Gazdandyrý isi qarqyndy júrgizilýde
Shý aýdany ákimdiginiń turǵyn úi-kommýnaldyq sharýashylyǵy, jolaýshylar kóligi jáne avtomobil joldary bóliminiń bergen málimetine súiensek, 36 000 asa turǵyny bar Shý qalasynan bastap, Jańajol, Kókqainar, Belbasar, Eńbekshi, Tóle bi, Birlik, Qonaev, Kóktóbe jáne Birlikústem aýyldary da tabiǵi gazdy tutynyp, órkeniettiń igiligine qol jetkizýde. Shý qalasyna gaz qubyryn júrgizý jumystaryn «PGS Region» jaýapkershiligi shekteýli seriktestigi júrgizipti. Atalmysh mekeme 100 shaqyrymnan asa aýmaqqa gaz jelilerin tartyp, 3000-nan asa turǵyn úidiń kógildir otynǵa erkin qosylýyna yńǵaily jaǵdai jasaǵan. Tabiǵi gazben qamtamasyz etilgen aýyldardyń ishinde Birlik pen Kóktóbe aýyldaryna gaz qubyrlaryn «QazTransGaz Aimaq» AQ júrgizse, qalǵan eldi mekenderde gazdandyrý jumystaryn turǵyndardyń kelisimi boiynsha tiisti merdigerler atqarǵan. Al, Jideli, Ań sharýashylyǵy, Espe, Qulaqshyn, Alaiǵyr, Qumózek syndy aýyldarda halyq sanynyń az bolýy sebebinen jáne olar magistraldy gaz qubyrynan qashyqta ornalasqandyqtan ol aýyldarǵa gaz qubyryn júrgizý tiimsiz dep tabylǵan. Búgingi tańdaǵy gazdandyrý jumystary aiasynda Shoqpar, Dalaqainar, Balýan Sholaq, Báidibek, Orazaly batyr, Aqsý sekildi aýdannan shalǵai jatqan 18 aýyldy kógildir otynmen qamtý kózdelip otyr.Osylaisha, aýdan aýmaǵyndaǵy eldi mekenderdi gazdandyrý jumystary kúnnen kúnge qarqyn alyp, josparly túrde júrgizilip keledi.
Budan bólek, aýdandaǵy biýdjettik nysandardy kógildir otynmen qamtamasyz etý jumystary da qarqyn alyp keledi. Máselen, aýdandaǵy ortalyq qazandyq pen Shý qalalyq aýrýhanasynyń qazandyǵy jáne 3 jekemenshik balabaqsha tabiǵi gazdy tutynýda. Mine, osylaisha aýdandaǵy shalǵai eldi mekendermen qatar, áleýmettik mańyzy bar nysandar da tabiǵi gazǵa qosylý múmkindigine ie bolyp otyr.
