شۋ اۋدانى اكىمدىگىنىڭ تۇرعىن ۇي-كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمىنىڭ بەرگەن مالىمەتىنە سۇيەنسەك، 36 000 اسا تۇرعىنى بار شۋ قالاسىنان باستاپ، جاڭاجول، كوكقاينار، بەلباسار، ەڭبەكشى، تولە بي، بىرلىك، قونايەۆ، كوكتوبە جانە بىرلىكۇستەم اۋىلدارى دا تابيعي گازدى تۇتىنىپ، وركەنيەتتىڭ يگىلىگىنە قول جەتكىزۋدە. شۋ قالاسىنا گاز قۇبىرىن جۇرگىزۋ جۇمىستارىن «پگس رەگيون» جاۋاپكەرشىلىگى شەكتەۋلى سەرىكتەستىگى جۇرگىزىپتى. اتالمىش مەكەمە 100 شاقىرىمنان اسا اۋماققا گاز جەلىلەرىن تارتىپ، 3000-نان اسا تۇرعىن ءۇيدىڭ كوگىلدىر وتىنعا ەركىن قوسىلۋىنا ىڭعايلى جاعداي جاساعان. تابيعي گازبەن قامتاماسىز ەتىلگەن اۋىلداردىڭ ىشىندە بىرلىك پەن كوكتوبە اۋىلدارىنا گاز قۇبىرلارىن «قازترانسگاز ايماق» اق جۇرگىزسە، قالعان ەلدى مەكەندەردە گازداندىرۋ جۇمىستارىن تۇرعىنداردىڭ كەلىسىمى بويىنشا ءتيىستى مەردىگەرلەر اتقارعان. ال، جيدەلى، اڭ شارۋاشىلىعى، ەسپە، قۇلاقشىن، الايعىر، قۇموزەك سىندى اۋىلداردا حالىق سانىنىڭ از بولۋى سەبەبىنەن جانە ولار ماگيسترالدى گاز قۇبىرىنان قاشىقتا ورنالاسقاندىقتان ول اۋىلدارعا گاز قۇبىرىن جۇرگىزۋ ءتيىمسىز دەپ تابىلعان. بۇگىنگى تاڭداعى گازداندىرۋ جۇمىستارى اياسىندا شوقپار، دالاقاينار، بالۋان شولاق، بايدىبەك، ورازالى باتىر، اقسۋ سەكىلدى اۋداننان شالعاي جاتقان 18 اۋىلدى كوگىلدىر وتىنمەن قامتۋ كوزدەلىپ وتىر.وسىلايشا، اۋدان اۋماعىنداعى ەلدى مەكەندەردى گازداندىرۋ جۇمىستارى كۇننەن كۇنگە قارقىن الىپ، جوسپارلى تۇردە جۇرگىزىلىپ كەلەدى.
بۇدان بولەك، اۋدانداعى بيۋدجەتتىك نىسانداردى كوگىلدىر وتىنمەن قامتاماسىز ەتۋ جۇمىستارى دا قارقىن الىپ كەلەدى. ماسەلەن، اۋدانداعى ورتالىق قازاندىق پەن شۋ قالالىق اۋرۋحاناسىنىڭ قازاندىعى جانە 3 جەكەمەنشىك بالاباقشا تابيعي گازدى تۇتىنۋدا. مىنە، وسىلايشا اۋدانداعى شالعاي ەلدى مەكەندەرمەن قاتار، الەۋمەتتىك ماڭىزى بار نىساندار دا تابيعي گازعا قوسىلۋ مۇمكىندىگىنە يە بولىپ وتىر.
