوسىمشالار، ماگنيتتىك تاسپالار مەن كارتريدجدەر تۇرىندە ساقتالعان.
ارحيۆتىك ماتەريالداردى تولىق سيفرلاندىرۋ 2026 جىلدىڭ سوڭىنا دەيىن اياقتالادى دەپ جوسپارلانىپ وتىر. سونىڭ ناتيجەسىندە گەولوگيالىق دەرەكتەردىڭ 100% ەلەكتروندى فورماتتا قولجەتىمدى بولۋى كوزدەلۋدە.
